1 Corintios 8 - El Nuevo Testamento

Pablo tetlakanonotsa ika on tlakuajli yejuan yokiuentlalijkaj intech on ídolos

¹ Aman nemechnankilis on tlinon onennechtlatoltijkaj de on tla uelis nokuas on tlakuajli yejuan yokiuentlalijkaj intech on ídolos. Melauak tejuamej tikmatij ika yotikajsikamatkej ika on tlakuajli. Pero ijkuak sen tlakatl kinemilia ika kuajli kajsikamati, on kajsikamatilistli kichiua para ika noueyimati, pero on tetlajsojtlalistli* techmelajkatlalia ipan totlaneltok.

² Tla yakaj kinemilia achi ye kajsikamati tlajtlamach*, kijtosneki ika sanken* xkajsikamati ken noneki.

³ Pero tla yakaj kitlajsojtla* Dios, Dios kuajli kixmatstikaj.

⁴ Yejua ika tej, de on tlakuajli yejuan yokiuentlalijkaj intech on ídolos, tikmatstokej ika nion se xonkaj noso xnemi yejuan melauak dios de on ídolos. Niman no tikmatstokej ika san se Dios nemi.

⁵ Maski onyaskiaj ne ipan cielo* noso ipan in tlaltikpaktli on tlajtlamach* yejuan noteneuaskiaj dioses, niman maski onyaskiaj miyekej in dioses niman tekomej,

⁶ para tejuamej san se Dios tikpiyaj. Yejua toTajtsin yejuan okitlalij nochi tlajtlamach*, niman tejuamej tinemij para yejua. Niman no san se toTEKO tikpiya, niman on toTEKO yejua JesuCristo. Yejua itechkopa onotlalij nochi tlajtlamach* niman itechkopa tinemij.

⁷ Pero in xnochimej tokniuan kimatij. Sekimej yejuan ijki nouikayaj kinueyiliayaj on ídolos, hasta aman kinemiliaj ika kinueyiliaj ijkuak kikuaj on tlakuajli. Yejua ika, ijkuak kikuaj on tlakuajli, kijtlakouaj intlamachilis pampa xe kojtikej ipan intlaneltok.

⁸ On tlen tikuaj xejua techpatla iuan Dios. Xitlaj ika techpaleuis tla tikuaskej, nion xitlaj* tikpoloskej tla xtikuaskej.

⁹ Maski ueli nenkuaj nochi tlajtlamach*, xpiyakan cuidado para maka nenkitlajkaliskej ipan tlajtlakojli yakaj yejuan xkojtik ipan itlaneltok.

¹⁰ In sen ejemplo. Tejua timoteneua ika nochi tikmati de on tlakuajli. ¿Tlinon nochiuas tej, tla yakaj tokniu yejuan xkojtik ipan itlaneltok mitsitas titlakuas ne ijtik on tiopan kampa onokej on ídolos, niman no noyoleuas kikuas on tlakuajli yejuan yokiuentlalijkej?

¹¹ Tla ijkon tej, mokniu yejuan xkojtik ipan itlaneltok poliuis san ipampa on tlen timoteneua tikmati. Xkelnamiki ika Cristo no ipampa omik.

¹² Ijkuak ijkon titlajtlakoua itech sen tokniu, niman tiktlamachilispoloua, tejua no titlajtlakoua itech Cristo.

¹³ Yejua ika tej, tla niktlajkalis ipan tlajtlakojli sen nokniu ipampa on tlen nikua, xkaman oksejpa nikuas nakatl para maka niktlajkalis ipan tlajtlakojli.