1 Corintios 7 - El Nuevo Testamento

Pablo tetlakanonotsa kenijki noneki nemiskej yejuan nonamiktiaj

¹ Aman nemechnankilia yejua ika on tlen tlajtlamach* onennechtlajtoltijkej ipan nemotlajkuilolamau. Melauak kuajli yeskia para sen tlakatl xnonamiktiskia.

² Pero pampa miyekej san auilnemij, más kuajli para cada tlakatl kipiyas isiuau, niman cada siuatl kipiyas iueuentsin.

³ On teueuentsin noneki kimaktilis isiuau nochi tlen noneki kiselis. Niman on tesiuau no ijki noneki kimaktilis iueuentsin nochi tlen noneki kiselis.

⁴ Ijkuak on siuatl nonamiktia, xok yejua iyaxka* itlalnakayo, yej kimaktilia iueuentsin. Sano ijki tej, on tlakatl ijkuak nonamiktia, xok yejua iyaxka* itlalnakayo, yej kimaktilia on isiuau.

⁵ Maka xmonenekikan* san sekan nenkochiskej. Pero tla saman nenkitlapejpeniyaj nemoxeloskej se tiempo para san ika nemokauaskej nenkichiuaskej oración, uelis para nemonenekiskej tla achtoj san se nemoyojlo yonenkitlalijkej. Pero tla yotlan nenkichiuaj oración, más kuajli para oksejpa nemouikaskej ken kitocaroua nemij on yejuan yononamiktijkej. Ijkon xchiuakan para maka itlaj ika mechtlajkalis Satanás ipan tlajtlakojli.

⁶ On tlen yonemechtlajkuiluij xkijtosneki ika nemechnauatia mero ijki xchiuakan, yej san nemechijlia.

⁷ Sano nejua niknekiskia para maka xmonamiktikan ken nejua xninonamiktia, pero tinochimej tichichikomej. Sekimej Dios okintlayokolij insiuau noso inueuentsin, niman oksekimej okintlayokolij impakilis maski xnonamiktiaj.

⁸ Aman nemechnotsa nemejuamej yejuan xnemonamiktiaj niman nemejuamej yejuan nenkakaualtsitsimej. Nemechijlia ika más kuajli yeskia tla no ijki nemokauaskiaj ken nejua.

⁹ Pero tla xueli nemoteltlaliaj, xmonamiktikan, pampa más kuajli nemonamiktiskej xken nenkipiyaskej eleuilistli* hasta kampa xok ueli.

¹⁰ Aman nikpiya sen tlanauatijli para on yejuan yononamiktijkej. In xejua notlanauatil, yej itlanauatil toTEKO. On tlanauatijli sano yejua in. On siuatl maka ma nokakaua noso ma noxotoni iuan iueuentsin.

¹¹ Pero tla sen siuatl nokakaua noso noxotonia* iuan iueuentsin, maka ma nonamikti iuan okse tlakatl, noso tla, ueli ma noyoltlali iuan iueuentsin. Niman no ijki on tlakatl maka ma nokakaua noso ma noxotoni iuan isiuau.

¹² Niman para on oksekimej nikinnauatia, xikan itlajtol toTEKO, yej ikan notlajtol, ika tla sen tokniu kipiya isiuau yejuan xkineltoka Cristo, niman on siuatl maski ijkon paki para iuan chanti, maka ma kaua noso maka ma noxotoni iuan.

¹³ Niman tla yej, yejua on tokniu siuatl kipiya iueuentsin yejuan xtlaneltoka, niman on tlakatl maski ijkon paki para iuan chanti, maka ma nokaua noso ma noxotoni iuan.

¹⁴ Ijkon ma kichiua, pampa sen tlakatl yejuan xkineltoka Cristo kiselia sen tlatiochiualistli itech Dios pampa isiuau kineltoka Cristo. Niman no ijki sen siuatl yejuan xtlaneltoka kiselia sen tlatiochiualistli pampa iueuentsin tlaneltoka. Tla xijkon yeskia, inkoneuan xueliskiaj kiseliskiaj itlatiochiualis Dios, pero aman kiseliaj.

¹⁵ Pero tla on teueuentsin noso on tesiuau yejuan xtlaneltoka yejua kineki tekauas noso noxotonis, ma kichiua. Ijkon tej, on tokniu tlakatl noso on tokniu siuatl nokauas tlamakajtli, pampa Dios otechnots para tinemiskej ikan yolseuilistli.

¹⁶ Siuatl, tejua xtikmati, pero kas moueuentsin uelis nomakixtis san mopampa. Noso tejua tlakatl, tejua xtikmati, pero kas mosiuau uelis nomakixtis san mopampa.

Noneki tinemiskej ken Dios otechnots

¹⁷ Cada se ma nouika ken toTEKO okitlalij ipan itekiu, niman ma nemi ken nemiya ijkuak opeu kineltoka Cristo. Yejua in nitlanauatia ipan nochimej on tiopanmej.

¹⁸ In se ejemplo. Tla yakaj ye kipiyaya on neskayotl ipan inakayo itoka circuncisión* ijkuak opeu kineltoka Cristo, ijki ma nokaua. Niman tla yakaj xkipiyaya on neskayotl ijkuak opeu kineltoka Cristo, ijki ma nokaua

¹⁹ pampa xitlaj* kijtosneki tla tikpiyas circuncisión noso ka. Yej ueyi kijtosneki tla tiktlakamatis itlanauatiluan Dios.

²⁰ Cada se noneki nemis ken nemiya ijkuak opeu kineltoka Cristo.

²¹ Tla yakaj esclavo katka ijkuak okineltokak Cristo, maka ma nopajsolo yejua ika on. Pero tla yejua kita ika uelis kimakauaskej, ma kichiua kanika para xok esclavo yes.

²² Kuajli para ijkon kichiuas, pampa ijkuak sen esclavo kineltoka Cristo, nokaua tlamakajtli itech ipoder on tlajtlakojli. Sano ijki, on tlakatl yejuan xesclavo katka itech sen tlakatl, nokuepa iesclavo Cristo ijkuak peua kineltoka.

²³ Sanoyej patioj omechkou Cristo. Yejua ika maka xmokauilikan mechpiyakan esclavos on tlakamej.

²⁴ Ijkon tej, nokniuan, cada se de nemejuamej xnemikan ken nemiya ijkuak onenpejkej nenkineltokaj Cristo, niman xmouikakan iuan Dios.

Pablo kintlakanonotsa on yejuan xteuan nemij niman on kakaualtin

²⁵ Aman nemechnotsa nemejuamej siuamej yejuan xe nonamiktiaj. ToTEKO xokijtoj tlinon kuajli para nenkichiuaskej, yej nemechijlia tlen nejua niknemilia. Niman niknemilia ika nechmelaua* nenkitlaliskej nemoyojlo notech ipampa on iueyitetlajsotlalis yejuan toTEKO yonechmakak.

²⁶ Nejua niknemilia ika sen tlakatl noso sen siuatl más kuajli nokauas ken aman nemi. Ijkin niknemilia ipampa on xkuajli tiempo yejuan tikpanouaj.

²⁷ Tla yotimonamiktij, maka teuan timokauas. Niman tla xe timonamiktia, maka xnemili timonamiktis.

²⁸ Pero tla sen tlakatl nonamiktia, xtlajtlakoua. Niman tla sen ichpochtli nonamiktia, no xtlajtlakoua. Pero on yejuan nonamiktiaj tlajtlamach* kimpajsoloua ipan in nemilistli, niman nejua niknekiskia maka ma pajsolouilistli.

²⁹ Nokniuan, tlinon nejua nikijtosneki sano yejua in: xok tikpiyaj miyek tiempo. Yejua ika, ipan in keski tonaltin, on yejuan yononamiktijkej ma nemikan ken xnonamiktiskiaj para ma kichiuakan itekiu toTEKO.

³⁰ On yejuan najmanaj, ma nemikan ken xnajmanaskiaj, niman on yejuan pakij, ma nemikan ken xpakiskiaj, niman on yejuan tlakouaj, ma nemikan ken xinyaxka* yeskia on tlen kikouaj.

³¹ On tlakamej yejuan kinyoltilana niman kinpaktia on tlajtlamach* yejuan kisa ipan in tlaltikpaktli, xkitocaroua ika nopaktiskej on tlajtlamach*, pampa on nochi san panos niman tlamis.

³² Niknekiskia para maka xkonmatstiakan on tlajtlamach* yejuan onkaj ipan in tlaltikpaktli. On yejuan xsiuauaj notekimaka ika on tlajtlamach* ipan itekiu toTEKO pampa yejua kineki kipaktis.

³³ Pero on yejuan siuauaj, notekimaka ika on tlajtlamach* yejuan onkaj ipan in tlaltikpaktli pampa yejua kineki kipaktis isiuau.

³⁴ No ijki ipan nochiua sen siuatl yejuan yononamiktij niman se yejuan ichpochtli. On yejuan ichpochtli notekimaka ika on tlajtlamach* ipan itekiu toTEKO para ijki yejyejtikaj itech Dios sanken* ikan itlalnakayo niman ialma. Pero on siuatl yejuan teuan nemi, notekimaka ika on tlajtlamach* yejuan onkaj ipan in tlaltikpaktli para kipaktia iueuentsin.

³⁵ Yejua in tlen nikijtoua, nikijtoua para nemechpaleuis, xpara yej nemechteltis de nemonamiktiskej. Niknekiskia xnemikan kuajli, niman xmotemakakan ikan nochi nemoyojlo ipan itekiu toTEKO.

³⁶ Pero tla yakaj tajtli kinemilia ika más kuajli para ichpoch ma nonamikti pampa ye ichpochlamajtsintitiu niman kita ika más kuajli para nonamiktis, ma kichiua on tajtli ken yejua kinekis. Uelis nonamiktis; on xtlajtlakojli.

³⁷ Pero tla okse tajtli ikan nochi iyojlo niman xpampa noneki kichiuas, yej iselti kinemilia ika kuajli niman kisetlalia ipan iyojlo para kejeuas ichpoch nochipa iselti, kuajli kichiua.

³⁸ Ijkon tej, on yejuan kinamiktia ichpoch kuajli kichiua, pero on yejuan xkinamiktia ichpoch más kuajli kichiua.

³⁹ On siuatl yejuan teuan nemi, nemi ken salijtikaj ika on tlanauatijli iuan iueuentsin chika on iueuentsin nemi. Pero tla on iueuentsin yomik, yejua uelis oksejpa nonamiktis iuan san akinon yejua kinekis. Pero tla nonamiktis, ma kichiua iuan se yejuan kineltoka toTEKO.

⁴⁰ Pero niknemilia ika más nemiskia ikan paktli, tla xok nonamiktiskia. Niman no niknemilia ika iEspíritu Dios onechmakak tetlakanonotsalistli yejuan yonemechmakak.