1 Corintios 13 - El Nuevo Testamento

On tetlajsojtlalistli* más ueyi kijtosneki xken on tlaneltokalistli niman tlamachalistli*

¹ Tla nejua nitlajtlajtoskia ikan intlajtol* oksekimej tlakamej niman intlajtol* ángeles, pero xnitetlajsojtla, notlajtol xitlaj* ika tlapaleuiskia, yej san kakistiskia ken sen tambor noso sen kampana yejuan tsiliniskia.

² Niman tla nikteijliskia on tiotlajtojli yejuan nikseliskia itech Dios, niman nikmatiskia nochi tlajtlamach* tlen yejua kichtakapiya, niman sanoyej* nitlajmatki yeskia, niman nikpiyaskia nochi on tlaneltoktli para ueliskia nikimejkuaniskia tepemej ika notlaneltok, pero xnitetlajsojtla, xitlaj* kijtosneki tlen nikchiua.

³ Tla nochi tlen nikpiya nikinxelouiliskia on mayankej, niman tla san tepampa niktemakaskia notlalnakayo para ma kitlatikan, pero xnitetlajsojtla, nochi on xitlaj* ika nechpaleuiskia.

⁴ On yejuan tetlajsojtla tlajtlamach* kimijyouilia oksekimej niman yolyemanki*. On yejuan tetlajsojtla xnexikolej, niman xnoueyiteneua nion noueyimati.

⁵ On yejuan tetlajsojtla xkaman xompayejyeua niman xkitejtemoua on tlen kuajli san para yejua. On yejuan tetlajsojtla xsan kuajkualani, niman xsa konelnamiktikaj on tlen oksekimej itlaj xkuajli okichiuilijkej.

⁶ On yejuan tetlajsojtla xpaki ika on tlen xkuajli kichiuaj oksekimej, yej paki ijkuak kita tetlani on tlen kuajli.

⁷ On yejuan tetlajsojtla kipiya iyojlo para kixikoua nochi tlajtlamach* tlen xkuajli, para kineltoka on tlen kuajli intech oksekimej, para kinnekilia nochi kuajli ma uajla impan oksekimej, niman para kimijyouiya oksekimej.

⁸ On yejuan tetlajsojtla xkaman tlami itetlajsojtlalis*. Pero yejkos on tiempo ijkuak on tiotlajtojli yejuan kiseliaj itech Dios xok nonekis para noteijlis, nion xok tlajtolos ikan sesekneka yenkuikej tlajtoltin, niman xok onyas on tlaixmatkilistli.

⁹ Aman totlaixmatkilis* xajsitikaj*, niman on tiotlajtojli yejuan Dios techmaka no xajsitikaj.

¹⁰ Pero ijkuak uajlas on tlen kuajli ajsitikaj*, nochi on tlen xajsitikaj ajsitias.

¹¹ Ijkuak nejua nikonetl katka, nitlajtlajtouaya niman nitlanemiliaya ken sen konetl. Pero ijkuak onitlakatiak, xok oninouikak ken sen konetl.

¹² Aman ken ayautitlan tikitaj on tlajtlamach* itech ika Dios. Tejuamej san tikitaj ken tikitaskiaj ipan sen espejo yejuan xchipauak. Pero ijkuak yejkos on tlen kuajli ajsitikaj, nochi on tlajtlamach* itech ika Dios kuajli tikitaskej. Aman xnochi kuajli nikixmati on tlajtlamach* de Dios. Pero ijkuak yejkos on tlen kuajli ajsitikaj, nochi kuajli nikixmatis ken Dios nechixmati.

¹³ Aman tej, yeyi onkaj yejuan xkaman tlamis: tlaneltokalistli, tlamachalistli* niman tetlajsojtlalistli*. Pero on tetlajsojtlalistli* yejua más ueyi kijtosneki.