1 Corintios 12 - El Nuevo Testamento

Pablo temachtia de on tetlayokoliltin yejuan kitemaka on Espíritu Santo

¹ Aman nokniuan, nikneki para xkajsikamatikan de on tetlayokoliltin yejuan on Espíritu Santo mechmaka yejuan mechueliltia nenkichiuaj on tlen aman ueli nenkichiuaj.

² Nemejuamej nenkimatstokej ika ijkuak xe nenkineltokayaj Cristo, mechkajkayauayaj para nenkiueyiliayaj on ídolos yejuan xuelij kijtouaj nion se tlajtojli.

³ Yejua ika, nikneki kuajli xmatikan ika yejuan tlajtoua ikan ipoder on Espíritu Santo xuelis kijtos: “¡Jesús yejua xkuajli tlakatl!” Niman no on yejuan xtlajtoua ikan ipoder Espíritu Santo, xuelis kijtos: “¡Jesús yejua toTEKO!”

⁴ Onkaj seseknekamej tetlayokoliltin yejuan sen tlakatl uelis kiselis, pero san se Espíritu Santo kintemaka.

⁵ Onkaj miyek sesekneka tlinon ika kitekipanouaj toTEKO, pero san se toTEKO tinochimej tiktekipanouaj.

⁶ Niman onkaj miyek sesekneka tekitl yejuan Dios kichiua ipan tonemilis, pero san se Dios kichiua on tekitl.

⁷ Ipan cada se, on Espíritu Santo kiteitita ipoder para kimpaleuiya nochimej.

⁸ In sen ejemplo. On Espíritu Santo sekimej kinmaka on tetlayokolijli* yejuan kinueliltia para tlajtoskej ikan tlamatkilistli*, niman oksekimej sano yejua on Espíritu kinmaka on tetlayokolijli* yejuan kinueliltia para tlajtoskej ikan tlaixmatilistli.

⁹ Itech sano yejua on Espíritu, sekimej kiseliaj kojtik tlaneltoktli, niman oksekimej kiseliaj poder para uelij kimpajtiaj on kokoxkej.

¹⁰ Sekimej itech sano yejua on Espíritu, kiseliaj on tetlayokolijli* yejuan kinueliltia kichiuaj milagros, niman oksekimej kiseliaj on tetlayokolijli* yejuan kinueliltia kiteijliaj on tiotlajtojli yejuan kiseliaj itech Dios. On Espíritu sekimej kinmaka on tetlayokolijli* yejuan kinueliltia para kitaj katlejua tetlayokolijli* kisa itech on Espíritu Santo niman katlejua kisa itech on xkuajkualtin espíritus. Sekimej kiseliaj on tetlayokolijli* yejuan kinueliltia tlajtlajtouaj okseki yenkuik tlajtoltin*. Niman sekimej kiseliaj on tetlayokolijli* yejuan kinueliltia para uelij kajsikamatij niman kiteijliaj on tlen nijtoua ikan on yenkuik tlajtoltin.

¹¹ Nochi in tlajtlamach* san se Espíritu kichiua. Niman ken sano yejua kineki, ijki kimaka itlayokolil cada tlakatl.

Tinochimej titochiuaj san se tlalnakayotl

¹² Itlalnakayo sen tlakatl miyek partes kipiya. Pero maski miyek tlajtlamach* kipiya, san se tlalnakayotl nochiuaj. Tejuamej tej, no ijki titochiuaj itlalnakayo Cristo. Maski timiyekej yejuan tikneltokaj Cristo, tinemij san sekan ken itlalnakayo.

¹³ Tinochimej otikselijkej san se Espíritu Santo. Ijkuak otikselijkej, san se tlalnakayotl otitochijkej maski tihebreos* noso xtihebreos*, maski tiesclavos noso titlamakajtin. Tinochimej tej, otikselijkej san se Espíritu.

¹⁴ Sen tlalnakayotl xnochiua san ika se parte, yej ikan miyek partes.

¹⁵ Tla on ikxitl kijtoskia: “Nejua xnimatli, yejua ika xnitlapouajli ipan on tlalnakayotl”, xsan yejua ika on xok tlapouajli yes ipan on tlalnakayotl.

¹⁶ Noso tla on nakastli kijtoskia: “Nejua xniixtololojtli, yejua ika xnitlapouajli ipan on tlalnakayotl”, xsan yejua ika on xok tlapouajli yes ipan on tlalnakayotl.

¹⁷ Tla on tlalnakayotl nochi ixtololojtli yeskia, ¿kenijki tej, ueliskia tlakakiskia? Noso tla on tlalnakayotl nochi nakastli yeskia, ¿kenijki tej, ueliskia tlajnekuiskiaj?

¹⁸ Pero Dios okitlalij cada parte ipan totlalnakayo ken yejua okinek.

¹⁹ Tla sen tlakatl tlachijchijtli yeskia san ika se parte, ¿kanon onyaskia itlalnakayo?

²⁰ Niman maski aman onkaj miyek partes ipan totlalnakayo, nochi on partes san se tlalnakayotl nochiuaj.

²¹ Yejua ika, tixtololoj xueli kijlia on toma: “Xnimitsnecesitaroua.” Nion totsontekon xueli kinmijlia tokxiuan: “Xnenmechnecesitaroua.”

²² Melauak tej, ika ka. Yej ipartes totlalnakayo yejuan nesi ken xmás uejueyixtokej, más tiknecesitarouaj.

²³ Niman ipartes totlalnakayo yejuan nesi xueyi kijtosneki, yej más kuajli tiktlapachouaj. No ijki ipartes totlalnakayo yejuan xmás kualtsin, más kuajli tiktlasojtla.

²⁴ Ipartes totlalnakayo yejuan sempantlan nestiu xnoneki kuajli tiktlapachoskej. Dios tej, okichijchiu on totlalnakayo para ma kiseli más tetlakaitalistli on parte yejuan más noneki.

²⁵ Ijkon okichijchiu para maka xexelijtiaskej on partes ipan totlalnakayo, yej cada parte ma nonekikan inuan on oksekimej partes.

²⁶ Ijkon tej, tla se iparte totlalnakayo tlajyouiya, nochimej on oksekimej no tlajyouiyaj, niman ijkuak se parte kiselia tetlakaitalistli, nochimej on oksekimej no pakij.

²⁷ Nemochimej* nemochiuaj itlalnakayo Cristo, niman cada se de nemejuamej nochiua se parte ipan on itlalnakayo.

²⁸ Ijkon tej, intsajlan on yejuan tlaneltokaj, Dios okinkalaktij miyekej ipan itekiu. Achtoj okinkalaktij apóstoles*, ika ome tiotlajtojkej, ika yeyi temachtijkej, ika naui on yejuan kichiuaj milagros, kemaj on yejuan uelij tepajtiaj, kemaj on yejuan tepaleuiyaj, kemaj on yejuan teyekanaj, niman kemaj on yejuan tlajtlajtouaj ikan okseki yenkuik tlajtoltin*.

²⁹ Tikitaj tej, ika xnochimej apóstoles*, nion nochimej tiotlajtojkej. Xnochimej temachtijkej nion nochimej kichiuaj milagros.

³⁰ Xnochimej kipiyaj poder para tepajtiaj. No xnochimej tlajtlajtouaj ikan okseki yenkuik tlajtoltin noso uelij kajsikamatij niman kiteijliaj on tlen kijtosneki on okseki yenkuik tlajtoltin.

³¹ Pero nemejuamej más xtejtemokan nenkiseliskej itech Dios on tetlayokoliltin yejuan más kimpaleuis on yejuan tlaneltokaj. Niman aman nejua nemechititis sen ojtli yejuan más sanoyej kuajli.