1 Corintios 2 - El Nuevo Testamento

Pablo kiteijlia ika Cristo omik ne ipan kojnepanojli*

¹ Nokniuan, ijkuak nemotech oniaj para nemechijlis itemachtil Dios, onikchiu xikan uejueyi tlajtojli, nion onitlajtoj ken se yejuan sanoyej* tlamatki*.

² Ijkuak nemotsajlan ninemiya oniktlalij noyojlo para xitlaj* okse ika más nemechmachtis, yej san de JesuCristo niman ken omik ipan kojnepanojli*.

³ Ijkuak oniaj nemotech, nikmatiya xniyolchikauak, ninomojtiaya niman nimojkakuekuetlakaya.

⁴ Ijkuak onemechnojnots niman onemechmachtij xoniktekitiltij kualtsin tlajtojli, nion tlajtojli yejuan sen tlamatki* kitekitiltia. Yej, onemechnojnots ikan ipoder on Espíritu Santo.

⁵ Ijkon onikchiu para nemotlaneltok ma kistia itech ipoder Dios niman maka itech intlamatkilis* on tlamatkej*.

Dios noteititia itechkopa iEspíritu Santo

⁶ Pero kemaj, tiktekitiltiaj tlamatkilistli* ijkuak titlajtlajtouaj inuan on yejuan más yonoskaltijkej ipan intlaneltok. Pero on tlamatkilistli xipan in tlaltikpaktli kisa, nion xinyaxka* on tekiuajkej ipan in tlaltikpaktli yejuan popoliuiskej.

⁷ Yej, nitlajtlajtoua ika on itlamatkilis* Dios yejuan xakaj okimat ipan okse tiempo. In tlamatkilistli kijtosneki on temakixtilistli yejuan ijkuak in tlaltikpaktli xe onkatka, Dios okitlalij ipan iyojlo para techmakas.

⁸ Nion se yejuan tekiuajketl ipan in tlaltikpaktli kajsikamati itlamatkilis* Dios. Tla kajsikamatiskiaj xkipiloskiaj on toueyiTEKO ipan kojnepanojli*.

⁹ Niman ijkin kijtoua ipan in Yektlajkuilojli: Dios yokinyektlalilij para on yejuan kintlajsojtla* tlajtlamach* on yejuan xkaman yakaj okitak nion okak nion okinemilij.

¹⁰ Pero in tlajtlamach* Dios yotechkauilij ma tikixmatikan itechkopa iEspíritu Santo. On Espíritu Santo kimati nochi. Yejua ueli kajsikamati hasta on tlajtlamach* yejuan más ueyi kijtosnekij itech Dios.

¹¹ Xakaj uelis kimatis kenijki kinemilia sen tlakatl, yej sano yejua on tlakatl kimati ipan itlamachilis. Sano ijki tej, xakaj kimati kenijki kinemilia Dios, yej san on iEspíritu kimati.

¹² Niman tejuamej xotikselijkej on uejueyi tlamatkilistli yejuan on tlaltikpaktlakamej kipiyaj, yej otikselijkej on Espíritu yejuan ualeua itech Dios para yejua ika ueli tikajsikamatij on tlatiochiualistin yejuan Dios yotechmakak.

¹³ Ijkuak tejuamej titemachtiaj ika on tlajtlamach*, tikchiuaj ken iEspíritu Dios techijlia, niman xken kisa ipan totlamatkilis*. Ijkon tej, tikinmachtiaj on yejuan kipiyaj iEspíritu Dios on tlajtlamach* yejuan kisa itech Dios.

¹⁴ On yejuan xkipiya iEspíritu Dios, xkiselia on tlajtlamach* yejuan on Espíritu temachtia pampa para yejua on xitlaj* kijtosneki. Niman xueli kajsikamati on tlajtlamach* pampa on san yejuan kipiya iEspíritu Dios ueli kajsikamati.

¹⁵ On yejuan kipiya iEspíritu Dios nochi tlajtlamach* ueli kimati tla melauak noso xmelauak. Pero yejua xakaj tlakatl yejuan xkipiya iEspíritu Dios uelis kixkomakas*.

¹⁶ In Yektlajkuilojli kijtoua: “¿Akinon kimati on tlen toTEKO kinemilia? ¿Akinon uelis kimachtis Dios?” Pero tejuamej tikpiyaj on Espíritu Santo yejuan techititia tlinon Cristo kinemilia.