1 Pedro 1 - El Nuevo Testamento

Pedro kintlajkuiluiya on tlaneltokakej yejuan chajchayajtinemij

¹ Nejua, Pedro, niiapóstol* JesuCristo. Nemechtlajkuiluiya nemejuamej yejuan xnenchantij nemochan, yej nenchantij tlajtlauis imanian iueyitlalpan Ponto, Galacia, Capadocia, Asia niman Bitinia.

² Dios toTajtsin omechtlapejpenij para ikoneuan pampa okimat ika ipan in tiempo nenkineltokaskej JesuCristo. Itechkopa on Espíritu Santo, Dios omechchipauilij nemotlajtlakol para nenkitlakamatiskej JesuCristo niman para yejua omechchipau ikan iyesyotsin. Xpiyakan tej, miyek tlatiochiualistli niman yolseuilistli.

Ma tikyekteneuakan Dios ipampa on tlamachalistli* yejuan melauak

³ Ma tikyekteneuakan Dios iTajtsin toTEKO JesuCristo pampa ikan ueyi iteiknelilis* otechmakak yenkuik nemilistli. Ijkon tej, otitlakatkej oksejpa. Yejua ika, tikpiyaj tlamachalistli* yejuan melauak, pampa JesuCristo onoyolitij* niman onoketsteu ipan itlalkon.

⁴ Niman no ijki tikpiyaj sen herencia yejuan Dios techeuilijtikaj ne iluikak. On herencia xkaman uelis xoxotonis, nion xuelis ijtlakauis, nion xuelis poliuis ikualtsinyo.

⁵ Niman pampa nemejuamej nenkineltokaj Dios, yejua mechmanauijtias ikan ipoder hasta ipan on sa ika nochi tonajli ijkuak mechititis ika yokaxitij nemotemakixtilis.

⁶ Yejua ika tej, nemejuamej sanoyej* xpakikan maski kas nenkijyouiskej ipan keski tonajli miyek tlajtlamach* tetlatlatalistli.

⁷ Nemejuamej nenkijyouiyaj on tlajtlamach* pajsolouilistli niman tetlatlatalistli san para kitlatlataskej nemotlaneltok para nopantlantis tla melauak nentlaneltokaj. Nenkimatij kenijki on tlakamej kichipauaj on oro ikan tlitl para kitaj tla melauak nochi yejua. Tej, nemotlaneltok más ueyi kijtosneki yejuan xkaman poliui ken on oro popoliui. Tla kuajli kisas nemotlaneltok itech on tetlatlatalistli, nenkiseliskej yekteneualistli niman ueyilistli niman tetlakaitalistli ipan on tonajli ijkuak JesuCristo uajlas oksejpa.

⁸ Nemejuamej nenkitlajsojtlaj* JesuCristo maski xkaman onenkitakej. Maski aman xnenkitaj, nenkineltokaj niman nempakij ikan pakilistli yejuan ajsitikaj*. In pakilistli sanoyej ueyi niman xueli nochi nenkijtouaj ikan tlajtojli.

⁹ Pampa nenkineltokaj, nenkiseliaj temakixtilistli para nemoalma.

¹⁰ Ye uejkaui on tiotlajtojkej, yejuan okijtojkej ika nenkiseliskej in temakixtilistli ikan iteiknelilis* Dios, okitejtemojkej niman ikan nochi inyojlo otetlajtlajtoltijkej para kimatiskej kenijki onyas in temakixtilistli.

¹¹ Ijkuak on Espíritu yejuan Cristo okinmakak okintitij on tlen Cristo kijyouis niman sakin* kipiyas ueyilistli, yejuamej kinekiyaj kimatiskej akinonon Cristo, niman kamanon nochiuas.

¹² Dios okinmachistij on tlajtlamach* yejuan okijtojkej. Yejua okinmachistij ika xnochiuas chika nemij, yej nochiuas ijkuak miyek xipan yopanok. Aman tej, Cristo okuajtitlan on Espíritu Santo de iluikak para kimpaleuiya on yejuan mechmachtiaj on kuajli tlajtojli yejuan kiteijlia ken Dios temakixtia. Yejuamej ye mechijlianij ika nochiuas on tlen okijtojkej on tiotlajtojkej ye uejkaui. Hasta on ángeles kajsikamatisnekij on kuajli tlajtojli yejuan Dios mechmaka.

On tlaneltokakej noneki chipajtiaskej ken Dios chipauak

¹³ Yejua ika, xtlamachilistlachakan para kuajli xtlanemilikan. Kuajli xmoyekanakan. Xmachakan ikan nochi nemoyojlo iueyitetlajsojtlalis* Dios yejuan nenkiseliskej ijkuak JesuCristo uajlas.

¹⁴ Pampa nenikoneuan Dios yejuan nenkitlakamatij, maka xkauilikan on xkuajli eleuilistli* mechyekanas yejuan nenkipiyayaj ijkuak xnenkixmatiyaj Dios.

¹⁵ Yej xchipajtiakan de nochi tlen nenkichiuaskej ken Dios chipauak yejuan omechnots para nenkiseliskej temakixtilistli.

¹⁶ Dios kijtoua ipan on Yektlajkuilojli: “Nemejuamej xchipajtiakan pampa nejua nichipauak.”

¹⁷ Tla nenkitokayotiaj “toTajtsin” on yejuan toDios, xkelnamikikan ika yejua xkinchikoita on tlakamej ijkuak kintlaxtlauilia, yej kintlaxtlauilia ken se kichiua. Yejua ika tej, xtlakaitakan Dios ikan nemojtijli ipan nochi tonaltin kech nennemiskej ipan in tlaltikpaktli. Niman xkelnamikikan ika tinemij ipan in tlaltikpaktli ken xtichanejkej.

¹⁸ Dios tej, omechkixtij ipan on nemilistli yejuan onenkiselijkej intech on ye uejkaui nemotajuan. Yejua on xkuajli nemilistli xomechpaleuij. Niman nemejuamej kuajli nenkimatstokej kech onotlaxtlau nemotemakixtilis. On nemotemakixtilis xonotlaxtlau ikan tlajtlamach* yejuan san panos ken on oro noso plata,

¹⁹ yej ikan iyesyo Cristo, on tlen patioj. Yejua onouentlalij ken sen borreguito yejuan nochi chipauak niman xkanaj tlakokojli* ipan itlakayo.

²⁰ Ijkuak in tlaltikpaktli xe onkatka, Dios okitlapejpenij Cristo para kitoyauas iyesyo niman ijkon mechmakixtis. Pero Cristo aman youalajka niman omik nemopampa.

²¹ Ipampa Cristo nemejuamej nenkineltokaj Dios, yejuan okiyolitij, niman oketsteu ipan itlalkon, niman okimakak ueyilistli. Ijkon tej, nemejuamej nenkipiyaj nemotlaneltok niman nemotlamachalis* itech Dios.

²² Aman pampa nenkitlakamatij itlajtol Dios, nemoalma chipajkej para nenueliskej nenkintlajsojtlaskej* on tokniuan. Yejua ika sanoyej xmotlajsojtlakan* inuan oksekimej ikan nochi nemoyojlo.

²³ Nemejuamej tej, yonentlakatkej oksejpa. Onenkiselijkej yenkuik nemilistli yejuan xkaman tlamis. Nemotajuan niman nemonanuan xomechmakakej in yenkuik nemilistli pampa on nemilistli yejuan yejuamej omechmakakej tlamis. Onenkiselijkej in yenkuik nemilistli itechkopa itlajtol Dios, yejuan onkaj niman onyas para nochipa.

²⁴ On Yektlajkuilojli kijtoua: Nochi tlakatl sano ijki ken itlaj xojtli, niman iueyilis on tlakatl sano ijki ken on xochitl ne ipan on tepetl. On xojtli pilini niman uetsi ixochiyo,

²⁵ pero itlajtol Dios onyas para nochipa. On itlajtol Dios, sano yejua on kuajli tlajtojli yejuan kiteijlia kenijki Dios temakixtia, yejuan yomechijlijkej.