1 Corintios 14 - El Nuevo Testamento

Pablo kintlakanonotsa on yejuan tlajtlajtouaj ikan yenkuikej tlajtoltin

¹ Yejua ika, xchiuakan kanika para nentetlajsojtlaskej*, niman no xnekikan on tetlayokoliltin yejuan on Espíritu Santo kitemaka. Niman más kuajli xnekikan on tetlayokolijli* yejuan mechueliltis nenkiteijliskej on tiotlajtojli yejuan Dios kitemaka.

² On yejuan tlajtlajtoua ikan seseknekamej yenkuikej tlajtoltin*, xkinnojnotsa on tlakamej, yej san kinojnotsa Dios, pampa on tlakamej xkajsikamatij tlinon kijtoua. On tlen kijtoua, on Espíritu Santo kichiualtia para ma kijito on tlen iyantikaj.

³ Pero on yejuan kiteijlia on yektlajtojli yejuan kiselia itech Dios, kinnojnotsa tlakamej para ijki kimiskaltia ipan intlaneltok, para kinyoleua niman para kinyoltlalia.

⁴ On yejuan tlajtlajtoua ikan sesekneka yenkuikej tlajtoltin sano yejua noskaltia ipan itlaneltok. Pero on yejuan kiteijlia on tiotlajtojli yejuan kiselia itech Dios kimiskaltia ipan intlaneltok nochimej on tlaneltokakej.

⁵ Niknekiskia ika nochimej nemejuamej nenkipiyaskiaj tetlayokolijli* yejuan mechueliltis nentlajtlajtoskej ikan seseneka yenkuikej tlajtoltin. Pero más sanoyej* kuajli yeskia tla nenkipiyaskiaj on tetlayokolijli* yejuan mechueliltiskia nenkiteijliskiaj on tiotlajtojli yejuan nenkiseliaj itech Dios. On yejuan kiteijlia on tiotlajtojli más ueyi kijtosneki xken on yejuan ueli tlajtlajtoua ikan seseneka yenkuikej tlajtoltin. Pero tla se ueli kajsikamati niman kiteijlia on tlen nijtoua ikan on yenkuikej tlajtoltin para on yejuan tlaneltokakej noskaltiaj ipan intlaneltok, no ijki ueyi kijtosneki.

⁶ Yejua ika tej, nokniuan, tla nejua nias nemotech niman nemechnojnotsas ikan seseka tlajtoltin, ¿tlinon ika mechpaleuis on tlen nikijijtos? Xitlaj ika mechpaleuis. Pero tla nias nemotech niman nemechmelajkaijlis on tlen Dios onechijlij, noso nemechmakas itlaj tlamatkilistli* yejuan kisa itech on tlen melauak, noso nemechijlis itlaj tiotlajtojli yejuan onikselij itech Dios, noso itlaj nemechmachtis, tla ijkon, melauak niueli nemechpaleuiya.

⁷ Ma tiktlalikan sen ejemplo de on yejuan xkipiyaj nemilistli ken on akatlapitsajli niman on arpa. Tla on yejuan tlatsotsona xtlatsotsona ken kitocaroua, xakaj uelis kimatis tlinon kitsotsona.

⁸ Niman tla on soldado yejuan kipiya tekitl para kipitsas on trompeta xkipitsa ken kitocaroua, xakaj kichiuas cuenta para yas ipan on nouijsokilistli.

⁹ Sano ijki tej, nochiua nemouan. Tla ipan nemotlajtol xnenkijtouaj tlajtojli yejuan uelis se kajsikamatis, ¿kenijki tej, yakaj uelis kajsikamatis on tlen nenkijtouaj? Tla ijkon nentlajtlajtouaj, on tlen nenkijtouaj san yau ipan ajakatl, niman xtepaleuiya.

¹⁰ Ye tikmatstokej ika onkaj miyek seseknekamej tlajtoltin ipan in tlaltikpaktli, niman cada se kipiya kenijki se kajsikamati.

¹¹ Pero tla nejua xnikajsikamati on tlajtojli yejuan se ika nechnotsa, tla ijkon itech ninochiua ken on yejuan xchanej, niman yejua notech nochiua no ken se yejuan xchanej.

¹² Yejua ika tej, pampa nemejuamej nenkinekij nenkiseliskej on tetlayokoliltin yejuan on Espíritu Santo kitemaka, xchiuakan kanika para nenkipiyaskej on yejuan kimpaleuis para kimiskaltis ipan intlaneltok on tlaneltokakej.

¹³ Tla ijkon tej, tla yakaj tlajtlajtoua ikan oksekneka yenkuik tlajtojli, ma kichiua oración para Dios ma kimaka on tetlayokolijli* yejuan kiueliltis para uelis kajsikamatis niman kiteijlis tlinon kijtosnek ika on yenkuikej tlajtoltin.

¹⁴ Ijkon tej, nikchiua oración ikan okse yenkuik tlajtojli. In kijtosneki ika noalma kichiua oración, pero notlamachilis xkajsikamati on tlen noalma kijtoua.

¹⁵ Tla ijkon, ¿tlinon noneki nikchiuas? Sanken nikchiuas nooración ipan noalma ika on yenkuik tlajtojli, niman no nikchiuas nooración ikan notlajtol yejuan nikajsikamatis. Sanken ninokuikatis ikan okse yenkuik tlajtojli, niman no ninokuikatis ikan on tlajtojli yejuan nikajsikamatis.

¹⁶ Ma tikonijtokan ika ne kampa nemosentlaliaj, tikueyilia Dios ipan moalma ikan okse yenkuik tlajtojli. Niman ompa nemi sen tlakatl yejuan xmitstlajtolkaki ijkuak tikmakas tlaxtlauijli Dios. On tlakatl xuelis kijtos: “Ma ijki nochiua”, pampa yejua xkimatis tlinon tikijtoua.

¹⁷ Maski sanoyej kualtsin tikmakas tlaxtlauijli Dios, mooración xuelis kiskaltis on okse tlakatl ipan itlaneltok.

¹⁸ Nikmaka tlaxtlauijli Dios ika nejua más nitlajtlajtoua ikan okseki yenkuikej tlajtoltin xken nemochimej*.

¹⁹ Pero ijkuak ninosentlalia inuan on tlaneltokakej, más nikuelita nikijtos san kanaj makuijli tlajtojli yejuan kuajli kajsikamatij para on oksekimej kuajli nikinmachtia, xken tla nikijtoskia majtlaktli mil tlajtojli ikan okseki yenkuikej tlajtoltin yejuan xuelij kajsikamatiskej.

²⁰ Nokniuan, maka xtlanemilikan ken kokonej. Nemejuamej xchipajtiakan ken on kokonej yejuan xnomatij kichiuaj on tlen xkuajli. Pero ijkuak nentlanemiliskej, xchiuakan ken on tlakamej yejuan yochikajkej.

²¹ Ipan on itlanauatil Dios ijkin tlajkuilolnestikaj: “Yejua in país niknotsas ikan okseki tlajtoltin niman ika inkamak on yejuan xchanejkej. Pero maski ijkon nikchiuas, xnechtenkakiskej. Yejua in okijtoj toTEKO.”

²² Ijkon tej, tikitaj ika on tetlayokolijli* yejuan se kiueliltia tlajtlajtoua ikan okseki yenkuikej tlajtoltin, on yejua kiteititia para on yejuan xe tlaneltokaj, niman xpara on yejuan yotlaneltokakej. Pero on tetlayokolijli* yejuan se kiueliltia kiteijlia on tiotlajtojli yejuan kiselia itech Dios, yejua kiteititia para on tlaneltokakej niman xpara on yejuan xe tlaneltokaj.

²³ Aman tej, ¿tlinon nochiuas tla nemejuamej tlaneltokakej nemosentlaliaj, niman nemochimej peua nentlajtouaj ikan okseki yenkuikej tlajtoltin, niman nemotsajlan kalakij on yejuan xkimatij on kuajli tlajtojli yejuan kiteijlia ken Dios temakixtia, noso on yejuan xkineltokaj Cristo? ¿Tlen xkijtoskej ika nemejuamej yonenlojlocojtiakej?

²⁴ Pero tla nemochimej nenkiteijliaj on tiotlajtojli yejuan nenkiseliaj itech Dios, niman kalaki se yejuan xkimati on kuajli tlajtojli yejuan kiteijlia ken Dios temakixtia, noso yejuan xkineltoka Cristo, yejua notlajtlakolmatis niman noyolpejpenas ijkuak kakis on tlen nochimej kijtojtokej.

²⁵ Niman on tlen xkuajli tlajtlamach* iyantikatka* ipan iyojlo nopanextis. Niman notlakuantelketsas para kiyekteneuas Dios niman kijtos ika Dios melauak nemotsajlan nemi.

Kuajli para nochi kichiuaskej ikan cuidado niman ken kitocaroua

²⁶ Tla ijkon tej, nokniuan, on tlen noneki nenkichiuaskej sano yejua in. Ijkuak nemosentlaliskej, cada se ma kipiya kajtlejua salmo nokuikatis, noso tlinon temachtis, noso kiteijlis on tiotlajtojli yejuan okiselij itech Dios, noso tlajtlajtos ikan okseki yenkuik tlajtojli*, noso kiteijlis tlinon kijtosneki on yenkuik tlajtoltin. Nochi in tlajtlamach* ma nochiua para kimpaleuis ika ma noskaltikan ipan intlaneltok on tlaneltokakej.

²⁷ Tla nemij yejuan tlajtlajtouaj ikan oksekneka yenkuik tlajtoltin, ma tlajtokan san omemej noso yeyimej, niman maka san setipan ma tlajtokan. Niman se ma kiteijli tlinon kijtojtokej ika on yenkuikej tlajtoltin.

²⁸ Pero tla xnemi yejuan ueli kiteijlia on tlen kijtosneki on sejsekneka yenkuikej tlajtoltin, tla ijkon, maka yakaj ma tlajtlajto ika on yenkuikej tlajtoltin ne kampa nosentlaliaj, yej cada se ma tlajto san ipan iyojlo niman ma konmati san iuan Dios.

²⁹ Sano ijki tej, san omemej noso yeyimej tiotlajtojkej ma kijtokan on tiotlajtojli yejuan okiselijkej itech Dios, chika oksekimej ma kixtlalokan tla melauak okiselijkej itech Dios on tiotlajtojli.

³⁰ Pero tla Dios kimakas sen yenkuik tiotlajtojli yakaj okse yejuan yeuatikaj, tla ijkon, on yejuan tlajtojtikatka maka sa ma nauati niman ma kauili ma tlajto on yejuan kemach okiselij yenkuik tiotlajtojli.

³¹ Tla ijkon tej, nemochimej uelis nensesentemej nenkijtoskej on tiotlajtojli yejuan nenkiseliaj itech Dios para nochi on tlaneltokakej kuajli kajsikamatstiaskej niman noyoleuaskej.

³² Ijkon noneki nochiuas pampa Dios on yejuan kipiya tetlayokolijli* para kiteijlia on tiotlajtojli yejuan kiselia itech Dios, noneki kauilis on Espíritu Santo kiyekanas para kimatis kamanon tlajtos noso kamanon xtlajtos,

³³ pampa Dios xkuelita para sa kenijki ma nochiua itlaj yejuan tepopoloua, yej kuelita on tlen nochiua kuajlotika ken nochiua ipan nochi on tiopanmej.

³⁴ On siuamej xkintocaroua tlajtoskej ijkuak nomachtiua ipan itiopan Dios, yej noneki kintlakamatiskej iminueuentsitsiuan ken on itlanauatil Dios tlanauatia.

³⁵ Tla yejuamej kinekij itlaj kimatiskej, ma kintlajtoltikan inueuentsitsiuan ne inchan, pampa xkuajli nesi sen siuatl tlajtlajtos ne teixpan ipan on tiopan.

³⁶ Xkelnamikikan ika Dios xnemotech opeu kitemaka itlajtol, niman ika no xsan nemejuamej onenkiselijkej.

³⁷ Tla yakaj kinemilia kipiya on tetlayokolijli* yejuan kiueliltia para kiteijlia on tiotlajtojli yejuan kiselia itech Dios, noso kinemilia ika kipiya okse tetlayokolijli*, noneki kuajli kimatis ika in tlen nemechtlajkuiluijtikaj yejua itlanauatil toTEKO.

³⁸ Tla yejua xkiselis ken itlanauatil toTEKO on tlen nemechijlia, maka xselikan on tlen yejua kijtoua.

³⁹ Ijkon tej, nokniuan, xchiuakan kanika para nenkiteijliskej on tiotlajtojli yejuan nenkiseliaj itech Dios. Niman maka xtekajkaualtikan on ika tlajtolo ikan oksekneka yenkuikej tlajtoltin.

⁴⁰ Pero yej, nochi xchiuakan ken kitocaroua, niman maka sa kenijki xchiuakan.