1 Corintios 6 - El Nuevo Testamento

On tlaneltokakej xkintocaroua noteixpanuiskej intech on tekiuajkej yejuan xtlaneltokaj

¹ Ijkuak semej nemejuamej nenkipiyaj tlinon ika nenkiteixpanuiyaj yakaj sen tokniu, ¿hasta tline* konteixpanuiyaj intech on tekiuajkej yejuan xtlaneltokaj niman xintech on yolchipajkej itech Dios?

² ¿Tlen xnenkimatij ika nemejuamej yejuan nenyolchipajkej itech Dios nenkintlajtlakolmakaskej on tlaltikpaktlakamej? Niman tla ijkon nenkichiuaskej, ¿nion on tlajtlamach* yejuan xmás ueyi kijtosneki xueli nekixtlalouaj?

³ ¿Noso ka yej xnenkimatij ika hasta on ángeles tikintlajtlakolmakaskej? Tla tejuamej tikintlajtlakolmakaskej on ángeles, tla ijkon, más uelis tikintlajtlakolmakaskej on tlakamej yejuan kichiuaj xkuajli ipan in nemilistli.

⁴ Tla ipan nemonemilis nenkipiyaj tlinon ika nenkiteixpanuiskej yakaj okse tokniu, ¿tline nenkonteixpanuiyaj intech on jueces yejuan xtlaneltokaj?

⁵ In kemaj nikijtoua para achi ma mechpinajti. ¿Tlen nemotsajlan xnemi nion se tlamatki* yejuan kimatis kenijki kixtlalos niman kinyektlalis nemokniuan?

⁶ ¿Tlen noneki para sen tokniu kiteixpanuis yakaj okse intech on jueces yejuan xtlaneltokaj? ¡Nemechijlia tej, ika ka!

⁷ San pampa ijkon nemoteixpanuijtokej, nenkiteititijtokej ika sanenkaj nentlaneltokaj. Más kuajli nenkijyouiskej ijkuak xkuajli tlen mechchiuiliaj. Más kuajli nenkimokauiliskej ma mechkuilikan itlaj.

⁸ Pero nemejuamej xijki nenkichiuaj. Yej xkuajli tlen nenkitechiuiliaj niman nentetlachtekiliaj, hasta on nemokniuan itech Cristo ijki nenkinchiuiliaj.

⁹ ¿Tlen xnenkimatij ika on xkuajkualtin tlakamej xuelis kalakiskej ne kampa Dios tlamandaroua? Maka xmokajkayauakan, yej kuajli xmatikan ika on yejuan auilnemij, noso on yejuan kinyekteneuaj ídolos, xkalakiskej ne kampa Dios tlamandaroua. No xkalakiskej on yejuan siuapapatlaj, noso tlakapapatlaj, noso on siuamej yejuan keleuiyaj sano siuamej, noso on tlakamej yejuan keleuiyaj sano tlakamej.

¹⁰ Niman no xkalakiskej kampa Dios tlamandaroua on yejuan tlachtekij, yejuan sanoyej* tlajtlamach* kinoyaxkatisnekij, yejuan tlauanij, yejuan tetejteneuaj, niman on yejuan tlaixpachouaj.

¹¹ Sekimej nemejuamej nenkichiuayaj on ken on tlajtlakojli. Pero itechkopa toTEKO JesuCristo, niman itechkopa on iEspíritu toDios, yomechyolchipajkej niman nenmejejtokej itech Dios, niman sano Dios yokijtoj ika nochi nemotlajtlakoluan yokintlapojpoluij.

Itlalnakayo sen tlakatl yejua itiopan on Espíritu Santo

¹² Ijkin kijtoua sen tlajtojli: “Nochi tlen niknekis, uelis nikchiuas.” On melauak, pero xnochi tlen uelis nikchiuas uelis nechpaleuis ika on tlen kuajli. Maski uelis nikijtos: “Nochi tlen niknekis uelis nikchiuas”, pero nejua xitlaj* niknokauilis ma nechchiualti para nikchiuas on tlen xkuajli.

¹³ Niman okse tlajtojli ijkin kijtoua: “On tlakuajli onkaj para kalaki ipan teijti, niman on teijtl* onkaj para on tlakuajli.” On melauak, pero yejkos sen tonajli ijkuak xok onyas tlakuajli nion teijti pampa Dios ijki kichiuas. Pero on totlalnakayo xonkaj para auilnemilistli. Yej tikpiyaj totlalnakayo para tikchiuaskej on tlen toTEKO kineki, niman toTEKO nemi para kejeuas totlalnakayo.

¹⁴ Niman ijkon ken Dios ikan ipoder okiyoliuitij* niman okuiteu Cristo ne ipan itlalkon, no ijki kichiuas touan.

¹⁵ ¿Tlen xnenkimatij ika nemotlalnakayo yejua se parte de itlalnakayo Cristo? Tla ijkon, ¿niktlalis in notlalnakayo yejuan se parte itlalnakayo Cristo san sekan iuan itlalnakayo sen siuatl yejuan auilnemi? ¡Melauak tej ika ka, xkaman!

¹⁶ ¿Tlen xnenkimatij nemejuamej ika ijkuak sen tlakatl nosentlalia iuan sen siuaauilnenketl, yejuamej san se uajnochiuaj? In Yektlajkuilojli ijkin kijtoua: “On omemej san se tlalnakayotl uajnochiua.”

¹⁷ Pero ijkuak sen tlakatl nosentlalia san sekan iuan toTEKO, san se espíritu uajnochiuaj.

¹⁸ Xtlalkauikan tej, on auilnemilistli. Xonkaj okse tlajtlakojli yejuan kijtlakoua itlalnakayo sen tlakatl xken on tlajtlakojli.

¹⁹ ¿Tlen xnenkimatij ika nemotlalnakayo yejua itiopan on Espíritu Santo? Yejua in Espíritu, Dios omechmakak, niman yejua chanti nemopan. Ijkon tej, nemotlalnakayo xnemoyaxka.

²⁰ Dios sanoyej patioj omechkou. Yejua ika, xtlakaitakan Dios ikan nemotlalnakayo, niman ikan nemoalma, pampa in ometipan yejua iyaxka* Dios.