Roman 9 - Aŋwaʼanayn Uso Fey

Ba mbənə Nwiye choʼo

¹ Ayə ghayn asiʼ numugə amə akə ibumi nə Kristo. Cha amə figə aŋu unó. Azugə zənə amə ungɨŋ inyi fiŋ si ghəy a kyay kwi cha amə figə aŋu unó.

² Akinine ingəʼ nu cha inwi si sugi ungɨŋ inyi fiŋ.

³ Mə kaŋa kab kwi nji Nwiye zi indon igun iniŋ, ighaba aŋu akə ibumi zənə mba mə awu ni Kristo da atəw umbəŋ unya anom mbənə mba duw unebey feyn.

⁴ Úŋwən mə ba Izre. Nwiye si num úŋwən akə buŋ ma, anigə ghəy u zən uzayn zayn. Yə səŋ usó nə úŋwən, inaʼ unoʼo abú úŋwən ighəy uni wumine uŋwən nibi kaʼ unó nanaʼ abú úŋwən.

⁵ Úŋwən mə buŋ akə u mbaʼ imbey inebey Izre. Uŋunə Nwiye zoʼo du ungɨŋ unebey wu. Uŋwən amə Nwiye ŋunə umə tumə ughəy ujum. Mba yere uŋwən koŋ. Amə nigə.

⁶ Akə ghayn aŋu kwi inayn Nwiye chigə ibuw. Mbən kyay kwi, akə ma ba Izre ujum nu amə ba Nwiye,

⁷ kə buŋ ujum akə aghaŋ Abraham nu amə buŋ Nwiye. Nwiye ghayn abú Abraham kwi, “Amə anjim Azik nu ngwə mi mə nə buŋ mbənə mə kaʼa inigə.”

⁸ Zəŋ tey kwi, akə ma buŋ akə aghaŋ Abraham nu amə buŋ Nwiye. Amə buŋ mbənə Nwiye kaʼa anó abú úŋwən nu amə buŋ akə aghaŋ Abraham.

⁹ Anó zənə Nwiye kaʼa amə kwi, “Amaʼ yi bə koʼo, ayi wene izaʼa anigə Sera yi ibə́ ŋwə̂ anom.”

¹⁰ Akə ma jum zigə. Rebeka mə mi buŋ anom ubigə nu aba mbaʼ feyn yə ibə́ úŋwən. Mbaʼ wu mə, Azik ungwa mbaʼ imbey.

¹¹ Asɨmə ki Rebeka sə ŋu ibə́ úŋwən, kə buŋ wu sə ŋu ghəy anó chuŋ kə anó iboŋ, anigə amə da anó zənə Nwiye choʼ ba ma ŋu imbey,

¹² akə ma da anó moʼ nu mbə ghəy, amə da mugə Nwiye tiya úŋwən. Nwiye ghayn abú úŋwən kwi, “Wa imbey yi sə faʼa abú uyə anjim.”

¹³ Ayə ungɨŋ Aŋwaʼanayn Nwiye kwi, “Mə wuʼe Yakob ton Esawu.”

¹⁴ Anigə mba ghayn kwi ingiya? Kwi Nwiye yə ghəy unó nu cha ukoʼoro? Akə ma nigə!

¹⁵ Yə ghayn abú Mose kwi, “A yi diri wa ŋunə a wuʼi idiri Nibi kənə akə wa ŋunə a wuʼi ikənə akə uŋwən.”

¹⁶ Anigə amə kwi, cha Nwiye mi diri ma ba anji zənə ba inyoŋ atəw kaba, kə da anó moʼ zənə u ghəy. Nwiye yi idiri ba anji zənə u wuʼi.

¹⁷ Ayə ungɨŋ Aŋwaʼanayn Nwiye kwi, Nwiye ghayn abú ufon Fero kwi, “Mə zi ayə akə ufon da inum ayə itey inyi ikay. Ayi ghəy kwi ba ghayn anó da aŋu ungɨŋ isəg ijum.”

¹⁸ Anigə Nwiye yi diri wa ŋunə ukaba kwi idiri. Uŋwən yi nibi itu fiŋ wa ŋunə u kaba kwi fiŋ ma tu.

Nwiye yə isɨy itəm nibi idiri ba

¹⁹ Mbən yi biri iniŋ kwi, “Abə mə ney Nwiye si mə zi usaʼa atəw ba da ingiya? Amə ngwa amə ghəy u ton anó zənə Nwiye kaba?”

²⁰ Ungwə wa inyoŋ atəw mə ngwa ibiri iywiri inayn abú Nwiye? Cha ikyɨŋ zənə u buŋi mə ibiri ma abú wa ŋunə u buŋi iŋwən kwi, “Ngwə buŋi aŋu ney da ingiya?

²¹ Cha ikyɨŋ isəg mə ma nə ikay igun wa ŋunə u buŋi iŋwən. Wa wu kyay umugə inum abimi sey feyn ibúŋ akyɨŋ abigə awu. Ifeyn uni bira amaʼa anó kyay, ifeyn uni bira uney ujum.”

²² Nwiye yə kaba itey isɨy itəm nibi ghəy kwi ba kyay ikay ma. Asɨmə yə́ kaŋa yimə fiŋ da ba mbənə mbə ghəy kwi usɨy itəm. Ba mbənə mbə́ ghəy kwi usɨy itəm amə u mbənə umi iku.

²³ Yə nibi kaba itey imbon zənə inaʼa chigə nu cha imi noʼo mey nu amə imbon zənə yə́ tey igun ba mbənə yə́ diri.

²⁴ Mba mə ba mbənə yə́ tiya ngwa. Cha yə di tiya ngwa aba akaʼa ba Jû, yə nibi tiya akaʼa ba mbənə akə ma ba Jû.

²⁵ Yə si ghayn ungɨŋ aŋwaʼanayn zənə wa ukən Nwiye Hosiya ŋwaʼanayn kwi, “Ba mbənə akə ma umbəŋ, ayi tiya akə umbəŋ ba Ba mbənə cha mə di wuʼe, Ayi tiya akə ba mbənə a wuʼi kwaʼa azəd,

²⁶ Ungɨŋ usin mbənə mbə́ ghayn abú úŋwən kwi, ‘cha mbən mə ngwən umbəŋ ba,’ Umbi tiya úŋwən awu kwi buŋ Nwiye ŋunə umə ni ikay.”

²⁷ Azaya ighayn da ba Izre kwi, “Kanə di mə kwi ba Izre umbə naʼa nə asɨkwaʼ zənə amə ungɨŋ iba, abə ma kere umi du angəʼ,

²⁸ Damugə Asɨyisəg yi yabi sob usaʼa ba igun isəg ighari feyn.”

²⁹ Azaya nibi ghayn kwi, “Adi mə kwi cha Asɨyisəg ŋunə umə nə ikay jum di siy ma buŋ moʼ ina, Nji yə mi iniy ngwa anji zənə yə niy sodom nə Gomora.”

Pol chaʼara Nwiye igun ba Izre

³⁰ Mba mə ghayn kwi ingiya? Mba yə ghayn kwi ba mbənə akə ma ba Jû nu cha mbə kaba anó ni itəm ikoʼoro si təm ikoʼoro anjim ibeni.

³¹ Cha ba Izre mbənə mbə́ mə́ kaba kwi mbə təm ikoʼoro anjim unoʼo təm ikoʼoro damugə cha mbə siy uma unoʼo wu.

³² Aton mə da ingiya? Amə damugə cha mbə kaba anó ni təm ikoʼoro anjim ibeni. Mbə ghayn kwi anó ni təm ikoʼoro amə anjim unó mbənə umə ghəy. Anigə mbə tamana igun “itey zənə ba mə tamana igun.”

³³ Ayə ungɨŋ Aŋwaʼanayn Nwiye kwi, “Zən mə si sey itey a Zayon nu imi ghəy kwi ba tamana, Ukob nu umi ghəy kwi u gow, Cha Nwiye mi naʼa ma indere atəw abú wa ŋunə u zi fiŋ inyo ma.”