Roman 7 - Aŋwaʼanayn Uso Fey

Anó ni kweme akə inama

¹ Umbuŋ unya, ayə ghayn anó zənə abú umbən mbənə mbən kyay unoʼo. Cha mbən di kyay kwi unoʼo mbə yimə wa aba akə ama zənə umə ikay?

² Unoʼo mbə yimə ayey nama abú unom ama zənə unom mə ikay. Asɨmə unom wu bə si ku, cha unoʼo wu mə nə yimə ma uŋwən.

³ U bə chomo nə anóm chini Amaʼazənə unom ma mə bugə ikay, umbi tiya uŋwən kwi u yə niŋe unom ayey chini. Asɨmə unom ma bə si ku, cha unoʼo wu mi yimə uma uŋwən. U bə nam anóm uchini, cha umi mə tiya ma uŋwən kwi yə num unom ayey chini.

⁴ Umbuŋ unya, amə ichin ichin kwi cha unoʼo mə u ma nə anó moʼ ighəy inen anjim nyə̂ inyo Kristo. Mbən mə ba mbənə Nwiye zəmə. Da mbən mə ba wa chini. Mbən mə ba ma da mbən faʼa abú Nwiye akə inji zənə ikoʼoro.

⁵ Amaʼazənə mba mə bugə ighəy unó iboŋ, inyaŋara imə ighəy unó iboŋ mə noʼo ungɨŋ ita inyo damugə amə unoʼo mbə mə ibeʼere. Mbə́ mə́ aghəy mba ni aghəy unó nu umi aghəy mba kuw,

⁶ asɨmə akinine, Nwiye si chi ngwa aton unoʼo damugə mba si ku da u aghəy mbənə mbə́ yimə ngwa ni ba indəŋ. Anigə amə da mba faʼa akə nji fey zənə imə ina anjim Azugə Nwiye, nu akə ma aton unun unoʼo mbənə mbə́ ŋwaʼanayn.

Unoʼo mbə aghəy kwi ba aghəy unó iboŋ

⁷ Mba mə ghayn kwi ingiya? Kwi unoʼo amə anó iboŋ? Akə ma nigə! Asiʼ amə kwi, cha mə mi kyay aŋu aghəy zənə amə anó iboŋ ighari unoʼo di kə uma wu. Nji cha mə mi kyay aŋu anó ni iswene aghəy wa chini ighari unoʼo ki ghayn ma kwi, “Iswene ayə aghəy wa chini.”

⁸ Asɨmə unó iboŋ num apan ichigə anjim unoʼo wu ighəy kwi ba iswene adoʼ akə u aghəy ba chini. Anigə ighəy kwi amə nə ikudi inji ujum iswene adoʼ akə u aghəy ba. A di mə kwi cha unoʼo nji unó iboŋ si ku.

⁹ Mə́ mə chomo ikay Amaʼazənə amə cha unoʼo, asɨmə Amaʼazənə unoʼo zaʼa unó iboŋ gha noʼ anigə aku.

¹⁰ Noʼo ŋunə yə mi naʼa itəni yə zaʼa amə ni iwu,

¹¹ damugə anó iboŋ zən apan ichigə anjim noʼo wu tama aŋu izwere aŋu.

¹² Anigə unoʼo zayn, anó zənə Nwiye sobo nibi zayn. Yə təm ikoʼoro nibi boŋ.

¹³ Anigə yə tey kwi aghəy zənə yə boŋo waʼa zaʼa da izwere aŋu? Indəʼ! Amə unó iboŋ mbə́ chigə anjim unó mbənə u boŋo izwere aŋu. Anigə mba zən kwi unó iboŋ amə unó iboŋ, nibi zənə kwi, anjim unoʼo, unó iboŋ si nibi chigə abugə.

Iberd zənə imə maʼa ungɨŋ wa

¹⁴ Mba kyay kwi Azugə Nwiye yə ungɨŋ unoʼo asɨmə amə aba wa unyoŋ atəw. Mbə́ si fənə aŋu akə isob abú unó iboŋ.

¹⁵ Cha inyi atəw di zayn da unó mbənə amə ighəy damugə cha amə ghəy aŋu unó mbənə akabay. I yə aghəy amə unó mbənə amə bana.

¹⁶ Numugə amə aghəy amə unó mbənə cha amə kaba ighəy, yə tey kwi mə beni kwi unoʼo boŋ.

¹⁷ Anji zənə amə ney, akə ma umugə amə aghəy unó mbəŋ, amə unó iboŋ mbənə umə ungɨŋ iniŋ umə aghəy.

¹⁸ Mə kyay kwi cha anó chuŋ moʼ ungɨŋ iniŋ. Ayə ghayn ungɨŋ inyi nyə̂ inyo wa nyoŋ atəw. A yə kaŋa kaba ighəy ichuŋ asɨmə cha amə ighəy.

¹⁹ Cha amə ighəy ichuŋ zənə amə kaba ighəy, asɨmə ayə ghəy amə ibɨy zənə cha amə kaba ighəy.

²⁰ Abə mə aghəy unó mbənə cha amə kaba ighəy, yə tey kwi akə ma umugə amə ighəy. Amə unó iboŋ mbənə umə ungɨŋ iniŋ umə aghəy.

²¹ Anigə mə si zən kwi noʼo moʼ yə awu kwi abə mə kaba ighəy ichuŋ amə ibɨy mə zaʼa.

²² Mə kaŋa iwuʼ ighəy anó zənə unoʼo Nwiye mə ghayn nə iniy fiŋ ujum,

²³ asɨmə ayə zən noʼo chini ungɨŋ umbəŋ usin inyo umə maʼa berd nu noʼo zənə imə ungɨŋ inyi fiŋ. Noʼo wu yə aghəy kwi a beni isob abú unó iboŋ mbənə umə ungɨŋ umbəŋ usin inyo.

²⁴ Amə kaŋa wa ingəʼ amə ngwa umi chi aŋu akə nyə̂ inyo zənə imə kaba kwi a kuw?

²⁵ Ayə naʼa yə beni ayə abú Nwiye anjim Yeso Kristo ungwa Asɨyisəg ungɨŋ inyi fiŋ. Anigə ungɨŋ inyi fiŋ, amə isob abú unoʼo Nwiye, asɨmə abú inyi nyə̂ inyo, amə isob abú unoʼo mbənə umə aghəy kwi wa aghəy unó iboŋ.