Titus 1 - Aŋwaʼanayn Uso Fey

Achaʼara

¹ Amə umugə Pol nu amə wa faʼa Nwiye nibə mə wa tom Kristo a ŋwaʼanayn aŋwaʼanayn zəŋ. Nwiye choʼo aŋu kwi a ghəy kwi ibeni ba mbənə u choʼo kara, foro kwi u kyay asiʼ ŋunə u ghəy kwi uŋwən chomo akə inji zənə Nwiye kaba.

² Asiʼ wu yi aghəy kwi mba niŋi ikono igun itəni nu cha imi noʼo imey nu Nwiye kaʼa. Nwiye ŋunə cha umə figə ma unó, yə kaʼa itəni zəŋ ki yə sə tana isəg.

³ Akə amaʼ yə koʼo, Nwiye chi ngwa angəʼ ghəy kwi ba kyay asiʼ wu numugə yə zi ukən wu ungɨŋ umbəŋ ubugə.

⁴ Ayə ŋwaʼanayn inigə Tayitus nu amə uŋu wa asiʼ anji zənə umugə nə uŋwən mba beni Kristo. Nwiye Mbaʼ nə Yeso Kristo ŋunə yə chi ngwa angəʼ aghəy chuŋ inigə nibi naʼa aborobod inigə.

Unó mbənə Tayitus mi aghəy a Kret

⁵ Aton zənə mə́ sayn yə a Kret amə kwi ngwə tana unó jum mbənə u buʼe ungɨŋ ufere ba Kristo. Mə nibi sayn yə awu kwi ngwə choʼo ba mbənə umi mə cha ifere ba Kristo ungɨŋ usin jum mbənə umə Kret aba anji zənə mə si ghayn inigə.

⁶ Wa ŋunə umə cha ifere ba Kristo amə wa ŋunə cha ugow ma anó moʼ. Amə wa ŋunə umə aba nə uyey feyn. Buŋ ma u beni Kristo. U ka uma buŋ nu umə ighəy abigə kə ighəy izəw.

⁷ Numugə atəw akə ufere ba Kristo amə wa nu umə faʼa abú Nwiye. Amə wa nu cha usaʼ moʼ igun ma. Ka wa nu umə jimə ba. Ka amə wa nu umə isə itəm. Ka amə wa nu umə nugə unoʼ ibigə. Ka amə wa nu umə zoŋo. Ka amə wa nu umə ighəy adoʼ akə ukab.

⁸ Amə wa nu umə num ba akuw ma. Amə wa nu umə wuʼe aghəy zənə a boŋo. Amə wa nu umə ighəy unó nə iwe. Imə wa nu u təm ikoʼoro ifigi Nwiye. Amə wa nu umə chomo uzayn zayn nibə mə wa nu umə yimə inyo.

⁹ Amə wa nu umə yimə inayn Nwiye zənə u tey abú uŋwən, da uŋwən mi mə itey asiʼ da anó Nwiye akə nji zənə ikoʼoro, foro kwi uŋwən yi mə itey abú ba mbənə umə taŋa unó Nwiye kwi, unó mbənə umə taŋa amə unó asiʼ.

¹⁰ Ayə ghayn ney damugə ba nanaʼ mbə awu nu cha umə wumini ba kyayn, amara mə ba Jû nu u mə yeŋ yə tama ba ghayn kwi ubi ki iney uma ikad anóm cha Nwiye mi chi ma úŋwən angəʼ. U mbə yə ghayn inayn nu cha iwe awu yə tama ba.

¹¹ Ayə ghayn kwi ngwə aghəy u kəbərə uchəw uma damugə umbə bure inebey jum numugə umbə itey unó mbənə cha mbə mi mə tey. U mbə aghəy nigə da umi mə aghəy ukab akə inji zənə iki koʼoro ma.

¹² Wa moʼ akaʼa úŋwən nu amə wa ukən unwiye ibuw ibuw ghayn kwi, “Ba Kret mbə figə unó uma jum. Umbə aghəy unó izəg, cha umə faʼa asɨmə umbə kaba ijəg azəd.”

¹³ Anó zənə yə́ ghayn amə anó asiʼ anigə ngwə chere úŋwən akə ikay da ibeni uma mi kara.

¹⁴ Anigə cha umi gha izwaray iboʼ iko tənə ba Jû mə tana, kə izwara unó mbənə ba mbənə u ton asiʼ mə ghayn.

¹⁵ Unó jum mbə zayn abú ba mbənə fiŋ uma mə zayn. Asɨmə, cha umə zayn abú ba mbənə cha fiŋ uma mə nibə zayn. Cha imə zayn damugə cha u zi fiŋ uma igun Kristo damugə unó iboŋ si nyi ungɨŋ ikono uma nibi nyi ungɨŋ fiŋ uma.

¹⁶ U mbə ghayn kwi, mbə kyay Nwiye, asɨmə unó mbənə umə aghəy tey kwi mbə ton uŋwən. U mbə aghəy izəw. Cha umə wumini Nwiye. Cha umə aghəy anó chuŋ moʼ.