Roman 8 - Aŋwaʼanayn Uso Fey

Anó imə ikay anjim ikay zənə Azugə Nwiye naʼa

¹ Akinine cha wa moʼ awu amə ghəy u zi usaʼa igun ba mbənə umə akə anó feyn nə Yeso Kristo,

² damugə noʼo ŋunə Azugə Nwiye mə naʼa nu amə ighəy kwi ba jəg itəni umugə umə akə anó feyn nə Yeso, si cha aŋu ungɨŋ unoʼo mbənə umə ghəy kwi wa ghəy unó iboŋ anigə iku.

³ Anó zənə cha noʼo ghəy ma damugə nyə̂ inyo mə ibó, Nwiye si ghəy. Yə ghəy nigə anji zənə yə cha Ŋwə̂ ma u zaʼa chomo ni wa unó iboŋ da iniy unó iboŋ. Anigə yə iniy unó iboŋ anji zənə yə naʼa inyo ma akə ghəy ifá.

⁴ Nwiye ghəy ney da unó mbənə u koʼoro anji zənə amə ungɨŋ unoʼo a duw akə asiʼi ungɨŋ umba mbənə mba chomo akə nji zənə azugə kaba, akə ma akə inji zənə nyə̂ inyo mbə kaba.

⁵ Ba mbənə umə chomo akə inji zənə nyə̂ inyo kaba, umbə zi fiŋ uma igun ughəy mbənə nyə̂ inyo kaba. Amə umba mbənə mba mə chomo anji zənə Azugə Nwiye kaba mba yə zi ita fiŋ akə ughəy mbənə Azugə Nwiye kaba.

⁶ Wa bə zi fiŋ igun ughəy mbənə nyə̂ inyo mə kaba, u yi ku asɨmə ngwə ba zi fiŋ igun ughəy mbənə Azugə Nwiye mə naʼa ngwə yi jəg itəni nibi chomo akə aborobod.

⁷ Ayə ney damugə wa ŋunə u zi fiŋ akə ughəy mbənə nyə̂ inyo mə kaba yə ghəy unó mbənə cha Nwiye kaba. Cha umə num ma unoʼo Nwiye. Amə asiʼ kwi cha umi noʼo inum.

⁸ Cha ba mbənə u mə́ ghəy unó mbənə nyə̂ inyo kaba mə ghəy uma kwi fiŋ Nwiye boŋo.

⁹ Ka mbən mə ghəy ngwən unó mbənə nyə̂ inyo mə kaba, asɨmə mbən ghəy amə u mbənə Azugə Nwiye ghayn inen. Anigə mbən yi zən kwi Azugə Nwiye yə kaŋa ungɨŋ inen. Wa ŋunə cha Azugə Nwiye ungɨŋ ma, cha uŋwən mə ma wa Kristo.

¹⁰ Kristo bə́ mə́ ungɨŋ inen, ka nə itən nyə̂ inyo ku da unó iboŋ, Azugə Nwiye yə ikay ungɨŋ inen damugə mbən si təm ikoʼoro.

¹¹ A bə mə kwi Azugə Nwiye ŋunə yə zəmə Kristo yə ungɨŋ inen, nji uŋwən ŋunə yə zəmə Kristo yi naʼa itəni abú itən nyə̂ inyo tənə imə ku. U yi ghəy nigə anjim Azugə ma zənə amə ungɨŋ inen.

¹² Anigə umbəŋ unya, mba mə ba njugə, asɨmə akə ma da ichomo akə inji zənə nyə̂ inyo kaba.

¹³ Mbən bə mə chomo akə inji zənə nyə̂ inyo kaba, mbən yi ku. Asɨmə mbən bə chigə anjim Azugə Nwiye zwere unó iboŋ mbənə nyə̂ inyo mə ighəy, mbən yi tənə.

¹⁴ Ba jum mbənə Azugə Nwiye mə tumə úŋwən amə buŋ Nwiye.

¹⁵ Cha azugə zənə Nwiye si naʼ inen mi ghəy ma kwi mbən beni isob anigə ghəy mbən ki goro. Asɨmə azugə wu si ghəy ngwən mbən məŋə buŋ Nwiye. Amə Azugə Nwiye ghəy kwi mba kyayn kwi, “Mbaʼ! Uŋu Mbaʼ!”

¹⁶ Azugə wu bumə nə inja azugə ighəy kwi mba mə buŋ Nwiye.

¹⁷ Numugə mba mə buŋ ma, mba yi bumə nə Kristo imə nə ughəy mbənə mbaʼ siy abú buŋ ma. Mba ni zəw ingəʼ nə Kristo da mba mi mə nə iwumini zənə Nwiye mi naʼ abú uŋwən.

Uzayn zayn ŋunə umi zaʼa

¹⁸ Mə kyay kwi cha ingəʼ zənə mba mə zəw akinine koʼo ma akə uzayn zayn ŋunə Nwiye mi itey ina.

¹⁹ Ughəy ujum mbənə Nwiye tana, u mbə kaŋa nəmə kwi u tey buŋ mbənə amə uma,

²⁰ damugə ughəy ujum mbənə yə́ tana mbə́ mi chigə ibuw. Akə ma kwi mbə́ kab nigə. Umbi chigə anji zənə wa ŋunə yə tana ughəy wu kaba nibi siy ikono ni nəmə

²¹ kwi u yi chiyə ughəy mbənə yə tana da ka ufigi uma. U yi ghəy kwi u chomo akə ungɨŋ zayn zayn damugə mba mə buŋ ma.

²² Mba kyay kwi ipey akinine, ughəy ujum mbənə Nwiye tana umbə zəw ubuʼ nə ayey ŋunə umə nomo ibə́.

²³ Akə ba u ghəy mbənə Nwiye tana nu umə zəw ubuʼ. Umba mbənə Azugə Nwiye mə ungɨŋ ina nu Azugə wu amə uneʼe imbey ŋunə Nwiye naʼa ina, mba yə nibə zəw ubuʼ ungɨŋ ita fiŋ numugə mba mə nəmə kwi Nwiye num ngwa akə buŋ ma da iziya umba utəw.

²⁴ Numugə mba siy ita ikono awu, Nwiye si chi ngwa angəʼ. Ughəy mbənə mba zən i siy ita ikono awu, akə ma unó ni mba mi siy ikono awu. Amə ngwa umə siy ikono ni nəmə ghəy zənə umə zənə?

²⁵ Abə mə kwi mba siy ita ikono ni nəmə ghəy zənə cha mba mə zənə, nji mba yi nəmə iyimə fiŋ.

²⁶ Amə nibi ichin ichin nu azugə zaʼa iywere ngwa anji zənə mba mə ibó damugə cha mba kyay umugə ichaʼara Nwiye anji zənə mba mi chaʼara. Asɨmə amaʼazənə cha anó ina ighayn, azugə wu yə chaʼara Nwiye akə inja ighari.

²⁷ Anigə Nwiye ŋunə u kyay unó mbənə umə ungɨŋ fiŋ ba, ikyay ikono tənə azugə biri damugə azugə yə chaʼara Nwiye igun ba Nwiye akə inji zənə Nwiye kaba.

²⁸ Mba kyay kwi akə unó ujum, Nwiye yə faʼa kwi ba mbənə u wuʼi uŋwən u zən ichuŋ. Anigə amə ba mbənə u tiya kwi amə umbi ba anjim zənə yə si isiy.

²⁹ Ba mbənə Nwiye si choʼo, yə siy kwi umbi chomo ni Ŋwə̂ ma da ŋwə̂ yi mə Ŋwə̂ imbey ungɨŋ unebey kyayn.

³⁰ Ba mbənə Nwiye choʼo, yə nibi tiya akə umbi, u mbənə yə tiya yə nibi ghəy u təm ikoʼoro. U mbənə yə ghəy u təm ikoʼoro, yə nibi ghəy umə nə iwumini.

Nwiye wuʼe ngwa numugə mba mə akə ibumi nə Yeso Kristo

³¹ Mba mi ghayn kwi ingiya da anó zəŋ? Nwiye bə mə ni umba, amə ngwa amə ghəy u chigə ngwa?

³² Nwiye bi ki yimə ma ŋwə̂ ma asɨmə yə́ naʼ uŋwən nə aghəy ifá kwi u zaʼa iku da umba utəw umba jum, ka umi naʼa ughəy chini nanaʼ ina izwey aboʼo Ŋwə̂ ma?

³³ Amə ngwa mi zi usaʼa igun ba mbənə Nwiye choʼo? Amə Nwiye ma mboŋ beni kwi mbə təm ikoʼoro.

³⁴ Amə ngwa umi ghayn kwi mbə gow usaʼa? Awaʼa Yeso Kristo ŋunə yə kuw nu Nwiye zəmə, u chomo aba bugə jəgi Nwiye ni chaʼara uŋwən igun umba utəw?

³⁵ Amə ngwa umi ghaba ngwa akə inji zənə Kristo wuʼi ngwa? Amə ingəʼ, kə amə unó kaka, kə amə anó ni inwini inya ughəw, kə amə injəy, kə amə ukwaŋ kə anó imə ungɨŋ ingəʼ kə iwuʼ?

³⁶ Ayə ungɨŋ Aŋwaʼanayn Nwiye kwi, “Da ayə, ba mbə zwere ngwa uney ujum. Umbə numə ngwa ni injəg zənə umə ŋu kyeme.”

³⁷ Indəʼ, ungɨŋ unó mbəŋ ujum, mba chigə uŋwən ŋunə uwuʼi ngwa.

³⁸ Mə kaŋa kyay kwi ka aba iwu kə itəni, kə mbə angəd, kə ughəy mbənə umə aton azobo, kə ughəy mbənə umə akinine, kə ughəy mbənə umə zaʼa,

³⁹ kə ughəy mbənə umə azobo, kə ughəy mbənə umə ungɨŋ isəg, kə ughəy moʼ chini akaʼa ughəy mbənə Nwiye tana, amə ghəy ughaba ngwa akə inji zənə Nwiye wuʼi ngwa numugə mba mə akə ibumi nə Yeso Kristo ungwa Asɨyisəg.