1 Corintios 11 - El Nuevo Testamento

¹ Nemejuamej xtokakan noejemplo ijkon ken nejua niktoka iejemplo Cristo.

On siuamej nokuatlapachouaj para kiteititiaj on tetlakaitalistli

² Nokniuan, nemechyekteneua pampa nochipa nennechelnamikij niman nenkitlakamatij on temachtilistli yejuan onemechmakak.

³ Pero nikneki xkajsikamatikan ika on tlakatl yejua tlayekanki de isiuau, niman Cristo yejua tlayekanki ipan cada tlakatl niman Dios yejua kiyekana Cristo.

⁴ Tla sen tlakatl ne kampa nosentlaliaj on yejuan tlaneltokaj nokuatlapachoua ijkuak kichiua oración noso ijkuak kiteijlia on tiotlajtojli yejuan kiselia itech Dios, yejua xkitlakaita Cristo.

⁵ Pero tla sen siuatl xnokuatlapachoua ijkuak kichiua oración noso ijkuak kiteijlia on tiotlajtojli yejuan kiselia itech Dios, yejua xkitlakaita iueuentsin*, niman sano ijki ken noximaskia.

⁶ Tla sen siuatl xnokuatlapachoua, tla ijkon, ma kiteki nochi itson. Pero tla pinaua para nochi kinotekilis itson noso nokuaxikaltlalis, tla ijkon, noneki nokuatlapachos.

⁷ On tlakatl xkitocaroua nokuatlapachos, pampa on tlakatl sano yejua itlachalis Dios, niman yejua kiteititia iueyilis Dios. Pero on siuatl kiteititia iueyilis on tlakatl

⁸ pampa ijkuak Dios okichichiu on tlakatl xokixtij itech on siuatl, yej on siuatl okixtijkej itech on tlakatl.

⁹ Dios xokitlalij on tlakatl para on siuatl, yej okitlalij on siuatl para on tlakatl.

¹⁰ No ijki pampa on ángeles kualitstokej, on siuatl noneki nokuatlapachos para kiteititis ika kinokauilia ma kiyekana iueuentsin.

¹¹ Pero ixpan toTEKO on tlakatl san ipampa sen siuatl nemi, niman on siuatl san ipampa sen tlakatl nemi.

¹² Niman in melauak, pampa ijkon ken on siuatl okixtijkej itech on tlakatl, no ijki on tlakatl tlakati itech sen siuatl, niman yejuamej nochimej kisaj itech Dios.

¹³ Sano nemejuamej xkixtlalokan tla kuajli para on siuatl xnokuatlapachos ijkuak kichiuas oración itech Dios.

¹⁴ Ye tikmatstokej ipan totlamachilis ika sen tlakatl pinauas tla tsonueueyak yes,

¹⁵ pero sen siuatl uej kiselia tetlakaitalistli pampa tsonueueyak, pampa Dios okimakak ueueyak itson para ika nokuatlapachoua.

¹⁶ Pero tla yakaj kixnamikisneki in tlen nikijtoua, ma kimati ika tejuamej yejuan tiapóstoles* niman on tlaneltokakej itech Cristo, ijkin nochipa titouikaj.

On tlaneltokakej de Corinto xokitlakaitakej iSanta Cena toTEKO

¹⁷ Pero xnemechyekteneuas ika in tlen aman nemechtlajkuiluis, pampa nesi ijkuak nemosentlaliaj ken xitlaj* ika mechpaleuiya.

¹⁸ Yejua in achtoj xkakikan. Onechijlijkej ika ijkuak nemosentlaliaj ipan nemotiopan, xsan se nemotlamachilis nenkipiyaj, niman on achi nikneltoka.

¹⁹ Hasta nesi ika ijki noneki para xmoxexelokan para ijkon nesis akinomej melauak tlaneltokaj.

²⁰ Ijkon tej, ijkuak nemejuamej nemosentlaliaj para nenkuaj iSanta Cena toTEKO, xok yejua melauak iSanta Cena toTEKO nenkikuaj,

²¹ pampa ijkuak peua nentlakuaj, cada se nachtojuiya para kinotilanilia tlinon kikuas. Niman chika sekimej nokauaj ikan apistli, oksekimej hasta tlajtlauanij.

²² ¿Tlen xnenkipiyaj nemochan kampa uelis nentlakuaskej niman nentlaoniskej? Ijkon ken nenkichiuaj, nenkiteititiaj ika xnenkinnekij on tlaneltokakej niman nenkimpinajtiaj on yejuan xitlaj* kipiyaj. ¿Tlinon nenkinemiliaj kitocaroua nemechijlis yejua ika on? ¿Nemechyekteneuas? ¡Melauak tej, ika ka; xnemechyekteneuas!

²³ Nejua yonemechmakak on temachtilistli yejuan onikselij itech toTEKO. In yejua on temachtilistli. Sano ipan on tlayoua, ijkuak toTEKO Jesús okitemaktilijkej, okontilan on pan,

²⁴ niman ijkuak yokimakak tlaxtlauijli Dios, okitlatlapan, niman okijtoj: “Xkuakan in pan. In pan yejua kixneskayotia* notlalnakayo yejuan nemopampa notemaka. Niman ijkuak nenkuaskej xnechelnamikikan.”

²⁵ Niman ijkuak yotlan kikuaj on tiotlak tlakuajli, no ijki okontilan on kopa, niman okijtoj: “In vino kijtosneki on yenkuik pacto* yejuan nopeualtis ika noyesyo. Niman nochipa ijkuak nenkoniskej, ika xnechelnamikikan.”

²⁶ Hasta kaman toTEKO oksejpa uajlas, nochipa ijkuak nenkuaskej in pan niman nenkoniskej in vino, nenkiteititijtiaskej ika yejua nemopampa omik.

²⁷ San akinon yejuan xkitlakaitas on pan ijkuak kikuas, niman icopa toTEKO ijkuak konis, kipiyas tlajtlakojli pampa xkitlakaita itlalnakayo niman iyesyo toTEKO.

²⁸ Yejua ika tej, cada se achtopa kuajli ma noyolpejpena niman ma noyolkuiti tla kipiya tlajtlakojli antes kikuas on pan niman konis on vino.

²⁹ Ijkon xchiuakan, pampa tla se kikua on pan niman koni ivino toTEKO, niman xkinemilia tlinon kijtosneki ika itlalnakayo toTEKO omik, kiselis itlauel Dios, pampa kikua on pan niman koni on vino xijki ken kitocaroua.

³⁰ Yejua ika tej, ne nemotsajlan miyekej nemij yejuan kokoxkej, yejuan xkojtikej, niman sekimej yomikkej.

³¹ Pero tla sano tejuamej achtopa kuajli titoyolkuiskej tla tikpiyaj tlajtlakojli, xtikseliskej itlauel Dios.

³² Pero ijkuak toTEKO techyolkuitia, yejua techcastigaroua para maka techtlajtlakolmakas inuan on tlaltikpaktlakamej.

³³ Yejua ika nokniuan, ijkuak nemosentlaliskej para nenkikuaskej on iSanta Cena toTEKO, xkinchakan oksekimej para ijkon san sekan peuas nentlakuaskej.

³⁴ Tla yakaj sanoyej* apismiki, ma tlakua ichan para maka kiselis itlauel Dios ijkuak teuan nosentlalia. On okseki tlajtlamach* nikonyektlalis ijkuak nejua nemechontas.