Titus 2 - Aŋwaʼanayn Uso Fey

Anó zənə Tayitus mə tey abú ifere ba Kristo tənə imə Kret

¹ Amə da ngwə Tayitus, tey aba unó mbənə amə unó asiʼ nu amə u mbənə ukoʼoro.

² Taʼa anóm mbənə umə sə nunə kwi u ni boro inyo, tey kwi u mbənə iwe, u ni yimə inyo. U tey kwi ibeni ma si ka, u wuʼ unya uma nibi yimə fiŋ.

³ Ichin ichin nibi ghayn abú ayey mbən umə sə nunə kwi u chomo akə uzayn zayn, ka umə chiŋe uma ikum ba kə məŋi isob abú unó. Úŋwən amə ayey nu umə itey uno mbənə u boŋo,

⁴ da itaʼa ayey ubó kwi u wuʼ inom uma nibi wuʼ buŋ uma,

⁵ kwi uni yimə inyo ichomo aba nə inom uma, kwi ukyay mugə ni isiy na uma anji chuŋ, uni aghəy uno chuŋ nibi wumine inom uma. Mbən bə aghəy nigə cha ba mi ghayn uma unó iboŋ da inayn Nwiye.

⁶ Ichin ichin nibi ghayn abú ujoŋ kwi u yimə inyo ma.

⁷ Akə unó jum, ngwə tey anwini abú úŋwən imə aghəy unó chuŋ. Tey unó abú úŋwən anji chuŋ akə fiŋ jum.

⁸ Ghayn aba inayn zənə ikoʼoro nu cha wa mi zəw ma anó iboŋ moʼ ungɨŋ. Ngwə bə aghəy nigə, indere atəw yi yimə umba ba bana damugə ayi mə cha anó iboŋ moʼ abú úŋwən ighayn da ngwa.

⁹ Ghayn abú isob kwi uni wumini mbaʼ afaʼa uma nibə aghəy kwi fiŋ uma iboŋo anji zənə umə ighəy unó jum anji chuŋ. Ka umə iwere uma inayn abú uŋwən.

¹⁰ Ka umə ijiyə uma aghəy moʼ. Úŋwən tey kwi mbi mə ba chuŋ nibi tey kwi mbi yə faʼa akə iti fiŋ jum. Umbi aghəy nigə da itey kwi akə unó jum mbi yə aghəy ba wuʼ ni zəw inayn Nwiye ŋunə yə́ chi ngwa angəʼ.

¹¹ Nwiye ghəy kwi mba kyay ichuŋ ma da yə chi ba jum angəʼ.

¹² Ichuŋ wu yə aghəy kwi mba ton unó mbənə umə aghəy kwi ka mba wumine ngwa Nwiye nibi ton u mbənə umə aghəy kwi mba ni zi fiŋ akə ughəy igun isəg. Mba ni yimə inyo wumine Nwiye, ichomo ungɨŋ isəg akə inji zənə ikoʼoro.

¹³ Mba zi ikono ni nəmə aborobod zənə Nwiye kaʼa ina. Aborobod wu yi zaʼa akə amaʼazənə ungwa Nwiye kyay nu amə ungwa Asɨyisəg Yeso Kristo mi buw nə iwumini.

¹⁴ Yeso Kristo naʼa inyo ma da iziya umba utəw akə unó iboŋ jum. Yə nibi naʼ da ighəy kwi mba zayn boʼo mba mə ba nu u zi atəw ni aghəy unó chuŋ.

¹⁵ Ghayn unó mbəŋ, num ikay jum zənə Kristo naʼa inigə izi ikay abú ba awu, nibi num inayn wu ikyayn abú úŋwən. Ibeni ayə kwi wa moʼ tebe ayə.