1 Juan 3 - El Nuevo Testamento

Tiikoneuan Dios

¹ ¡Xmatikan kenijki sanoyej* techtlajsojtla* Dios toTajtsin, hasta techtokayotiaj tiikoneuan Dios, niman melauak tiikoneuan! Yejua ika, on tlaltikpaktlakamej xtechixmatij pampa no xkixmatij Dios.

² Notlajsojkaikniuan, aman ye titekoneuan itech Dios. Hasta aman xtechititia kenijki tinemiskej. Pero tikmatstokej ika ijkuak Cristo uajlas, tinemiskej ken yejua, pampa tikitaskej kenijki mero nemi.

³ Niman nochimej yejuan kinekij nemiskej ken Cristo, nochipajtiuij ijkon ken yejua nemi chipauak.

⁴ Nochimej yejuan tlajtlakouaj xkitlakamatij itlanauatiluan Dios. On tlajtlakojli kijtosneki xnotlakamati on itlanauatiluan Dios.

⁵ Nemejuamej ye nenkimatstokej ika JesuCristo ouajlaj ipan in tlaltikpaktli para otechkixtiliko on totlajtlakoluan, niman ika yejua xkipiya tlajtlakojli.

⁶ Ijkon tej, on yejuan nochipa nemi iuan Cristo, xok kistinemi ipan tlajtlakojli. On yejuan kistinemi ipan tlajtlakojli, xkimati ken nemi Cristo, nion xkixmati.

⁷ Notlajsojkakoneuan, maka xmokauilikan yakaj mechkajkayaua. On yejuan kichiua tlen kuajli, yejua kuajli tlakatl ijkon ken Cristo kuajli.

⁸ Pero yejuan kistinemi ipan tlajtlakojli, yejua tekoneu itech on diablo*, pampa on diablo* yejua tlajtlakolej desde ijkuak nochi opeu onkaj. Niman on iKonetsin Dios ouajlaj para okixoxotoniko on tlen kichiua on diablo*.

⁹ Xakaj yejuan ikoneu Dios kistinemi ipan tlajtlakojli, pampa inemilis Dios nokaua ipan. Niman yejua xuelis más kistinemis ipan tlajtlakojli, pampa yejua yotlakat itech Dios.

¹⁰ Ijkin uelis nenkimatiskej akinomej tekoneuan itech Dios niman akinomej tekoneuan itech on diablo*. Tla yakaj xkichiua tlen kuajli noso xkitlajsojtla ikniu, yejua xtekoneu itech Dios.

Noneki titotlajsojtlaskej* inuan oksekimej

¹¹ Desde ijkuak onenkineltokakej Cristo, onenkakkej ika noneki titotlajsojtlaskej* inuan oksekimej.

¹² Maka ma tikchiuakan ken Caín okichiu, yejuan tekoneu katka itech on diablo*, niman okimiktij ikniu. ¿Niman tline* okimiktij? Okimiktij pampa Caín kichiuaya on tlen xkuajli, niman on ikniu kichiuaya tlen kuajli.

¹³ Nokniuan, maka xmojkatlachakan tla mechtlauelitaj on tlajtlakolejkej.

¹⁴ Otimikaj pampa otitoxelojkaj itech Dios, pero aman tikpiyaj nemilistli pampa tinemij san sekan iuan Dios. Yejua in tikmatstokej pampa tikintlajsojtlaj on tokniuan. On yejuan xkintlajsojtla* oksekimej, sanken* miktikaj.

¹⁵ San akinon yejuan kitlauelita ikniu, yejua sen temiktijketl ipan iyojlo. Niman nemejuamej nenkimatstokej ika xakaj yejuan temiktijketl kipiya yenkuik nemilistli yejuan para nochipa.

¹⁶ Ijkuak Cristo omik topampa, otechititij kenijki kijtosneki tikintlajsojtlaskej on tokniuan. Yejua ika tej, tejuamej noneki tikimpaleuiskej on tokniuan ikan tetlajsojtlalistli*, niman tla saman noneki, hasta tepampa timikiskej.

¹⁷ On yejuan kipiya riquezas niman kitas sen ikniu itlaj kipoloua, niman yejua xkiknelis, ¿kenijki uelis kijtos ika kipiya tetlajsojtlalistli* ixpan Dios?

¹⁸ Notlajsojkakoneuan, maka san xteijlikan ika nenkipiyaj tetlajsojtlalistli*, nion maka san xkijtokan ika nenkintlajsojtlaj on tokniuan, yej melauak xkintlajsojtlakan* ikan nochi nemoyojlo niman xkintitikan ika nenkintlajsojtlaj ika on tlen nenkichiuaj.

Tikpiyaj yolchikaualistli itech Dios

^19-20 Tla ijkon tikintlajsojtlaj on tokniuan, tikmatij ika melauak tiikoneuan Dios niman xsan titoteneuaj. Tej, maski toyojlo techtlajtlakolmakas, tikpiyaj confianza ixpan Dios, pampa Dios más nochi kimati xken toyojlo, niman yejua nochi kimati.

²¹ Ijkon tej, notlajsojkaikniuan, tla toyojlo xtechtlajtlakolmaka, tikpiyaj confianza ixpan Dios.

²² Niman nochi tlen tiktlajtlaniskej yejua techmakas, pampa tiktlakamatij itlanauatiluan niman tikchiuaj tlinon kipaktia.

²³ Niman in yejua itlanauatil Dios: “Ma tikneltokakan iKonetsin JesuCristo, niman ma titotlajsojtlakan* inuan oksekimej ken yejua yotechnauatij.”

²⁴ On yejuan kitlakamatij itlanauatiluan Dios, san sekan nochipa iuan nemij, niman Dios san sekan nochipa inuan nemi. Niman itechkopa iEspíritu yejuan otechmakak tikmatstokej ika yejua touan nemi.