1 Juan 2 - El Nuevo Testamento

Cristo yejua topampa tlajtoua

¹ Notlajsojkakoneuan, nemechtlajkuiluiya yejua in tlajtlamach* para maka nentlajtlakoskej. Pero tla yakaj tlajtlakoua, tikpiyaj totepantlajtojkau yejuan techpaleuis para tikseliskej tetlapojpoluilistli itech toTajtsin Dios. In totepantlajtojkau yejua JesuCristo yejuan yolmelajki.

² Yejua omik para ikan iyesyo otechchipauilij nochi totlajtlakoluan, niman xsan tejuamej totlajtlakoluan, yej no intlajtlakoluan nochimej on tlaltikpaktlakamej.

³ Tla tikintlakamatij itlanauatiluan Dios, tla ijkon, tikmatstokej ika yejua tikixmatij.

⁴ Pero tla yakaj kijtoua ika kixmati Dios niman xkintlakamati itlanauatiluan, yejua nochiua sen tlakajkayajketl, niman xkijtoua on tlen melauak.

⁵ Pero tla yakaj kichiua on tlen Dios kijtoua, tla ijkon, melauak ikan nochi iyojlo kitlajsojtla*.

⁶ On yejuan kijtoua ika nochipa nemi san sekan iuan Dios, noneki nemis ken JesuCristo nemiya.

On tlauijli ye tlauiloua pampa sekimej yopeu notlajsojtlaj inuan oksekimej

⁷ Nokniuan, xnemechtlajkuiluijtikaj se yenkuik tlanauatijli. Yejua in tlanauatijli ye nenkipiyayaj desde ijkuak onenkineltokakej Cristo. Yejua in tlanauatijli yonenkakaj.

⁸ Pero in tlen nemechtlajkuiluiya, sen yenkuik tlanauatijli pampa Cristo ipan onouikak, niman aman nemejuamej no ipan nemouikaj. Tikmatij ika melauak pampa ueli tikitaj ika on tlayouajlotl ye polijtiu niman ye tlauiloua on yejuan melauak tlauijli.

⁹ Tla yakaj noteneua nemi ipan tlauijli, pero kitlauelita ikniu, sanken* nemi ipan tlayouajlotl.

¹⁰ On yejuan kitlajsojtla* ikniu nemi ipan tlauijli, niman xitlaj* uelis kitlajkalis ipan tlajtlakojli.

¹¹ Pero on yejuan kitlauelita ikniu nemi niman kistinemi ipan tlayouajlotl. Yejua xkimati kanon yau, pampa on tlayoualyotl kixpayatilia.

¹² Nemechtlajkuiluiya nemejuamej notlajsojkakoneuan pampa Dios yokintlapojpoluij nemotlajtlakoluan itechkopa JesuCristo.

¹³ Nemechtlajkuiluiya nemejuamej tatajtin pampa aman yonenkixmatkej yejuan ye nemiya ijkuak nochi opeu. Nemechtlajkuiluiya nemejuamej telpokamej pampa yonenkitlankej on diablo*. Nemechtlajkuiluiya nemejuamej tlajsojkakokonej pampa yonenkixmatkej toTajtsin.

¹⁴ Nemechtlajkuiluiya nemejuamej tatajtin pampa aman yonenkixmatkej yejuan ye nemiya ijkuak nochi opeu. Nemechtlajkuiluiya nemejuamej telpokamej pampa nenchijchikajtokej, niman itlajtol Dios onkaj ipan nemoyojlo, niman pampa yonenkitlankej on diablo*.

¹⁵ Maka xnejnekikan nemouikaskej ken on tlajtlakolejkej nouikaj, nion maka xtlajsojtlakan on tlen onkaj ipan in tlaltikpaktli. Tla yakaj kineki nouikas ken on tlajtlakolejkej nouikaj, yejua xkitlajsojtla Dios toTajtsin,

¹⁶ pampa nochi tlen techmaka in tlaltikpaktli xualeua itech toTajtsin, yej nikan kisa ipan in tlaltikpaktli. On xkuajli eleuilistli* yejuan tonakayo kipiya, niman on tlen xkuajli yejuan tikixpakaitaj, niman nochi on tlajtlamach* tlen tikpiyaj yejuan kichiua para yejua ika ma titoueyimatikan, xkisa itech toTajtsin, yej kisa ipan in tlaltikpaktli.

¹⁷ Niman in tlaltikpaktli ye tlantiu iuan nochi on tlen xkuajli ipan onkaj yejuan on tlakamej keleuiyaj. Pero on yejuan kichiuas tlen Dios kineki nemis para nochipa.

Ye uajlauij on yejuan kinekij kixoxotoniskej itekiu Cristo

¹⁸ Notlajsojkakoneuan, yoyejkok on sa ika nochi tiempo. Nemejuamej ye nenkakinij ika ipan on sa ika nochi tiempo uajlas sen tlakatl yejuan kinekiskixoxotonilis itekiu Cristo. Aman tej, miyekej nemij yejuan kinekij kixoxotoniskej itekiu Cristo. Yejua ika, tikmatstokej ika in sa ika nochi tiempo.

¹⁹ Yejuamej totsajlan okiskej, pero ika tlen melauak xnejli tokniuan. Tla tokniuan yeskiaj, nokauaskiaj touan. Pero yejuamej okiskej totsajlan para onoteititijkej ika yejuamej xtokniuan.

²⁰ Pero Cristo yejuan yolchipauak omechmakak iEspíritu Santo. Yejua ika, nenmochimej nenkimatij on tlen melauak.

²¹ Nemechtlajkuiluiya xpampa tla xnenkixmatij on tlen melauak, yej nemechtlajkuiluiya pampa nenkixmatij. Niman nenkimatstokej ika itech on tlen melauak xueli no ompa kisa on tlen xmelauak.

²² ¿Akinon tlakajkayajketl? Kuajli tikmatstokej ika tlakajkayajketl on yejuan kijtoua ika Jesús xejua Cristo on yejuan Dios okitlapejpenij para techmandaros. On tlakajkayajketl, yej kineki kixoxotonilis itekiu Cristo, pampa kijtoua ika Dios xejua toTajtsin niman ika Jesús xejua iKonetsin.

²³ On yejuan kijtoua ika Jesús xejua Cristo yejuan iKonetsin toTajtsin Dios, xnouika iuan toTajtsin. Pero on yejuan kijtoua ika Jesús melauak Cristo yejuan iKonetsin toTajtsin Dios, yejua nouika iuan toTajtsin.

²⁴ Yejua ika, xkejeuakan ipan nemoyojlo on temachtijli yejuan omechmachtijkej desde onenkineltokakej Cristo. Tla on temachtijli nokaua ipan nemoyojlo, nemejuamej nemokauaskej iuan Cristo on iKonetsin Dios, niman iuan toTajtsin Dios.

²⁵ Niman JesuCristo okitlalij ipan ipromesa ika techmakas yenkuik nemilistli para nochipa.

²⁶ Yonemechtlajkuiluij de on yejuan kinekij mechkajkayauaskej.

²⁷ Pero on Espíritu Santo, yejuan JesuCristo omechmakak, nokaua ipan nemoyojlo. Yejua ika, xpoliui para yakaj mechmachtis, pampa iEspíritu Dios mechmachtia nochi tlajtlamach* tlen melauak. Itemachtil melauak, niman xkaman mechmachtis on tlen xmelauak. Yejua ika tej, nochipa san sekan iuan Cristo xnemikan, ijkon ken mechmachtia on Espíritu Santo.

²⁸ Aman tej, notlajsojkakoneuan, nochipa xnemikan san sekan iuan Cristo, para xnempinauaskej niman xnenmojmotiskej ijkuak yejua uajlas.

²⁹ Nemejuamej ye nenkimatstokej ika Dios yejua yolmelajki. Yejua ika, nenkimatij ika nochimej on yejuan kichiuaj on tlen kuajli yejuamej tekoneuan itech Dios.