1 Corintios 16 - El Nuevo Testamento

On tlaneltokakej de Corinto tlanechikouaj para on mayankej de Jerusalén

¹ Aman nemechnojnotsas de on ofrendas yejuan nenkisentlaliaj para ika nenkimpaleuiskej on yejuan tlaneltokaj itech Dios. Xsentlalikan ijkon ken nejua onitlanauatij ipan on tiopanmej yejuan onokej Galacia.

² Ipan cada domingo cada se ma kixelojtiu seki de on yejuan okitlan. Tla se okitlan achitsin, ma kixelo achitsin, niman tla okitlan ueyi, ma kixelo ueyi. Niman on ofrenda xkejtiakan para maka nenkisentlalijtinemiskej ofrendas ijkuak najsis.

³ Niman ijkuak nejua najsis, nikintitlanis ne Jerusalén on tlakamej yejuan nenkintlapejpeniskej. Nikinmakas tlajkuilolamamej kampa kijtos ika tikintitlanij, niman yejuamej kitkiskej nemoofrendas para on tokniuan yejuan ompa chanejkej.

⁴ Niman tla nesi ika noneki no nias, tla ijkon, nikinuikas.

Pablo kiteijlia tlinon kineki kichiuas

⁵ Ipan nojui nipanos ne ika Macedonia, niman tla yonipanok ompaka, nias ne kampa nemochan.

⁶ Niman kas uelis keski tonajli nemouan ninokauas, noso kas nemouan nikpanos nochi invierno chika seua. Kemaj ueliskej nennechpaleuiskej ikan on tlen noneki para nejua nikajsis nojui.

⁷ Xnikneki ipan in tonaltin nemechnotstikisa san achijtsin ipan nojui, yej nikneki ninokauas keski tonajli nemouan, tla toTEKO kineki.

⁸ Pero ninokauas nikan Éfeso hasta yejkos on iluitl Pentecostés*,

⁹ pampa nikita ika nikan sanoyej* uelis nitekitis niman noskaltis itekiu toTEKO, maski no ijki nikita ika miyekej nemij yejuan nechixnamikij.

¹⁰ Tla nemotech ajsi Timoteo, xchiuakan kanika para nemouan ma paki niman maka itlaj kontematstias, pampa yejua kitekichiuilia toTEKO ijkon ken nejua.

¹¹ No ijki, maka yakaj ma kita ken xitlaj* kijtosneki. Yej xselikan kuajli para ma nomati iyolika nemouan para ma kajsi iojui niman ma uajla notech, pampa yejua nikchixtikaj inuan on oksekimej tokniuan.

¹² Aman nemechijlis de on tokniu Apolos. Keskipa onikijlij para ma mechnotsati iuan on oksekimej tokniuan, pero xkineki yas ipan in tonaltin. Pero yas ijkuak uelis.

Sa ika nochi itlajtol Pablo

¹³ Xtlachixtiakan tej, niman xmelajkanemikan ipan nemotlaneltok. Xmoyolchikauakan niman xpiyakan chikaualistli.

¹⁴ Nochi tlen nenkichiuaskej, xchiuakan ikan tetlajsojtlalistli*.

¹⁵ Nokniuan, nemejuamej nenkimatstokej ika Estéfanas iuan ifamilia achtopa yejuamej opejkej kineltokaj Cristo ipan on ueyitlalpan Acaya. Niman no nenkimatstokej ika aman kimpaleuiyaj on yejuan ikoneuan Dios ikan nochi inyojlo.

¹⁶ Nikneki tej, para nemejuamej xkintlakamatikan on kenomej tokniuan niman nochimej on yejuan tepaleuiyaj niman tekitij ipan itekiu Dios.

¹⁷ Nipaki ika youalajkej Estéfanas, Fortunato niman Acaico. Yejuamej yokichijkej on tlen nemejuamej xueliya nenkichiuaj pampa uejka nennemij.

¹⁸ Yejuamej onechyolpachiuitijkej ken nemejuamej omechyolpachiuitijkej. On tlakamej ken yejuamej kitocaroua kiseliskej totlakaitalis.

¹⁹ On yejuan tlaneltokaj nikan Asia mechtlajpalouaj. Aquila niman Priscila, on isiuau, niman on tlaneltokakej yejuan nosentlaliaj ichan, sanoyej mechtlajpalouaj ikan itokatsin toTEKO.

²⁰ Nochimej tokniuan yejuan nikan nemij mechtlajpalouaj. Xmotlajpalokan inuan oksekimej ikan miyek tetlajsojtlalistli.

²¹ Nejua, Pablo, nikijkuiloua yejua in ikan noma: “Nemechtlajpaloua.”

²² Tla yakaj xkitlajsojtla toTEKO, itlauel Dios ipan ma uajla. ¡Xuajla ToTEKO!

²³ Ma toTEKO JesuCristo mechtiochiua ika iueyitetlajsojtlalis*.

²⁴ Nochimej nemejuamej nemechtitlanilia notetlajsojtlalis ikan itokatsin Cristo Jesús. Ma ijki nochiua.