1 Juan 1 - El Nuevo Testamento

In Tlajtojli yejua techmaka nemilistli

¹ Temechtlajkuiluiyaj de iTlajtoltsin Dios yejuan techmaka yenkuik nemilistli para nochipa. In iTlajtoltsin Dios sano yejua JesuCristo, niman yejua ye nemiya ijkuak nochi opeu. Yejua otikakej ken otlajtlajtoj, otikitakej ikan tixtololojuan niman okikmatokakej ikan tomauan.

² JesuCristo yejua nemilistli. Yejua onopantlantij niman tejuamej otikitakej. Aman temechmachistiaj ika melauak otikitakej. Yejua nemilistli yejuan para nochipa. In nemilistli onkatka itech toTajtsin, niman aman sano yejua onopanextij totech.

³ Temechijliaj tej, on tlen otikitakej niman otikakkej, para nemejuamej san sekan touan xnemikan, ijkon ken tejuamej tinemij san sekan iuan Dios toTajtsin niman iuan iKonetsin JesuCristo.

⁴ No ijki temechtlajkuiluiyaj in tlajtlamach* para topakilis ma ajsitia.

Dios yejua tlauijli

⁵ Sano yejua in temachtijli temechchiliaj yejuan JesuCristo otechmachtij. Otechmachtij ika Dios sano yejua tlauijli pampa yejua yolchipauak niman xonkaj itlaj tlayouajlotl ipan inemilis.

⁶ Tla tikijtouaj ika tinemij san sekan iuan Dios niman sanken* titlajtlakouaj, tla ijkon, xtikijtouaj on tlen melauak niman xtikchiuaj ken noneki.

⁷ Pero tla xtitlajtlakouaj, yej tinemij yolchipajkej ken Dios nemi, tla ijkon tej, san sekan tinemij inuan oksekimej, niman iyesyotsin JesuCristo, yejuan iKonetsin Dios, techchipauilia nochi totlajtlakoluan.

⁸ Tla tikijtouaj xtitlajtlakolejkej, sano tejuamej titokajkayauaj, niman xtikijtouaj on tlen melauak.

⁹ Pero tla titoyolkuitiaj itech Dios, yejua kichiuas on tlen okijtoj. Yejua kiyekchiuas niman techtlapojpoluilis totlajtlakoluan, niman techchipauas de nochi tlen xkuajli.

¹⁰ Dios kijtoua ika nochi tlakatl tlajtlakolej. Yejua ika, tla titoteneuaj xtitlajtlakolejkej, on tlen tikijtouaj sano ijki ken tikijtoskiaj ika Dios sen tlakajkayajketl. Tla ijkon, xnejli tikneltokaj itlajtol.