Titus 3 - Aŋwaʼanayn Uso Fey

Inji zənə ba Kristo mi mə chomo

¹ Ungwə Tayitus, beʼere utəw ba Kristo mbənə umə Kret kwi u ni wumini ba mbənə umə tumə úŋwən nə be Kristo mbənə umə nə ikay igun uma, ka umə ghəy uma izəw abú úŋwən. U tana inyo ni ghəy ichuŋ.

² Ka umə ghayn uma anó iboŋ da wa moʼ, u chomo akə aborobod, ni ghəy ichuŋ, ni tey iboro fiŋ abú ba jum.

³ Mba mə́ nibə ghəy unó aneŋ, nibə ghəy izəw, ba nibə tama ngwa. Mbə́ ba naʼ inja inyo akə isob abú ikudi unó jum mbənə nyə̂ inyo mə kaba nibə ighəy. Mba mə ghəy imbəw nibə ghəy adey. Ba mə bana ngwa mba nibə bana ita inyo.

⁴ Asɨmə amaʼazənə Nwiye ŋunə yə chi ngwa angəʼ itey ichuŋ ma ina nibi tey umugə u wuʼi ngwa,

⁵ yə́ chi ngwa angəʼ. Cha yə di ghəy ma nigə da anó chuŋ moʼ mba ghəy. Yə chi ngwa amə damugə yə diri ngwa anigə ichigə anjim Azugə zayn zayn i səw ngwa mba zayn, ibeŋe ngwa mba si məŋi buŋ ubó nibi inaʼ itəni fey ina.

⁶ Nwiye chigə anjim Yeso Kristo ichi ngwa angəʼ anigə inaʼ Azugə zayn zayn nu yə naʼ ichigə abugə.

⁷ Yə naʼ nigə da mba mi chigə anjim ichuŋ wu itəm ikoʼoro ifigi ma nibi jəg itəni zənə cha umi noʼo mey nu mba niŋi ita ikono igun.

⁸ Unó mbəŋ jum nu a si ghayn inigə amə unó asiʼ. Ayə kaba kwi ngwə komo utwiy akə unó mbəŋ da ba mbənə u beni Nwiye mi num ama uma imə ighəy unó chuŋ nu umi iwere ba jum.

⁹ Ka mbən mə ngwən nə anó moʼ ighəy nə unó aneŋ numugə ba mə taŋara da umbaʼ imbey nu amə anó ni ghayn da iwaŋ ba mbənə usi chigə. Anó nu imə taŋara ni ba chini foro anó imə taŋara da anó zənə unoʼo ghayn. Unó ibuw nu cha njim moʼ wa mə jəgə awu, cha unó wu mi iwere ma wa moʼ.

¹⁰ Amaʼazənə ngwə si chere ba mbənə umə ghaba ba ighari feyn iŋu pey akə ighari ibigə, ka ngwə mə ayə nə anó moʼ igha ghəy abú úŋwən.

¹¹ Ngwə si kyay kwi ukudu wa wu ton asiʼ foro kwi u yə ghəy unoʼ iboŋ nu atey kwi mbə si sob usaʼa uma uma amboŋ.

Anó zənə asi nwi

¹² Amaʼazənə abə tom Atemas kə Tayikikus inigə, zi ikay yibi zaʼa ikuw aŋu á Nikapolis damugə mə si ka kwi ayi chomo awu amaʼazənə imbayn mə zuwə azəd.

¹³ Zi ikay yabi cha Apolos nə Zenas ŋunə u kyay unoʼo. Zən kwi umbə nə ughəy jum mbənə umə kaba.

¹⁴ Nibi zən kwi umba ba kweme anó imə ghəy ichuŋ da iwere u mbənə ughəy ibəw abú úŋwən. Ka úŋwən mə uma ba nu umə ghəy unó nu cha udi ikoʼoro.

¹⁵ Ba jum mbənə umə akəŋ aboʼo nyi cha achaʼara inigə. Nibi chaʼara ba Kristo jum mbənə u wuʼi ngwa. Nwiye ghəy ichuŋ inen umbən jum.