1 Juan 5 - El Nuevo Testamento

Dios techpaleuis para tiktlaniskej in tlaltikpaktli ijkuak techtlatlata

¹ Nochimej yejuan kineltokaj ika Jesús yejua Cristo yejuan Dios okuatitlan, yejuamej ikoneuan Dios. Nochimej yejuan kitlajsojtlaj* sen tajtli no ijki kintlajsojtlaj ikoneuan on tajtli.

² Ijkon tej, ijkuak tiktlajsojtlaj Dios niman tiktlakamatij itlanauatiluan, tikmatij ika no tikintlajsojtlaj ikoneuan.

³ Ijkuak tiktlakamatij itlanauatiluan Dios, sano yejua tiktlajsojtlaj. Niman itlanauatiluan xyetikej,

⁴ pampa nochimej yejuan tekoneuan itech Dios kitlanij in tlaltikpaktli. Niman ikan totlaneltok tiktlanij in tlaltikpaktli.

⁵ ¿Akinon uelis kitlanis in tlaltikpaktli? San on yejuan kineltokas ika Jesús yejua iKonetsin Dios.

On apóstol* Juan temachistia de JesuCristo

⁶ On yejuan ouajlaj, yejua JesuCristo. Yejua okipanextij ika yejua iKoneu Dios ijkuak onokuatekij ikan atl niman no ijkuak okitoyau iyesyo ne ipan on kojnepanojli*. Xsan ika onokuatekij, pero yej no ika okitoyau iyesyo. On Espíritu Santo sano yejua kitepannextilia ika in melauak, niman on Espíritu nochipa kijtoua on tlen melauak.

⁷ Ipan iluikak nemij yeyimej yejuan kitepannextiliaj ika JesuCristo melauak iKoneu Dios: toTajtsin, iTlajtoltsin, niman iEspíritu Santo. Niman in yeyimej san se tlajtojli kitepannextiliaj.

⁸ Niman nikan ipan in tlaltikpaktli no yeyimej kitepannextiliaj: on Espíritu Santo, on itlakuatekilis JesuCristo ikan atl, niman on ika okitoyau iyesyo ne ipan kojnepanojli. Niman in yeyimej san se tlajtojli kitepannextiliaj ika JesuCristo melauak Dios iKoneu.

⁹ Tikneltokaj intepannextilis on tlakamej, pero itepannextilis Dios más sanoyej* ueyi kijtosneki pampa itepannextilis Dios yejua otechijlij ika iKoneu.

¹⁰ On yejuan kineltoka iKonetsin Dios, kuajli kimati ipan iyojlo ika Jesús melauak iKonetsin Dios. On yejuan xkineltoka sano ijki ken kinemiliskia ika Dios sen tlakajkayajketl, pampa xkineltoka on tlen Dios otechpannextilij itech iKonetsin.

¹¹ Niman in yejua itepannextilis Dios yejuan okijtoj itech iKonetsin. Okitepannextilij ika otechmakak yenkuik nemilistli para nochipa niman ika in nemilistli otechmakak itechkopa iKonetsin.

¹² On yejuan kipiya iKonetsin Dios ipan iyojlo, no kipiya yejua in nemilistli. Pero on yejuan xkipiya iKonetsin Dios ipan iyojlo, xkipiya yejua in nemilistli.

¹³ Nemejuamej yejuan nenkineltokaj iKonetsin Dios nemechtlajkuiluiya yejua in tlajtlamach* para xmatikan ika nenkipiyaj nemilistli para nochipa.

¹⁴ Tikneltokaj ikan nochi toyojlo, ika Dios san tlinon tiktlajtlaniliskej ken yejua kineki, yejua techkakis.

¹⁵ Niman tla tikmatstokej ika Dios techkaki ijkuak tiktlajtlaniliaj, no tikmatstokej ika ye tikpiyaj on tlen tiktlajtlaniliaj.

¹⁶ Tla yakaj kita ika ikniu kichiua tlajtlakojli yejuan xkuika ipan mikilistli para nochipa, noneki kichiuas oración ipampa on ikniu, niman Dios kimakas nemilistli ialma para maka ixpoliuis. Ijkin nikijtoua para on yejuan kichiua tlajtlakojli yejuan xkuika ipan mikilistli para nochipa. Pero onkaj tlajtlakojli yejuan teuika ipan mikilistli para nochipa. Yejua on ken on xnemechijlia para ipampa xchiuakan oración.

¹⁷ Nochi tlen xkuajli, yejua tlajtlakojli. Pero onkaj tlajtlakojli yejuan xteuika ipan mikilistli para nochipa.

¹⁸ Tikmatstokej ika on yejuan ikoneuan Dios xok kistinemij ipan tlajtlakojli, pampa Cristo yejuan iKonetsin Dios kinmejeua, niman on diablo* xok ueli kintlani.

¹⁹ Tikmatstokej ika titekoneuan itech Dios, niman no tikmatstokej ika on diablo* ipan ima kimpiya nochimej on tlakamej de in tlaltikpaktli.

²⁰ No tikmatstokej ika iKonetsin Dios youajlaj, niman yotechmakak kajsikamatilistli para tikixmatiskej yejuan melauak Dios. Aman tinemij san sekan iuan on yejuan melauak Dios. In kijtosneki tinemij san sekan iuan iKonetsin. JesuCristo yejua melauak Dios, niman yejua techmaka yenkuik nemilistli para nochipa.

²¹ Notetlajsojkakoneuan, maka xkinneltokakan on yejuan xmelauak dioses. Ma ijki nochiua.