Roman 3 - Aŋwaʼanayn Uso Fey

Nwiye yə aghəy unó mbənə u kaʼa

¹ Ba mbənə amə ba Jû chigə ba mbənə akə ma ba Jû akə ingiya? Injim zənə wa mi jəg damugə mbə iney ikad ma amə ingiya?

² U yi jəg injim nanaʼ akə inji ujum. Anó imbey amə kwi, Nwiye dey zi inayn ma inya ubugə ba Jû.

³ Yə si ŋu ingiya nu cha u moʼ di beni u ma inayn wu? U mugə cha mbə di beni, a waʼa kwi cha Nwiye mi aghəy ma anó zənə yə ghayn?

⁴ Indəʼ, mba kyay kwi Nwiye yə ghayn asiʼ kanə di ma kwi ba ujum mə ba figə unó. A yə ungɨŋ Aŋwaʼanayn Nwiye kwi, “Ngwə tey kwi inayn zənə ngwə mə ghayn amə inayn nu ikoʼoro. Anigə ngwə yi chigə usaʼa wu Amaʼazənə u mə saʼa yə”

⁵ Umba unó iboŋ umbə itey kwi Nwiye yə aghəy unó mbənə ukoʼoro, nji mba mi ghayn kwi ngiya? Kwi cha Nwiye aghəy ma unó nu ukoʼoro Amaʼazənə yə siy itəm nə umba? (Ayə inayn anji zənə ba inyoŋ atəw umə inayn).

⁶ Ində! Abə mə kwi, cha Nwiye mə aghəy ma unó mbənə ukoʼoro, nji umi isaʼ isəg ingiya?

⁷ Unó figi mbənə a ghayn mbə aghəy kwi ba kyay asiʼ da Nwiye foro kwi u naʼa iwumini abú uŋwən, nji aton zənə umi zi usaʼa igun iniŋ kwi ayə aghəy unó iboŋ amə da ingiya?

⁸ Nji ba moʼ mbi ghayn kwi, “Mba ni aghəy unó iboŋ boʼo ichuŋ zaʼa” Ba moʼ si jimə ŋu anji zənə umə ghayn kwi mə ghayn anó zəŋ. Nwiye yi zi usaʼa igun uma akə inji zənə ikoʼoro.

Cha wa moʼ awu umə aghəy unó mbənə u koʼoro

⁹ Anigə mba ghayn kwi ingiya? Umba ba Jû waʼa boŋ chigə ba chini? Indəʼ, ka ba kere. Mba si tey kwi unó iboŋ mbə tumə ba ujum, kə mə ba Jû kə ba mbənə akə ma ba Jû.

¹⁰ Ayə ungɨŋ Aŋwaʼanayn Nwiye kwi, “Cha wa moʼ awu umə aghəy unó mbənə u koʼoro kaba ufeyn.

¹¹ Cha atəw wa moʼ di tana izayn da Nwiye. Cha wa awu nu u kaba ikyay Nwiye.

¹² Ba ujum si gha injim ma abú Nwiye, Cha umə aghəy unó mbənə Nwiye mə kabay. Cha wa moʼ awu umə aghəy ichuŋ kaba ufeyn.

¹³ Inayn tənə imə duw uchəw ma amə iwu. U mbə num uchəw itama ba, Inayn tənə imə duw uchəw ma chomo ni uniʼi ŋunə umə duw akə ijugə.

¹⁴ Aba inayn tənə imə naʼa indon imə duw ungɨŋ uchəw ma.

¹⁵ Mbə kyay umugə iyabi nod iŋu zwere wa.

¹⁶ Usin ujum mbənə umə ŋuw awu, u mbə yeŋ yə chiŋe u ghəy nibə yeŋ yə zi ingəʼ igun ba.

¹⁷ Cha ukyay uma umugə ni chomo akə aborobod

¹⁸ Cha ukyay uma kwi amə ghəy u wumine Nwiye.”

¹⁹ Akinine mba si kyay kwi unó mbənə unoʼo ghayn u mbə ghayn amə abú ba mbənə umə aton unoʼo, da ka umə uma nə anó moʼ igha ighayn. Anigə, Nwiye yi saʼ ba ujum mbənə umə ungɨŋ isəg.

²⁰ Cha wa moʼ awu nu u tem ikoʼoro ifigi Nwiye numugə umə aghəy unó mbənə umə ungɨŋ unoʼo. Unoʼo mbə aghəy amə kwi ba kyay kwi u mbə aghəy unó iboŋ.

Nwiye yi aghəy kwi ba tem ikoʼoro ifigi ma

²¹ Akinine, Nwiye si tey inji zənə amə aghəy ba tem ikoʼoro ifigi ma. Cha anó ni tem ikoʼoro ifigi ma mə ama nə anó moʼ ighəy nə unoʼo, kanə di ma kwi unoʼo Mose nə ba ukən Nwiye si ghayn nigə.

²² Nwiye si aghəy kwi ba ujum mbi itəm ikoʼoro ifigi ma anjim umugə ú beni Yeso Kristo. Cha Nwiye mə zən ma ikyaba akaʼa ba,

²³ damugə ba ujum si aghəy anó iboŋ, anigə cha uzayn zayn Nwiye di ni bere ma ungɨŋ ma.

²⁴ Nwiye si aghəy kwi ba təm ikoʼoro akə inji zənə u aghəy ichuŋ abú úŋwən. Ichuŋ wu amə uneʼe ŋunə u naʼa abú úŋwən anjim Yeso Kristo ŋunə yə ziya utəw uma.

²⁵ Nwiye cha uŋwən nə aghəy ifá da anəm ma səw umba unó iboŋ anjim umugə mba zi fiŋ inyo ma. Nwiye tey anjim iyimi fiŋ kwi mba yi aghəy unó mbənə ukoʼoro anji zənə cha yə zi ma ingəʼ atəw ba mbənə mbə́ mə aghəy unó iboŋ imbəy.

²⁶ Yə́ aghəy ney da itey kwi uŋwən yə aghəy unó mbənə ukoʼoro foro kwi uŋwən yə aghəy kwi ba mbənə u zi fiŋ inyo Yeso u təm ikoʼoro.

²⁷ Anigə mba ni komo iguwə da ingiya? Cha anó moʼ ina imə komo iguwə da aŋwen. Aton mə kwi ingiya? A waʼa da mugə mba num unoʼo? Indəʼ! Amə da mugə mba mə ni ibeni.

²⁸ Mba beni kwi wa təm ikoʼoro anjim ibeni ma, akə ma da mugə u aghəy unó mbənə umə ungɨŋ unoʼo.

²⁹ Nwiye waʼa aba Nwiye ba Jû? Uŋwən aka ma nibə Nwiye abú ba mbənə akə ma ba Jû? Aŋ, uŋwən mə nibə Nwiye abú ba mbənə akə ma ba Jû.

³⁰ Numugə Nwiye aba ufeyn, u yi aghəy kwi ba mbənə u ney ikad uma təm ikoʼoro anjim ibeni ma, nibi aghəy kwi ba mbənə cha u di iney ikad ma nibi təm ikoʼoro anjim ibeni ma.

³¹ Anigə mba waʼa waʼ unoʼo da ibeni wu? Ində? Mba yimə unoʼo wu anji chuŋ.