Uney inwi 8 - Aŋwaʼanayn Uso FeyInjəm da unaŋ ŋənə iŋu pey akə isambigə 1 Amaʼazənə ŋwə̂ injəg sɨŋ unaŋ ŋənə iŋu pey akə sambigə, usin mbənə umə azobo nyaʼa zuw nyim. Mbə zuw nigə ka akə atin awa. 2 Mə zən angəd sambigə u təm ifigi Nwiye. Mbə́ naʼ itaŋa sambigə abú úŋwən. 3 Angəd uchini nu yə yimə akaŋ nu u tana akə gol zaʼa itəm iyad adiŋi. Mbə naʼa insens nanaʼ abú uŋwən kwi, u zwey aboʼo achaʼara ba Nwiye jum. Anigə ituŋ igun adiŋi wu nu mbə tana akə gol. Adiŋi wu təm imbey atən ufon Nwiye. 4 Indiʼ zənə yə́ mə́ duw akə insens wu abúmə aboʼo achaʼara ba Nwiye. Anigə inoʼ inya ubugə angəd wu ni ŋuw aneŋ ifigi Nwiye. 5 Angəd wu num akaŋ zənə mbə́ mə́ tuŋe insens wu, iswe nə akiy uwəd anigə ituw igun asəy. Umugə yə ghəy nigə, igəg moʼ ni ghama, imbeŋ kumə, imbəŋ ni muʼa anigə usin ni nyiʼere. Injəm da numugə mbə angəd imbey ikyugə toŋ itaŋa 6 Mbə angəd wu sambigə nu mbə́ yimə itaŋa sambigə tana inyo ma imi toŋ. 7 Angəd imbey toŋ, anigə uwaŋ nə uwəd nu u bɨgɨri nə anəm mə tuwə asəy. Aba feyn nu ughaba usin akə uba ta fə. Aba feyn nu ughaba uzad akə uba ta fə. Ufəʼ jum nibi fə. 8 Angəd ŋunə u pey akə ubigə toŋ itaŋa. Anigə mbə́ maʼ aghəy moʼ chomo ni ugum kyayn umə ifə ungɨŋ iba. Aba feyn nu ughaba iba akə uba ta beŋe akə anəm. 9 Aba feyn nu ughaba ughəy mbənə umə chomo ungɨŋ iba akə uba ta ku. Mbə chiŋe aba feyn nu ughaba ubaŋ ugwi akə uba ta. 10 Angəd ŋunə uŋu pey akə ta toŋ taŋa zənə yə yimi. Utəni kyayn umə beŋe ni ukyiʼi noʼ azobo fwayn igun aba fwayn nu ughaba ugwi akə uba ta, nibi fwayn igun ugwi imbuʼ. 11 Ukum akə utə́ni wu mə anwi nwi. Aba feyn nu ughaba une akə uba ta beŋe ki nwi. Ba mbənə mbə́ nugə une wu ku damugə une wu mə nwi. 12 Angəd ŋunə uŋu pey akə ikyugə toŋ itaŋa ma, ighəy moʼ cho isaʼa aba feyn nu umi ghaba nyamachugi akə uba ta, isaʼa aba feyn nu umi ghaba uməg akə uba ta, isaʼ foro aba feyn nu umi ghaba utə́ni akə uba ta. Aba feyn akə uzayn zayn uma nim. Cha nyamachugi mə naʼa ma uzayn zayn akə aba feyn nu ughaba ingom akə uba ta. Cha uməg nə itəni mə naʼa uma uzayn zayn akə aba feyn afəb nu ughaba afəb akə uba ta. 13 Mə ney anigə izən uzəm umə pəgərə ayə neŋ. Yə mə ghama akə ikay ghayn kwi, “Ingəʼ yi nyi, ingəʼ yi nyi, iyi nyi igun ba mbənə umə igun isəg. Akə amaʼazənə mbə angəd chini uta mi toŋ itaŋa uma.” |
© 2023 CABTAL