1 Corintios 9 - El Nuevo Testamento

Pablo okijtoj tlinon kitocaroua kichiuaskej on apóstoles*

¹ Nejua nimakajtikaj niman no niapóstol. Nejua onikitak toTEKO Jesús. Niman nemejuamej onentlaneltokakej ipampa on tekitl yejuan nemotsajlan onikchiu para toTEKO.

² Tla para oksekimej xniapóstol, para nemejuamej kemaj niapóstol, pampa nemejuamej onenkineltokakej toTEKO ijkuak onemechmachtij. On yejua ika nesi ika melauak niapóstol.

³ Aman nemechijlis kenijki ninomanauis intech on yejuan nechixkomakaj* tlajtlamach*.

⁴ Nechmelaua* nikselis on tlen nechmakaj para nikuas niman nikonis ipampa on tekitl yejuan nikchiua.

⁵ Niman tla nikpiyaskia nosiuau yejuan tlaneltoka, no nechmelauaskia nikuikatinemiskia kampa niau ijkon ken kichiuaj on oksekimej apóstoles*, niman ikniuan toTEKO, niman Pedro.

⁶ ¿Nenkinemiliaj ika san nejua niman Bernabé noneki titekitiskej ikan tomauan para sano tejuamej titotekipanoskej chika titemachtiaj?

⁷ Xakaj sano yejua notlaxtlauilia tla tekiti ken soldado. No ijki, on yejuan kitôka uvas kikua on tlakyotl. Niman on yejuan kimpiyaj borregos ueli koni on leche.

⁸ Niman maka xkijtokan ika san niknejnemilia on tlen nemechijlia pampa on itlanauatil Moisés no ijki kijtoua.

⁹ Ijkin tlajkuilolnestikaj ipan on itlanauatil Moisés: “Maka xtentematlayoti on uakax ijkuak kiteinia on trigo.” Dios ijkon okijtoj xsan pampa okinmelnamik on uakaxtin,

¹⁰ yej pampa tejuamej techajmatstikatka. Yejua in tlanauatijli tlajtoua toka tejuamej yejuan tiitlakeualuan toTEKO. Yejua ika tej, on tlakatl yejuan tlaxoponia* niman on yejuan pixka noneki tlamachaskej para kiseliskej on tlakyotl yejuan kintocaroua.

¹¹ Tla tejuamej otiktôkakej* ipan nemoyojlo on tlen yektli tlajtojli, tla ijkon, ¿xno techtocaroua tikpixkaskej nemotsajlan on tlen ika tinemiskej?

¹² Tla oksekimej kinmelaua nemotech kiseliskej on tlen ika notekipanoskej, tejuamej más sanoyej* techmelaua*. Pero tejuamej xtikuij on tlen techmelaua*. Yej oksekneka tikchiuaj. Nochi tikualijyouijtiuij para maka noteltlalis itlaj ika on kuajli tlajtojli de Cristo.

¹³ Nemejuamej kuajli nenkimatstokej ika on yejuan kichiuaj itekiu Dios ipan iueyitiopan on hebreos* kiseliaj intlakual ne itech on tiopan. Niman on yejuan kinuentlaliaj on yolkej ne tlaixpan* no kiseliaj on uentli ken cada se kitocaroua.

¹⁴ No ijki tej, otlanauatij toTEKO, para on yejuan kiteijliaj on kuajli tlajtojli yejuan kiteijlia ken Dios temakixtia kinmelaua kiseliskej tlen kikuaskej ipampa on intekiu.

¹⁵ Pero nejua xkaman nitlajtlani on tlen nechmelaua* nikselis. Nion aman xnemechtlajkuiluiya in para itlaj xnechmakakan. ¡Niknekiskia tej, yej achtoj ma nimiki para xnikpolos on paktli yejuan nikpiya!

¹⁶ Nejua tej, xkitocaroua ninoueyimatis ika nikteijlia on kuajli tlajtojli, pampa on yejua nechtocaroua nikchiuas. ¡Lástima de nejua, tla xnikteijlis on kuajli tlajtojli yejuan kiteijlia ken Dios temakixtia!

¹⁷ Yejua ika, tla nikchiuas pampa nejua oniktlapejpenij, nechtocaroskia nechtlaxtlauiliskiaj. Pero xnikchiua pampa nejua oniktlapejpenij. Yej san nikchiua pampa Dios onechnauatij.

¹⁸ ¿Katlejua tej, notlaxtlauil yejua ika on? Notlaxtlauil san on pakilistli yejuan nikselia ika nikteijlia on kuajli tlajtojli yejuan kiteijlia ken Dios temakixtia maski xniktlani tomin. Niman ijkon xnikui on tlen nechmelaua* nikselis pampa nitekiti ken temachtijketl.

¹⁹ Maski xniesclavo itech yakaj tlakatl, nochi tlakatl itech ninochiua esclavo para más miyekej nikinuikas itech Cristo.

²⁰ Ijkuak ninemi intsajlan on hebreos*, ninochiua ken yejuamej para nikinuikas itech Cristo. In kijtosneki ika ijkuak ninemi intsajlan on yejuan kitlakamatij itlanauatil Moisés, niktlakamati on tlanauatijli maski xnoneki para niktlakamatis. Ijkin nikchiua para nikinuikas itech Cristo on yejuan kitlakamatij on tlanauatijli.

²¹ Ijkuak ninemi intsajlan on yejuan xkipiyaj itlanauatil Moisés, ninouika ken yejuamej para nikinuikas itech Cristo on yejuan xkipiyaj on tlanauatijli. Yejua in xkijtosneki tla xniktlakamati itlanauatil Dios, pampa nejua melauak niktlakamati itlanauatil Cristo.

²² Ijkuak ninemi intsajlan on yejuan xkojtikej ipan intlaneltok, nejua ninochiua ken yejuamej para nikimpaleuis más ipan intlaneltok. Yejua ika, nenkitaj ika ninouika ken cada se nouika para ijkon maski sa kenijki uelis semej nomakixtiskej.

²³ Niman nochi on nikchiua para on kuajli tlajtojli yejuan kiteijlia ken Dios temakixtia ma tekiti ipan inyojlo, niman para ijkon nikselis on tlatiochiualistli yejuan nechtocaroua.

²⁴ Nemejuamej kuajli nenkimatstokej ika ipan sen tlaksalistli* miyekej teuan notlatlanij, pero san se tetlani niman kiselia on premio. Nemejuamej no ijki xmotlatlanikan ixpan Dios, niman xmotlalokan para nenkitlaniskej on premio yejuan Dios kineki mechmakas.

²⁵ Nochimej yejuan teuan notlatlanij ipan se tlaksalistli*, kejeuaj intlalnakayo para tlaxikoskej. Yejuamej ijkon kichiuaj para tetlanij niman kiseliaj ken intetlayokolil sen kuaxochitl tlachijchijtli ikan xojtli. Yejuamej kiseliaj on kuaxochitl yejuan xuejkaui onkaj, pero tejuamej titotlatlanij para tikseliskej sen premio yejuan nochipa onyas.

²⁶ Yejua ika tej, ipan notlaksalis ixpan Dios, xsa kanika nikonmelaua, nion xnikchiua ken kichiua sen tlauijsoketl yejuan san ipan ajakatl tlauijsoki.

²⁷ Notlalnakayo nicastigaroua ken noneki para nechtlakamati. Ijkon nikchiua para xnechkixtiskej ipan on tlaksalistli* niman ijkon xnikpolos nopremio ijkuak yotlan nikteijlia on itlajtoltsin Dios.