Roman 4 - Aŋwaʼanayn Uso Fey

Abraham zi fiŋ inyo Nwiye

¹ Amə anó ingiya mba mi ighayn da Abraham, u ngwə, mbaʼ imbey, akə inji zənə yi zi fiŋ inyo Nwiye?

² Abə mi kwi Nwiye béni kwi Abraham təm ikoʼoro da unó mbənə yə mə ighəy, nji yə mə nə anó moʼ ikomo iguwə da ngwən. Asɨmə akə ma ifigi Nwiye.

³ Amə́ ungɨŋ Aŋwaʼanayn Nwiye kwi ingiya? Ayə ungɨŋ kwi, “Abraham zi fiŋ inyo Nwiye anigə Nwiye beni kwi uŋwən təm ikoʼoro.”

⁴ Wa ŋunə umə faʼa umbə naʼa u choʼo afaʼa abú uŋwən. Uchoʼo afaʼa ma amə aghəy zənə yə mi num akə afaʼa zənə yə faʼa.

⁵ Asɨmə abú wa ŋunə cha umə zí ma atəw amə akə afaʼa, anigə u yə zi fiŋ ma amə inyo Nwiye ŋunə umə aghəy kwi ba mbənə umə aghəy unó iboŋ u təm ikoʼoro, amə da umugə uzi fiŋ ma inyo Nwiye nu Nwiye mi num uŋwən kwi yə təm ikoʼoro.

⁶ Ufon Dafid nibi ghayn da mugə Nwiye mi zi aborobod igun wa ŋunə utəm ikoʼoro. Cha Nwiye mi aghəy ma nigə damugə wa wu aghəy anó moʼ. Ufon Dafid ŋwaʼanayn kwi,

⁷ “Nwiye zi aborobod igun ba mbənə Usi waʼ ifana unó ma Nu u si nibi nyabay unó iboŋ uma.

⁸ Nwiye zi aborobod igun wa ŋunə cha umi ŋwaʼanayn ma unó iboŋ mbənə yə aghəy akə ukum ma.”

⁹ Nwiye waʼa zi aborobod zəŋ aba igun ba mbənə mbə́ ney ikad uma? Kə yə waʼa nibi zi foro igun u mbənə cha mbə́ di ney ikad uma? Mba mə ghayn kwi, Nwiye beni kwi, Abraham təm ikoʼoro da ibeni ma.

¹⁰ Nwiye beni kwi yə tən ikoʼoro amaʼa ingiya? Amə Amaʼazənə mbə́ si ney ikad ma kə amə Amaʼazənə cha mbə́ di si ney ikad ma? Nwiye béni uŋwən ki usi ney ikad ma.

¹¹ Mbə ney ikad Abraham itey anwini kwi yə si təm ikoʼoro. Yə aghəy nigə anjim mugə yə mə ni ibeni nu cha udi si ney ikad ma. Amə aton zənə Abraham mə́ mbaʼ kyay abú ba mbənə u zi fiŋ inyo Nwiye asɨmə cha u di si ney ikad uma. Nwiye aghəy kwi u təm ikoʼoro anjim ibeni uma.

¹² Abraham mə nibə mbaʼ kyay abú ba mbənə u si ney ikad uma. Akə ba kwi mbə si ney ikad uma, amə nibə kwi mbə́ beni aboʼo ibeni zənə imə abú ungwə mbaʼ kyay Abraham ki mbə́ sə ney ikad uma.

Ba mbi mə nə unó mbənə Nwiye kaʼa anjim ibeni

¹³ Cha anó zənə Nwiye kaʼa abú Abraham foro abú ba akə aghaŋ ma kwi umbi jəg isəg dí zaʼa ma anjim unoʼo. Yə zaʼa anjim ibeni zənə yə aghəy kwi u təm ikoʼoro.

¹⁴ Abə mə kwi amə ba mbənə umə isɨyə unoʼo u mi jəg isəg, nji ibeni amə anó ibuw, unó mbənə Nwiye kaʼa amə nibə unó ibuw,

¹⁵ damugə unoʼo mbə aghəy kwi Nwiye isɨy itəm. Mba kyay kwi asin zənə cha unoʼo awu, cha anó ni gow anó awu.

¹⁶ Nwiye kaʼa u aghəy anjim ibeni, da anjim ichuŋ ma buŋ ujum akə aghaŋ Abraham u mbi jəg u aghəy mbənə yə kaʼa. Cha u aghəy mbənə yə kaʼa amə ma aba abú ba mbənə umə isɨyə unoʼo, amə nibə abú ba mbənə u beni anji zənə Abraham nibi beni. Abraham amə mbaʼ ina umba ujum.

¹⁷ Ayə ungɨŋ Aŋwaʼanayn Nwiye kwi, Nwiye ghayn abú Abraham kwi, “Mə si aghəy ayə mbaʼ igun ubey nanaʼ.” Abraham mə u ngwa mbaʼ ifigi Nwiye ŋunə yə zi fiŋ ma inyo ma. Uŋwən amə Nwiye ŋunə umə naʼa itəni abú uwu ba. Uŋwən yə nibə aghəy u aghəy mbənə cha kwi umə awu.

¹⁸ Abraham beni anigə iniŋi ikono ma awu, ka di ma kwi amə cha aton iniŋi ikono kwi uyi mə mbaʼ igun ubey nanaʼ. Nwiye kaʼ abú uŋwən kwi, “buŋ akə aghaŋ mbi mə kaŋa inaʼa nə itəni.”

¹⁹ Cha ibeni ma da ibó Amaʼazənə yə zən kwi nyə̂ inyo ma si nun chomo nə mə awu aghəy. Yə mə sə ŋuw ka ituʼ ukɨy feyn amaʼa wu. Cha ibeni ma nibi ibo ma Amaʼazənə yə zənə kwi cha uyey ma Sera mi ibə́ ma.

²⁰ Cha ibeni fiŋ ma di ibó, anigə cha yə məŋərə ma akə anó zənə Nwiye kaʼa. Ibeni fiŋ ma kara anigə yə yere Nwiye.

²¹ Yə kaŋa ibeni ungɨŋ fiŋ ma kwi, “Nwiye yi aghəy anó zənə u kaʼa.”

²² Amə da ibeni Abraham nu Nwiye beni kwi yə təm ikoʼoro.

²³ Cha mbə ŋwaʼanayn uma inayn zənə imə ghayn kwi, “Nwiye beni kwi yə́ təm ikoʼoro” Aba abú uŋwən ma zeʼe.

²⁴ Mbə́ nibi ŋwaʼanayn ina umba mbənə Nwiye beni kwi mba si təm ikoʼoro anjim mugə mba beni uŋwən ŋunə yə́ zəmə Yeso ungwa Asɨyisəg.

²⁵ Nwiye naʼ uŋwən kwi ú zwere da umba unó iboŋ. Yə nibi zəmə uŋwən da mba təm ikoʼoro.