1 Corintios 3 - El Nuevo Testamento

Tejuamej tiitekipanojkauan Dios

¹ Nokniuan, xouel onemechnots ken nikinnotsa on yejuan yochikajkej ipan intlaneltok, yej onemechnots ken on yejuan kichiuaj on tlen inxkuajli eleuilis* kineki, niman ken nenselikakokonej* itech Cristo.

² Onemechmachtij on temachtijli yejuan xtepopoloj, pampa nemejuamej ken nenselikakokonej* yejuan xe uelij tlakuaj, yej sanken* chichij*. Niman hasta aman nenkiteititiaj ika xueli nenkajsikamatij on temachtijli yejuan más ouijtikaj*

³ pampa sanken* nenkichiuaj on tlen xkuajli nemotlalnakayo kineki ken on tlaltikpaktlakamej kichiuaj. Tla nemonexikolitstokej niman nemokualanijtokej niman nemoxexelojtokej, tla ijkon tej, nenkichiuaj on tlen nemotlalnakayo kineki niman nemouikaj ken on oksekimej tlaltikpaktlakamej nouikaj.

⁴ Ijkuak nemotsajlan semej kijtoua: “Nejua ninopoua itech Pablo”, niman okse kijtoua: “Nejua ninopoua itech Apolos”, nemouikaj ken on xkuajli tlaltikpaktlakamej nouikaj.

⁵ ¿Tlinon tej, itekiu Pablo noso Apolos? Tejuamej, san tiitekitkauan Dios yejuan totechkopa onenkineltokakej toTEKO Cristo. Cada se de tejuamej san otikchijkej on tekitl yejuan toTEKO otechmakak.

⁶ Nejua oniktôkak on xinachtli ipan nemoyojlo, niman Apolos okatekij, pero Dios yejua okiskaltij.

⁷ Tla ijkon tej, nion on yejuan kitôka on xinachtli, nion on yejuan katekiya itlaj kijtosneki, yej san Dios ueyi kijtosneki, pampa yejua kiskaltia on tlatoktli.

⁸ On yejuan kitôka on xinachtli niman on yejuan katekiya san nochimej ijkej. Pero Dios kitlaxtlauilis cada se ken kitocaroua ipampa itekiu.

⁹ Apolos niman nejua tiitekipanojkauan Dios, niman nemejuamej sano ijki ken on tlajli yejuan Dios kitekiti. Noso nemejuamej sano ijki ken on kajli yejuan Dios kichijchijtikaj.

¹⁰ Dios ika iteiknelilis* onechkalaktij ken nitlayekanki tepanchijchijketl. Oniktlalij on cimiento* kampa notlalis sen kajli, niman okse tlakatl oketsteu on tepantli ipan on cimiento*. Pero cada se ma kipiya cuidado kenijki kuajli ketsteuas on tepantli.

¹¹ On cimiento* ye onkaj yejuan sano yejua JesuCristo, niman xakaj uelis okse kitlalis.

¹² Ipan on cimiento* sen kalchijketl uelis kiskaltis on tepantli ikan oro, plata noso ikan kualtsitsimej temej. Noso yejua uelis kichijchiuas ikan kojtli*, sakatl noso milouatl.

¹³ Pero ipan on tonajli ijkuak tlatlalpoliuis niman Dios kitlaxtlauilis nochi tlakatl, itekiu cada se nopanextis tla okichiu kuajli noso xkuajli. Ipan on tonajli uajlas tlitl yejuan kitlajtlatas itekiu. Nochi yejuan xkuajli tekitl tlatlas niman nochi yejuan kuajli tekitl kixikos on tlitl.

¹⁴ Tla itekiu sen tlakatl kixikoua on tlitl, Dios kimakas kuajli itlaxtlauil.

¹⁵ Pero tla itekiu sen tlakatl xkixikos on tlitl, yejua kipolos itekiu, maski yejua nomakixtis. Pero yejua nomakixtis ken sen tlakatl yejuan uajkistikisa itlajkotian on tlitl.

¹⁶ ¿Tlen xnenkimatij ika nemejuamej nenitiopan Dios, niman ika iEspíritu Dios chanti ipan nemoyojlo?

¹⁷ Tla yakaj kixoxotonis on itiopan Dios, Dios no kixoxotonis on tlakatl, pampa itiopan Dios yektitikaj, niman on tiopan sano nemejuamej.

¹⁸ Maka yakaj ma nokajkayaua. Tla yakaj kinemilia tlamatki* pampa kipiya tlamatkilistli, yejuan kisa ipan in tlaltikpaktli, ma nokuepa ken on yejuan xtlamatki* itech in tlaltikpaktli, para ijkon melauak kipiyas on tlamatkilistli yejuan kisa itech Dios.

¹⁹ Ma ijkon nokuepa, pampa para Dios on tlamatkilistli yejuan kisa ipan in tlaltikpaktli xitlaj* kijtosneki. Niman in Yektlajkuilojli kijtoua: “Dios kintlajkali on sanoyej* tlamatkej* sano ika on intlakajkayaualis.”

²⁰ Niman in Yektlajkuilojli no kijtoua: “On toTEKO kimatstikaj ika on tlen kinemiliaj on tlamatkej* xitlaj* kijtosneki.”

²¹ Yejua ika, xakaj kitocaroua noueyimatis pampa iuan yau sen temachtijketl yejuan kinemilia ika más ueyi kijtosneki. Dios omechinmakak nochimej on temachtijkej niman nochi on tlajtlamach* para mechpaleuis.

²² Nejua Pablo, Apolos, Pedro, on tlaltikpaktli, on nemilistli, on mikilistli, yejua in tonaltin niman on tonaltin uajlau, Dios okintlalij para mechpaleuis.

²³ Niman nemejuamej no nenteyaxkauan* itech Cristo niman Cristo teyaxka* itech Dios.