1 Corintios 10 - El Nuevo Testamento

Pablo tetlakanonotsa ika xkuajli kintlakaitaskej on ídolos

¹ Nokniuan, nikneki para xmatikan tlinon impan onochiu on toachtojtajuan yejuan oyajkej iuan Moisés. Nochimej yejuamej okintlapachoj on moxtli, niman nochimej yejuamej itlajkotian opanokej on Mar Rojo.

² Ijkon tej, nochimej onokuatekijkej ika on moxtli niman ika on mar ken inomachtijkauan* Moisés.

³ Niman nochimej okuajkej san se iluikak tlakuajli.

⁴ Niman nochimej san se iluikak atl okonikej yejuan Dios okinmakak itech on tetl. Niman on tetl kijtosneki Cristo yejuan ompa inuan yaya.

⁵ Maski ijkon okiselijkej, más miyekej xokipaktijkej Dios, niman yejua ika más miyekej omijmikkej imanian on xalpatlajkan.

⁶ Nochi on tlen tlajtlamach* tlen onochiu techititia para maka tiknekiskej on tlen xkuajli tlajtlamach* ken yejuamej okichijkej.

⁷ Maka tikinueyilikan on ídolos ken sekimej yejuamej okichijkej, pampa in Yektlajkuilojli ijkin kijtoua: “On tlakamej onotlalijkej para otlakuajkej niman otlauankej, niman kemaj opeu nijtotiaj.”

⁸ Nion maka tiauilnemikan ken sekimej yejuamej okichijkej, niman san ipan se tonajli omikkej 23 mil tlakamej.

⁹ Nion maka tiktlatlatakan iijyouilis toTEKO Dios ken sekimej yejuamej okichijkej, niman yejua ika omikkej ijkuak okinkuajkuajkej on kouamej.

¹⁰ Nion maka itlaj xkijtouilikan Dios ken sekimej yejuamej okichijkej, niman yejua ika okinmiktij on ángel yejuan kipiya poder para temiktia.

¹¹ Nochi tlen impan onochiu on toachtojtajuan onotlajkuiloltlalij ipan on Yektlajkuilojli ken sen ejemplo para maka no ijki tikchiuaskej, yejuan tinemij ipan in sa ika nochi tiempo.

¹² Yejua ika, on yejuan kinemiliaj melajkanemij, ma notakan sano yejuamej para maka uetsiskej.

¹³ Xmatikan ika on tlatlamach tlayouilistli niman tetlatlatalistli yejuan nenkipiyaj sano ijki ken oksekimej tlaltikpaktlakamej kipiyaj. Pero Dios yolmelajki, niman mechpaleuis para on tlayouilistli niman tetlatlatalistli maka nemopan uajlas yejuan sanoyej temojtij yejuan nemejuamej xuelis nenkixikoskej. Yej ijkuak nenkipiyaskej tlayouilistli niman tetlatlatalistli, Dios mechmakas sen ojtli kampaka uelis nenkitlalkauiskej, niman ijki uelis nenkixikoskej.

¹⁴ Yejua ika notlajsojkaikniuan, xkintlalkauijtiakan on ídolos. Maka sa xkinmauistilikan.

¹⁵ Nejua nemechnotsa ken tlakamej yejuan tlakajsikamatij. Sano nemejuamej xkixtlalokan tla melauak noso xmelauak on tlen nemechijlia.

¹⁶ Ijkuak xe tikuaj on Santa Cena, tiktlajtlaniliaj toTEKO ma kitiochiua on vino. Niman ijkuak tikonij on vino, tikteititiaj ika san sekan tinemij itechkopa iyesyo Cristo. No ijki ijkuak tikuaj on pan yejuan tiktlatlapanaj, tikteititiaj ika san sekan tinemij itechkopa itlalnakayo Cristo.

¹⁷ Maski timiyekej, san se tlalnakayotl titochiuaj ijkuak tikuaj sanno yejua on pan.

¹⁸ Xkitakan ken nouikaj on hebreos*. Yejuamej ijkuak kikuaj on uentli yejuan kiuentlaliaj itlaixpan* Dios, san sekan kikuaj ika san se inyojlo.

¹⁹ Xnikijtosneki tej, ika on ídolos kipiyaj itlaj ueyilistli, nion xnikijtosneki ika on nakatl yejuan kiuentlaliliaj ne tlaixpan* más ueyi kijtosneki xken okseki nakatl.

²⁰ Yej nikijtosneki ika ijkuak on yejuan xhebreos* itlaj kiuentlaliaj ipan intlaixpan* on ídolos, xDios kiuentlaliliaj, yej kinuentlaliliaj on yejuan xkuajkualtin espíritus. Niman nejua xnikneki xmouikakan inuan on xkuajkualtin espíritus.

²¹ Xuelis nentlaoniskej ipan icopa toTEKO, niman no nentlaoniskej ipan incopa on xkuajkualtin espíritus. Niman xuelis nentlakuaskej ipan imesa toTEKO, niman nentlakuaskej ipan inmesa on xkuajkualtin espíritus.

²² Noso ka, ¿yej tiknekij tiktlauelkuitiskej toTEKO? ¿Tlen tikpiyaj más poder xken yejua?

²³ On melauak ken kijtoua on tlajtojli: “Nochi tlen niknekis, uelis nikchiuas.” On melauak, pero xnochi tlen uelis nikchiuas nechpaleuis ika on tlen kuajli.

²⁴ Maka yakaj kitejtemo on tlen kuajli san para yejua, yej ma kitejtemo on tlen kuajli para oksekimej.

^25-26 Nochi on kech tlajtlamach* nakatl kinamakaj tiankisko* uelis nenkuaskej pampa in Yektlajkuilojli ijkin kijtoua: “In tlaltikpaktli niman nochi tlen ipan onkaj iyaxka* toTEKO.” Pero maka xtetlajtoltikan tla on nakatl okiuentlalijkaj intech on ídolos para ijkon xmechpajsolos on nemochipajkatlamachilis.

²⁷ Tla se yejuan xkineltoka Cristo mechnotsa para ichan nemontlakuaskej niman nenkinekij nenyaskej, xkuakan nochi tlen mechtlaliliskej ipan nemoplato. Pero maka xtetlajtoltikan tla on nakatl okiuentlalijkaj ixpan on ídolos para maka mechpajsolos on nemochipajkatlamachilis.

²⁸ Pero tla yakaj mechijlis: “In tlakuajli yokinuentlalilijkaj on ídolos”, tla ijkon, maka xkuakan ipampa on yejuan omechmachistij, niman para maka nenkijtlakouiliskej ichipajkatlamachilis.

²⁹ In nemechijlia xipampa nemochipakatlamachilis, yej ipampa itlamachilis on yejuan mechmachistia. Pero yakaj uelis kijtos: “¿Tline* xuelis nikchiuas on tlen nikneki san ipampa itlamachilis okse tlakatl?

³⁰ Tla nejua nikmaka tlaxtlauijli Dios ipampa on tlen nikua, tla ijkon, ¿tline tej, yakaj kijtos ika nikchiua xkuajli ijkuak nikua on tlakuajli yejuan yonikmakak tlaxtlauijli Dios?”

³¹ Tla nemejuamej nentlakuaj, noso nentlaonij, noso itlaj okse nenkichiuaj, nochi xchiuakan para Dios ma kiseli ueyilistli.

³² Maka xchiuakan itlaj yejuan ika nenkimpopoloskej ixpan Dios on hebreos*, on yejuan xhebreos* noso on yejuan tlaneltokaj.

³³ Yej xchiuakan ken nejua nikchiua. Nikchiua kanika para nochi on tlen nikchiua ika nikimpaktia nochimej. Xniktejtemoua on tlen kuajli san para nejua, yej niktejtemoua on tlen kuajli para oksekimej, para ijkon yejuamej nomakixtiskej.