1 Corintios 15 - El Nuevo Testamento

Cristo oyoliu niman onokuiteu ipan itlalkon

¹ Aman nokniuan, nikneki nemechelnamiktis on kuajli tlajtojli yejuan kiteijlia ken Dios temakixtia yejuan ika onemechnojnots. In kuajli tlajtojli yejuan onenkiselijkej, niman aman ipan nenmelajkanemij.

² Niman yejua itechkopa nenkipiyaj temakixtilistli tla nenkejeuaj in tlen onemechmachtij. Pero tla xnenkejeuaj, tla ijkon, sanenkaj onentlaneltokakej.

³ In yejua más ueyi kijtosneki de on temachtijli yejuan onikselij, niman yejuan onemechmachistij ika Cristo omik san ipampa totlajtlakoluan, ken on Yektlajkuilojli kijtoua.

⁴ Kemaj okitlaltokakej, niman ipan yeyi tonajli oyoliu* niman onokuiteu ipan itlalkon, ijkon ken on Yektlajkuilojli kijtoua.

⁵ Ijkuak yoyoliu*, okinotitij Pedro, niman kemaj on majtlaktli uan omemej apóstoles*.

⁶ Kemaj san sekan okinnotitij más de makuijli ciento tokniuan. Más miyekej sanken* nemij, maski sekimej yomikkej.

⁷ Más sakin* okinotitij Santiago niman kemaj nochimej on apóstoles*.

⁸ Kemaj sa ika nochi onechnotitij nejua, yejuan sa niken on konetsintli yejuan san uetsi.

⁹ Nejua tej, xniueyixtikaj ken on oksekimej apóstoles*, niman nion achijtsin xnechmelaua* nechtokayotiskej apóstol* pampa onikintlauelitak niman onikintlajyouiltij on tlaneltokakej.

¹⁰ Pero aman nejua niapóstol* ipampa iueyitetlajsojtlalis* Dios. Niman on iueyitetlajsojtlalis* xsanenkaj. Yej nejua más sanoyej* yonitekit xken on oksekimej apóstoles*, maski xnejua nitekiti, yej iueyitetlajsojtlalis* Dios tekiti notechkopa.

¹¹ Pero xueyi kijtosneki tla on oksekimej apóstoles* más otemachtijkej, noso yej nejua más onitemachitij. On tlen más ueyi kijtosneki ika tinochimej tikteijliaj sano yejua temachtijli, niman in temachtijli nenkineltokaj.

Tiyoliskej* niman titokuiteuaskej ipan totlalkon ken Cristo

¹² Aman tej, tla titemachtiaj ika Cristo oyoliu* niman onokuiteu ipan itlalkon, ¿tline* semej nemejuamej nenkijtouaj ika xuelis yoliskej* niman nokuiteuaskej on mikatsitsimej?

¹³ Tla on mikatsitsimej xuelis yoliskej* niman nokuiteuaskej, tla ijkon nion Cristo xoyoliu niman xonoketsteu ipan itlalkon.

¹⁴ Niman tla Cristo xoyoliu niman xonokuiteu, on temachtijli yejuan tikteijliaj xitlaj* kijtosneki, niman on tlaneltoktli yejuan nenkipiyaj no xitlaj* kijtosneki.

¹⁵ Niman tla ijkon yeskia, tejuamej yejuan tikteijliaj ika Dios okiyoliuitij* niman okuiteu Cristo ipan itlalkon, nesiskia ika tejuamej san titlakajkayauaj. Tla melauak xyoliskej* on mikatsitsimej, tla ijkon, yejua xnejli okiyoliuitij* Cristo.

¹⁶ Tla melauak xyoliuiskiaj niman xnokuiteuaskiaj on mikatsitsimej, tla ijkon, nion Cristo xoyoliu niman xonokuiteu.

¹⁷ Niman tla Cristo xoyoliu niman xonokuiteu, tla ijkon, nemotlaneltok xitlaj* ika mechpaleuiya niman sanken* nennemij ipan tlajtlakojli.

¹⁸ Niman tla ijkon, on mikatsitsimej yejuan okineltokakej Cristo no ixpolijtokej.

¹⁹ Niman tla totlamachalis* itech Cristo san techpaleuis ipan in nemilistli, tla ijkon, más tixpolijtokej ipan sen ueyi ajmantli xken nochimej on oksekimej tlaltikpaktlakamej.

²⁰ Pero Cristo melauak oyoliu niman onokuiteu ipan itlalkon. Niman yejua yakatstikaj intech on mikatsitsimej yejuan yoliskej* niman nokuiteuaskej ipan intlalkon.

²¹ Ijkon ken ipampa sen tlakatl opeu on mikilistli ipan in tlaltikpaktli, no ijki ipampa sen tlakatl opeu yoliuij on mikatsitsimej.

²² Ijkon ken nochimej mikij pampa tekoneuan itech Adán, no ijki nochimej yejuan tekoneuan itech Cristo oksejpa yoliskej*.

²³ Pero cada se ipan nochiuas ijkuak kitocaros. Achtoj Cristo oyoliu niman onokuiteu ken on uelik yejuan achtoj tlaki. Kemaj ijkuak yejua uajlas, kej yejuamej on yejuan ikoneuan yoliskej* niman nokuiteuaskej.

²⁴ Kemaj, ijkuak yejkos on sa ika nochi tonajli ijkuak Cristo kinxoxotonis on yejuan tlayekankej, on yejuan kipiyaj tekiuajyotl, niman on yejuan kipiyaj poder, yejua kintemakas itech Dios on iTajtsin nochimej in yejuan kinmandaroua.

²⁵ Cristo ika onkaj tlamandaros hasta ijkuak Dios kintlajkalis ikxitlan nochimej on itlauelikniuan niman kitlakamatiskej.

²⁶ Niman on mikilistli, yejuan nochi tlaktl itlauelikniu, yejua sa ika nochi kitlanis Cristo.

²⁷ On Yektlajkuilojli kijtoua: “Dios nochi tlajtlamach* okimaktilij Cristo para kimandaros.” Pero ijkuak kijtoua ika nochi tlajtlamach* okimaktilij, xkijtosneki ika Dios teuan onotemaktilij.

²⁸ Dios okimaktilij Cristo nochi on tlajtlamach* para kimandaros. Ijkuak nochi on tlajtlamach* kitlakamatis Cristo, sano yejua iKoneu Dios notemaktilis itech Dios. Ijkuakon Dios kuajli kimandaros nochi san se ueyi.

²⁹ Tla on mikatsitsimej xyoliskej* niman xnokuiteuaskej, ¿tline tej, sekimej impampa nokuatekiyaj? ¿Tlinon para tej, ijkon kichiuaj tla xkineltokaj ika ipan okse tonajli on mikatsitsimej yoliskej*?

³⁰ Niman tla on mikatsitsimej xyoliskej*, ¿tline tejuamej yejuan tiapóstoles* nochipa san ipampa on techmiktisnekij?

³¹ Nokniuan, nemechmelajkaijlia ika ijkon ken melauak nennechpaktiaj pampa nentlaneltokaj itech Cristo, no melauak ika mojmostla nechmiktisnekij.

³² Nanika ipan in ueyikalpan itoka Éfeso oninoxixikoj inuan on tlakamej ken ninoxixikoskia inuan on temojtijkej yolkej. ¿Tlinon niktlaniskia ika on, tla melauak yeskia ika on mikatsitsimej xyoliskej*? Más kuajli yeskia tla nikchiuaskia ken on tlajtojli kijtoua, yejuan kijtoua: “Ma titlakuakan niman ma titlaonikan, pampa mostla timikiskej.”

³³ Maka xmokauilikan mechkajkayauakan. Onkaj tlajtojli yejuan ijkin kijtoua: “Yejuan iminuan nouika on yejuan xkuajli nouikaj, kijtlakouiliaj ikuajli nemilis.”

³⁴ Xmelajkatlalikan nemotlamachilis niman maka sa xchiuakan tlajtlakojli. Sekimej nemejuamej xnenkixmatij Dios, niman in nikijtoua para xpinauakan.

Ijkin yoliskej* niman nokuiteuaskej on mikatsitsimej ipan intlalkon

³⁵ Pero kas yakaj tetlajtoltis: “¿Kenijki tej, yoliskej* niman nokuiteuaskej on mikatsitsimej? ¿Katlejua on tlalnakayotl kipiyaskej?”

³⁶ Yejuan ijkon kijtoua nesi ken semi xtlamatki*, pampa ijkuak itlaj xinachtli kitôkaj, xkaman ixua niman noskaltia tla xachtopa palani inakayo ijtik on tlajli.

³⁷ Niman ijkuak itlaj tiktôkaj, xtiktôkaj xojtli para yejua ma ixua, yej tiktôkaj on xinachtli de trigo noso itlaj okse.

³⁸ Dios kimaka on xinachtli sen tlakayotl ken yejua kineki. Niman nochi sesekneka xinachtli Dios kimaka itlakayo ken noneki para kipiyas.

³⁹ Niman intlakayo on tlen nemij ipan in tlaltikpaktli nochi seseknekamej. On tlakamej, on uejueyi yolkej, on totomej niman on michimej nochi sesekneka intlakayo.

⁴⁰ No ijki tej, onkaj iluikaknakayomej yejuan onokej iluikak niman tlaltikpaknakayomej yejuan onokej nikan ipan in tlaltikpaktli. Pero on iluikaknakayomej onokej iluikak, no oksekneka kualtsitsimej xken on tlaltikpaknakayomej yejuan onokej nikan ipan in tlaltikpaktli.

⁴¹ Niman no on tonaltsintli, on metstli niman on sitlalimej no oksekneka kualtsitsimej ikan impetlanalis. Niman sano yejuamej on sitlalimej cada se oksekneka kualtsin petlani.

⁴² No ijkin nochiuas ijkuak on mikatsitsimej yoliskej* niman nokuiteuaskej. On tlalnakayotl palani ijkuak kitlaltôkaj, pero ijkuak on tlalnakayotl yoliuis* niman nokuiteuas, xok kaman palanis oksejpa.

⁴³ On tlalnakayotl xok kualtsin ijkuak kitlaltôkaj, pero ijkuak on tlalnakayotl yoliuis* niman nokkiteuas, sanoyej kualtsin yes. Niman on tlalnakayotl xok kojtik ijkuak kitlaltôkaj, pero ijkuak on tlalnakayotl yoliuis* niman nokuiteuas kojtik yes.

⁴⁴ Ijkuak kitlaltôkaj on tlalnakayotl, yejua tlaltikpaknakayotl, pero ijkuak on tlalnakayotl yoliuis* niman nokuiteuas, iluikaknakayotl yes. Tla onkaj on tlaltikpaknakayotl, no onkaj on iluikaknakayotl.

⁴⁵ On Yektlajkuilojli ijkin kijtoua: “On achtoj tlakatl, yejua Adán. Ijkuak Dios okitlalij, okimakak nemilistli.” Pero on sa ika nochi Adán, yejua Cristo. Niman Cristo ikan iEspíritu kitemaka on yenkuik nemilistli para nochipa.

⁴⁶ Xachtoj tikseliaj toiluikaknemilis, yej achtoj tikseliaj totlaltikpaknemilis niman kemaj tikseliaj toiluikaknemilis.

⁴⁷ On achtoj Adán kisa ipan in tlaltikpaktli niman tlachijchijtli ikan tlajli. Yejua okis itech in tlaltikpaktli, niman on sa ika nochi Adán kisa ne iluikak.

⁴⁸ Nochi tlakatl yejuan nemi ipan in tlaltikpaktli, kipiya itlalnakayo ken on achtoj tlakatl Adán okipix yejuan Dios okichijchiu ikan tlajli. Pero on tlakamej yejuan nemiskej ne iluikak kipiyaskej iniluikaknakayo ken Cristo yejuan okis ne iluikak.

⁴⁹ Ijkon ken aman tikpiyaj on tlalnakayotl ken Adán okipix, se tonajli tikpiyaskej toiluikaknakayo ken iiluikaknakayo Cristo.

⁵⁰ Nokniuan nejua in nemechijlia, ika totlalnakayo yejuan tlachijchijtli ikan nakatl, ikan yestli, niman ikan omitl, xuelis kalakis kampa tlamandaroua Dios iluikak chanej. In nemechijlia pampa on totlalnakayo yejuan ueli palani xuelis kalakis ne iluikak kampa onkaj on tlen xkaman palani nion ijtlakaui.

⁵¹ Xkakikan, aman nemechijlia on tlen ichtaka* onkaj. Xtinochimej timikiskej, pero tinochimej techtlalnakayopatlaskej.

⁵² Ijkuak kipitsaskej on sa ika nochi trompeta, tinochimej titotlalnakayopatlaskej san amanamantsin ken ijkuak se iijkopi. Ijkin nochiuas pampa ijkuak on trompeta kipitsaskej, on mikatsitsimej yoliskej* niman nokuiteuaskej ipan intlalkon para xokaman oksejpa mikiskej. Ijkuakon tej, tinochimej titotlalnakayopatlaskej.

⁵³ In tlalnakayotl yejuan xueli uejkaui onkaj, ika onkaj nopatlas ika on iluikaknakayotl yejuan para nochipa onyas. Niman in totlalnakayo yejuan ueli miki, ika onkaj nopatlas ika on iluikaknakayotl yejuan xkaman mikis.

⁵⁴ Ijkuak in tlalnakayotl yejuan xueli uejkaui onkaj yonopatlak ika on iluikaknakayotl yejuan para nochipa onyas, niman ijkuak in tlalnakayotl yejuan ueli miki yonopatlak ika on iluikaknakayotl yejuan xkaman mikis, ijkuakon ye uelis nijtos on tlen ipan in Yektlajkuilojli tlajkuilolnestikaj: “On mikilistli yoxoxoton, aman on tetlanilistli yotetlan.

⁵⁵ ¡Ay mikilistli! ¿Kanon onkaj mopoder para titechmiktis? ¡Ay tlalkontli! ¿Kanon onkaj mopoder para titechtlajyouiltis?”

⁵⁶ On tlakamej mikij ipampa on tlajtlakojli, niman on tlajtlakojli kipiya poder para techmiktia ipampa on itlanauatil Moisés.

⁵⁷ Pero ma tikmakakan tlaxtlauijli Dios, pampa on mikilistli yotiktlankej itechkopa toTEKO JesuCristo.

⁵⁸ Ijkon tej, notlajsojkaikniuan, xmelajkanemikan ipan nemotlaneltok. Maka xkauilikan itlaj ma mechejkuani itech nemotlaneltok. Nochipa xchiuakan itekiu toTEKO ikan nochi nemoyojlo, pampa ye nenkimatstokej ika on tekitl xsanenkaj nenkichiuaskej ijkuak nenkichiuaj san sekan iuan toTEKO.