1 Corintios 1 - El Nuevo Testamento

Pablo kintlajkuiluiya on tlaneltokakej de Corinto

¹ Nejua niPablo, yejuan Dios onechkalaktij para niiapóstol* JesuCristo ken yejua okinek. Nejua iuan tokniu Sóstenes

² temechtlajkuiluiyaj nemejuamej tokniuan yejuan nennemij ipan itiopan Dios ompa ipan on ueyikalpan itoka Corinto, yejuan nenyolchipajkej itech Dios pampa san sekan nennemij iuan Cristo Jesús. Dios omechnots para nennemij yolchipajkej inuan on yejuan nochiuiyan kiyekteneuaj toTEKO JesuCristo yejuan no inTEKO ken tejuamej.

³ Ma Dios toTajtsin niman toTEKO JesuCristo mechmakakan intlatiochiualis niman inyolseuilis.

On Corintios okiselijkej tlatiochiualistli

⁴ Nochipa nikmaka tlaxtlauijli Dios ipampa iueyitejtlajsojtlalis yejuan omechmakak itechkopa Cristo Jesús.

⁵ Tej, pampa san sekan nennemij iuan Cristo, Dios yomechmakak tlajtlamach* riquezas. Mechmaka ipan on tlen nenkijtouaj niman ipan on tlen nenkimatij.

⁶ On tlen onemechijlij de Cristo yonopantlantij ika melauak ijki yonochiu nemopan.

⁷ Yejua ika, chika nenkimachixtokej on tonajli ijkuak toTEKO JesuCristo uajlas, nenkipiyaj nochi on tetlayokolijli* yejuan Dios kitemaka.

⁸ Sano Dios mechmelajkapiyas hasta ijkuak nochi tlamis, para maka mechtlajtlakolmakas ijkuak uajlas toTEKO JesuCristo.

⁹ Dios yomechnots para aman nenenemij san sekan iuan JesuCristo toTEKO yejuan iKonetsin Dios. Niman sano yejua in Dios nochipa kichiua on tlen kijtoua.

On tlaneltokakej de Corinto xkipiyaj san se inyojlo

¹⁰ Nokniuan, sanoyej* nemechtlajtlanilia ikan itokatsin toTEKO JesuCristo, kuajli xmouikakan niman maka xxexelijtiakan. Yej san se tlanemilijli niman nemoyojlo xpiyakan.

¹¹ Yejua in nemechijlia, pampa sekimej ifamilia Cloé onechijlijkej ika nenmokamauijsokij.

¹² Nikijtosneki ika nemochimej* sesentlamantik nenkijtouaj. Sekimej kijtouaj: “Nejua ninopoua itech Pablo”, oksekimej kijtouaj: “Nejua ninopoua itech Apolos”, niman sekimej kijtouaj: “Nejua ninopoua itech Pedro”, niman oksekimej kijtouaj: “Nejua ninopoua itech Cristo.”

¹³ ¿Tlen Cristo xexelijtikaj ipan miyek partes? Noso, ¿tlin yej nejua Pablo nemopampa onimik ne ipan kojnepanojli*? ¿Noso yej onemokuatekijkej ikan notoka?

¹⁴ Nikmaka tlaxtlauijli Dios ika xakaj más onikinkuatekij yej san Crispo niman tokniu Gayo.

¹⁵ Yejua ika tej, xakaj uelis kijtos ikan notoka onokuatekij.

¹⁶ No nikelnamiki ika no onikuatekij ifamilia Estéfanas, pero xnikelnamiki tla yakaj más onikuatekij.

¹⁷ Cristo xonechajtitlan para nitlakuatekis, yej onechajtitlan para nikteijlis on kuajli tlajtojli yejuan kiteijlia ken Dios temakixtia. Niman onechajtitlan xpara nikteijlis on temachtijli ikan uejueyi tlajtojli yejuan kisa itech notlamatkilis* para maka nikpopolos ipoder on imikilis Cristo ne ipan on kojnepanojli.

Cristo yejua ipoder niman itlamatkilis* Dios

¹⁸ Para on yejuan yauij ipan on ojtli de ixpoliuilistli, xitlaj* kijtosneki on kuajli temachtijli yejuan techijlia kenijki Cristo topampa omik ne ipan on kojnepanojli*. Pero para tejuamej yejuan tiauij ipan on ojtli de temakixtilistli, on temachtilistli kipiya ipoder Dios.

¹⁹ Yejua ika, kijtoua in Yektlajkuilojli: Nikteititis ika on tlamatkej* xitlaj* kijtosneki intlamatkilis*. Oksekan nikomapeuas inkajsikamatilis* on yejuan noteneuaj ika nochi kajsikamatij.

²⁰ Aman tej, ¿tlinon ika kipaleuiya on tlamatki*, noso on temachtijketl, noso on yejuan más tetlani ikan itlamatkilis* ijkuak inuan on tlaltikpaktlakamej nokamauisoki? Xitlaj tej, ika kipaleuiya, pampa Dios kijtoua ika on tlamatkilistli yejuan kisa ipan in tlaltikpaktli xitlaj* kijtosneki.

²¹ Dios ikan itlamatkilis* xokinkauilij on tlakamej ma kixmatikan on tlamatkilistli yejuan kisa ipan in tlaltikpaktli. Yej Dios okitlalij iyojlo para kinmakixtis on yejuan tlaneltokaj itechkopa on temachtijli yejuan tikteijliaj, maski yejua in temachtijli nesi ken xitlaj* kijtosneki para on tlaltikpaktlakamej.

²² On hebreos* kinekij kitaskej milagros, niman on griegos* kitejtemouaj tlamatkilistli.

²³ Pero tejuamej tikteijliaj ika Cristo omik ne ipan kojnepanojli* para kipopolos tlajtlakojli. On yejuan hebreos* xkinekij kiseliskej in temachtilistli, niman on yejuan xhebreos* kijtouaj ika xitlaj* kijtosneki.

²⁴ Pero para on yejuan Dios okinnots, tla hebreos* noso on yejuan xhebreos*, Cristo yejua ipoder niman itlamatkilis* Dios.

²⁵ Maski para on tlaltikpaktlakamej nesi ika imikilis Cristo xitlaj* kijtosneki, imikilis más ueyi kijtosneki xken on tlajtlamach* yejuan on tlaltikpaktlakamej kinemiliaj ueyi kijtosneki. Niman maski no nesi ika para on tlaltikpaktlakamej Dios xkojtik, ikojtilis más kojtik xken inkojtilis on tlaltikpaktlakamej.

²⁶ Nokniuan, xkelnamikikan kenijki nennemiyaj ijkuak Dios omechnots para nenkineltokaj JesuCristo. Xnenmiyekej onenkipixkej miyek tlamatkilistli yejuan kistika ipan in tlaltikpaktli, nion onenkipixkej tekiuajyotl, niman no xonenkipixkej on ueyilistli.

²⁷ Ijkon tej, Dios okintlapejpenij on tlakamej yejuan imixpan on tlaltikpaktlakamej nesij xtlamatkej*, niman on yejuan nesij xitlaj* kijtosnekij para kimpinajtiaj on yejuan noteneuaj tlamatkej* niman on yejuan noteneuaj ueyi kijtosnekij.

²⁸ Dios okintlapejpenij on tlakamej yejuan ipan in tlaltikpaktli xitlaj* ika uejueyixtokej, niman no on yejuan on tlaltikpaktlakamej kinchichiuaj niman kijtouaj ika xitlaj* kijtosnekij para kinxoxotonilis on tlen on tlaltikpaktlakamej kinemiliaj uejueyi kijtosnekij.

²⁹ Dios ijkon okichiu para xakaj uelis noueyimatis ixpan.

³⁰ Pero sano yejua Dios yomechsentlalij iuan Cristo Jesús. Niman itechkopa Cristo tikpiyaj tlamatkilistli, yolmelaualistli niman yolchipaualistli. Niman no itechkopa okitlaxtlau totlajtlakol ikan iyesyo.

³¹ Yejua ika ijkin kijtoua in Yektlajkuilojli: “Tla yakaj kineki noueyiteneuas, ma noueyiteneua ipampa toTEKO.”