1 Juan 4 - El Nuevo Testamento

Kenijki tiueliskej tikintlatlataskej on yejuan noteneuaj ika Dios okinuajtitlan

¹ Notlajsojkaikniuan, maka xkinneltokakan nochimej on yejuan kijtouaj ika Dios okinuajtitlan para temachtiaj. Yej achtopa xkinmixtlalokan para nenkitaskej tla melauak Dios okinuajtitlan noso ka, pampa miyekej tlakajkayajkej tiotlajtojkej yokiskej imanian in tlaltikpaktli.

² Nemejuamej ijkin uelis nenkinmixtlaloskej tla Dios okinuajtitlan: nochimej temachtijkej yejuan kiteneuaskej ika JesuCristo nemiya ipan in tlaltikpaktli ikan itlalnakayo, melauak okinuajtitlan Dios.

³ Pero nochimej temachtijkej yejuan xkiteneuaskej ika JesuCristo nemiya ipan in tlaltikpaktli ikan itlalnakayo, xejua Dios okinuajtitlan. Yej yejuamej ualeuaj itech on yejuan kineki kixoxotonilis itekiu Cristo. Yonenkakkej ika uajlas niman aman nemechijlia ika ye nemij ipan in tlaltikpaktli tlakamej yejuan kinekij kixoxotoniskej itekiu Cristo.

⁴ Notlajsojtlakoneuan, nemejuamej nentekoneuan itech Dios, niman on yejuan kinekij kixoxotoniliskej itekiu Cristo xomechkajkayajkej ikan on xkuajli temachtijli, pampa on Espíritu Santo yejuan nemouan nemi más kojtik xken on diablo* yejuan nemi ipan in tlaltikpaktli.

⁵ No uelis ijkin nenkintlatlataskej tla Dios okinuajtitlan: on yejuan tekoneuan itech in tlaltikpaktli tlajtlajtouaj ikan tlajtlamach* de in tlaltikpaktli, niman on tlakamej yejuan tekoneuan itech in tlaltikpaktli kuelkakij on temachtijli yejuan yejuamej temachtiaj.

⁶ Pero tejuamej titekoneuan itech Dios, niman on yejuan kixmatij Dios, kuelkakij on temachtijli yejuan tejuamej titemachtiaj. Pero on yejuan xtekoneuan itech Dios xtechkakij. Yejua ika, ijkon tiueliskej tikmatiskej tla se kuajli temachtijketl noso tlakajkayajki temachtijketl.

Dios yejua tetlajsojtlalistli*

⁷ Notlajsojkaikniuan, ma titotlajsojtlakan* inuan oksekimej, pampa on tetlajsojtlalistli* ualeua itech Dios. Yejua ika, on yejuan tetlajsojtla yejua tekoneu itech Dios niman kixmati Dios.

⁸ On yejuan xtetlajsojtla xkixmati Dios, pampa Dios yejua tetlajsojtlalistli*.

⁹ Dios okipantlantij ken techtlajsojtla* ijkuak okuajtitlan isenteKonetsin ipan tlaltikpaktli para itechkopa iKonetsin ma tikpiyakan nemilistli para nochipa.

¹⁰ Xmatikan tlinon kijtosneki in tetlajsojtlalistli*. In tetlajsojtlalistli* xkijtosneki ika otiktlajsojtlakej* Dios, yej yejua otechtlajsojtlak hasta okuajtitlan iKonetsin para omik ipan kojnepanojli* para otechtlapojpoluilij totlajtlakoluan.

¹¹ Notlajsojkaikniuan, tla Dios ijkon sanoyej* otechtlajsojtlak, no ijki noneki titotlajsojtlaskej* inuan oksekimej.

¹² Xkaman yakaj kita Dios, pero tla titotlajsojtlaj inuan oksekimej, Dios nemi ipan toyojlo, niman titetlajsojtlaskej ken Dios kineki.

¹³ Pampa Dios otechmakak iEspíritu, tikmatij ika tinemij san sekan iuan yejua, niman yejua san sekan touan nemi.

¹⁴ Niman sano tejuamej otikitakej iKonetsin Dios niman tiktepanextiliaj ika toTajtsin okuajtitlan para okinmakixtiko in tlaltikpaktlakamej.

¹⁵ San akinon yejuan kiteneuas ika Jesús yejua iKonetsin Dios, Dios nemi san sekan iuan on tlakatl, niman on tlakatl san sekan nemi iuan Dios.

¹⁶ Tikmatij niman tikneltokaj ika Dios techtlajsojtla. Dios sano yejua tetlajsojtlalistli*. On yejuan tetlajsojtla san sekan nemi iuan Dios, niman Dios san sekan nemi iuan.

¹⁷ Tla tiktlajsojtlaj Dios niman no tikintlajsojtlaj tokniuan ikan nochi toyojlo ken yejua kineki, xtitomojtiskej ixpan Dios ipan on tonajli ijkuak teyolkuitis. Xtitomojtiskej ipan on tonajli pampa titetlajsojtlaj nikan ipan in tlaltikpaktli ken Cristo tetlajsojtla.

¹⁸ Ijkuak se tetlajsojtla ken noneki, xkipiya nemojtijli, pampa kampa onkaj tetlajsojtlalistli* yejuan chipauak xonkaj nemojtijli. Tla se nomojtia, yejua nomojtia pampa kinemilia ika kiselis icastigo. Yejua ika, tla se nomojtia, kijtosneki ika yejua xtetlajsojtla ken Dios kineki.

¹⁹ Tejuamej tiktlajsojtlaj Dios pampa yejua achtopa otechtlajsojtlak.

²⁰ Tla yakaj kijtoua: “Nejua niktlajsojtla* Dios”, pero kitlauelita ikniu, yejua kijtoua on tlen xmelauak, pampa tla se xkitlajsojtla ikniu yejuan kita, no xkitlajsojtla Dios yejuan xkita.

²¹ Dios otechmakak in tlanauatijli: On yejuan kitlajsojtla* Dios no ma kitlajsojtla* ikniu.