1 Corintios 4 - El Nuevo Testamento

On tlaneltokakej noneki nouikaskej ipan iejemplo Pablo

¹ Nemejuamej noneki nentechpiyaskej ken itekitkauan Cristo, yejuan tikpiyaj on tekitl para tiktemachtiaj on tlen Dios kichtakapiyaya.

² Aman tej, on tlen más noneki para itech sen tekitketl sano yejua in, ma kuajli kitlakamati nochi itlanauatiluan on iteko.

³ Xmás nikneki nikmatis kenijki nemejuamej niman on uejueyixtokej ipan in tlaltikpaktli nechixtlaloskej ika on tlen nikchiua niman nitemachtia. Nion nejua xnoka ninixtlalojtikaj.

⁴ Notlamachilis xnechtlajtlakolmaka. Pero yejua in xkijtosneki ika xnikpiya tlajtlakojli. ToTEKO yejua nechtlajtlakolmakas tla nikpiya tlajtlakojli.

⁵ Yejua ika tej, maka yakaj xtlajtlakolmakakan itlaj ika ijkuak xe yejko on tonajli ijkuak uajlas toTEKO. Ipan on tonajli yejua kipanextis nochi on yejuan iyantikaj, niman kiteititis ken cada se kinemilia ipan iyojlo. Niman ijkuakon Dios kiyekteneuas cada se ken noneki.

⁶ Nokniuan, in tlen nemechijlia, nemechijlia para mechpaleuis. Ninoteneua iuan Apolos ken ejemplo para itechkopa toejemplo nenkimatiskej ken noneki nemouikaskej ijkon ken on Yektlajkuilojli temachtia. Niman tla nemouikaskej ken on Yektlajkuilojli temachtia, xnemoueyimatiskej, niman ijkon xnenkinchikoitaskej sen temachtijketl iuan okse.

⁷ Maka xnemili tla Dios omitstlalij más tiueyixtikaj xken on oksekimej. ¿Itlaj tikpiya yejuan xDios omitsmakak? ¡Ka, xitlaj*! Yej nochi tlen tikpiya Dios omitsmakak. Tla ijkon tej, ¿tline timoueyimati ika on tlen tikpiya ken sano tejua motech kisaskia?

⁸ Nenkinemiliaj ika xmechpoloua itlaj tlatiochiualistli niman ika nenkimopiyaliaj miyek ixpan Dios. Niman maski xkaman otitouikakej ken reyes, nemejuamej nemouikaj ken nenreyes yeskiaj. Niknekiskia melauak nenreyes yeskiaj, para tla ijkon, tejuamej no titekiuajkej yeskiaj nemouan.

⁹ Nejua niknemilia ika tejuamej yejuan tiapóstoles* Dios otechkau hasta tlakuitlapan, ken on yejuan yokintlauelkajkej ipan mikilistli, niman ika tlakajti ken on yejuan tetlamauisoltiaj imixpan on tlakamej niman on ángeles.

¹⁰ On tlaltikpaktlakamej kinemiliaj ika semi xtitlamatkej* pampa tiktlakamatij Cristo, niman nemejuamej nenkinemiliaj ika sanoyej* nentlamatkej*. On tlaltikpaktlakamej kinemiliaj ika xtitlajtlajtouaj ikan tekiuajyotl, niman nemejuamej nenkinemiliaj ika nentlajtlajtouaj ikan ueyi tekiuajyotl. On tlaltikpaktlakamej xtechtenkakij, yej nemejuamej mechtlakaitaj.

¹¹ Hasta aman titlajyouiyaj ikan apistli niman amiktli, niman techpoloua totlaken. On tlakamej sanoyej techtlajyouiltiaj niman xtikpiyaj tochan ipan in tlaltikpaktli.

¹² Tisiauij sanoyej ika titekitij ikan tomauan. Ijkuak techuijuikaltiaj, tiktlajtlaniliaj Dios ma kintiochiua on yejuan techuijuikaltiaj. Niman ijkuak techtlauelitaj niman techtlajyouiltiaj, tejuamej tikimijyouiyaj.

¹³ Ijkuak techteneuiliaj on tlen xkuajli, tikinnankiliaj ika tlajtojli yejuan yemanki. Hasta ipan in tonajli techpiyaj ken tlajsojli niman ken itlaj tentlakauijli.

¹⁴ Nejua nemechtlajkuiluiya in tlajtlamach* xpara nemechpinajtia, yej para nemechtlakanonotsa, pampa nennotlajsojkakoneuan.

¹⁵ Maski nenkipiyaskiaj kanaj majtlaktli mil temachtijkej yejuan mechmachtiskiaj ikan itemachtil Cristo, xnenkipiyaskiaj miyek tajtli. Nejua oninochiu ken nemotataj, ijkuak onemechijlij on kuajli tlajtojli yejuan kiteijlia ken Dios temakixtia.

¹⁶ Yejua ika tej, nemechtlachikauilia xmouikakan ken ninouika.

¹⁷ Niman nemechtitlanilia Timoteo para mechpaleuis nenkelnamikiskej ken ninouika. Yejua ken notlajsojkakoneu itech toTEKO niman nochipa kichiua ken kitocaroua para toTEKO. Yejua mechelnamiktis kenijki nikyekana nonemilis iuan Cristo, no ijki ken nitemachtia nochiuiyan kampa niau ipan nochimej on tiopanmej.

¹⁸ Sekimej nemejuamej noueyimatij, pampa kinemiliaj xkaman nias nemechonnotsas.

¹⁹ Pero saniman nias nemechontas tla toTEKO kineki. Ijkuakon nikitas tla on noueyimatkej melauak kipiyaj poder noso san tlajtlajtouaj.

²⁰ Kampa Dios tlamandaroua onkaj xsan tlajtoltin, yej no onkaj poder.

²¹ ¿Tlinon tej, nenkinekij? Ijkuak nias nemotech, ¿nenkinekij para nemechnotsas ikan notlauel, noso nemechnotsas ikan tetlajsojtlalistli* niman yolyemanilistli?