Roman 16 - Aŋwaʼanayn Uso Fey

Pol chaʼara ba moʼ

¹ Ayə kaba kwi mbən kyay kwi ungwa unya ayey Febe, ŋunə umə ywere ungɨŋ ufere ba Kristo ŋunə umə Senkriya uyə aghəy unó mbənə u koʼoro.

² Mbən num uŋwən akə ukum Asɨyisəg akə inji zənə ikoʼoro kwi unum ba Nwiye. Mbən ywere uŋwən nə aghəy moʼ zənə ubiri inen damugə uŋwən si ywere ba nanaʼ nibi ywere aŋu fən.

³ Mbən chaʼara Priska foro Akwila. Umugə nə úŋwən mba yə faʼa abú Yeso Kristo.

⁴ Úŋwən si ku da aŋu. Akə aba umugə amə naʼa yə beni ayə abú úŋwən, ifere ba Kristo jum tənə akə ma ba Jû tə nibi naʼa yə bini ayə abú úŋwən.

⁵ Mbən nibi chaʼara ufere ba Kristo ŋunə umə inyi ungɨŋ na uma. Mbən chaʼara Epenetus. Uŋwən amə inyi azi nu a wuʼi kwaʼa azəd. Uŋwən amə wa imbey idey beni Kristo aba abey Esiya.

⁶ Mbən chaʼara Meri. Uŋwən si ifaʼ inen kwaʼa akə ikay.

⁷ Mbən chaʼara Andronikus foro Juniyas. Umbuŋ ba Jû nu mba mə andəŋ nə úŋwən. Ba-tom Kristo kyay úŋwən kwaʼa anji chuŋ. Úŋwən dey beni Kristo ki umugə.

⁸ Mbən chaʼara Ampliyatus. Uŋwən amə inyi azi nu a wuʼi kwaʼa azəd numugə mba mə akə ibumi nə Asɨyisəg.

⁹ Mbən chaʼara Obanus. Uŋwən yə faʼa abú Kristo nə umba. Mbən nibi chaʼara Stakis. Uŋwən amə inyi azi nu a wuʼi kwaʼa azəd.

¹⁰ Mbən chaʼara Apeles. Uŋwən si tey kwi imə kwaʼa wa Kristo asiʼ. Mbən chaʼara ba mbənə umə ungɨŋ unebey Aristobulus.

¹¹ Mbən chaʼara Herodiyon. Uŋwən amə wa Jû ni umugə. Mbən nibə chaʼara ba Kristo mbənə umə ungɨŋ unebey Nasisus.

¹² Mbən chaʼara Trifəne foro Trifosa. Úŋwən umbə faʼa abú Asɨyisəg. Mbən chaʼara Pesi, uŋwən amə inyi azi nu awuʼi kwaʼa azəd. Uŋwən si faʼ kwaʼa akə ikay abú Asɨyisəg.

¹³ Mbən chaʼara Rufus, yə́ mə́ faʼa abú Nwiye ni fiŋ ma jum. Mbən nibi chaʼara ingo ma nu yə nibi chomo ni ingo iniŋ fən.

¹⁴ Mbən chaʼara Asinkritus foro Flegon foro Hemes foro Patrobas nə Hamas, nibi chaʼara ba Kristo mbənə umə nə úŋwən.

¹⁵ Mbən chaʼara Filologus foro Juliya foro Nerus nibi chaʼara unya ayey ma. Mbən nibi chaʼara Olimpas foro ba Nwiye ujum mbənə umə nə úŋwən.

¹⁶ Mbən chaʼara wa feyn feyn itey iwuʼi zənə imə akaʼa ba Kristo. Ifere ba Kristo ijum chaʼara ngwən.

Ikɨy tənə isi nwi

¹⁷ Umbuŋ unya, ayə boʼo ubugə inen kwi mbən iwey ngwən ni ba mbənə umə kaba izi aghaba akaʼa ba Kristo foro kwi ufaba inji. Umbə aghəy nigə da mbən ton unó mbənə mbən si kweme. Ka mbən ŋu ngwən iyad uma,

¹⁸ damugə cha ukudu ba mbəŋ mə faʼa uma amə abú Asɨyisəg Kristo. Umbə faʼa amə da ibum uma. Umbə numə inayn nəmə nəm nibə numə inayn boro boro itama ba mbənə cha ukyay anó.

¹⁹ Ba ujum si zəw numugə mbən mə wumine Asɨyisəg. Amə aton zənə iwuʼi sugi ungɨŋ inyi fiŋ da ngwən. Ayə kabay kwi mbən mə nə iwe imə aghəy aba unó chuŋ foro kwi mbən chomo ni ba nu cha udi kyay ighəy anó iboŋ.

²⁰ Nwiye ŋunə umə naʼa aborobod uyi woʼo Satan ighəy kwi mbən mə nə ikay igun ma. Asɨyisəg Yeso Kristo ghəy ichuŋ inen.

²¹ Timoti ŋunə mba mə faʼa nə uŋwən nibi cha achaʼara inen. Lusiyus nə Jasɨn foro Sosipata nu amə ba Jû ni umugə, mbə nibə chaʼara ngwən.

²² Umugə Tetiyus nu á ŋwaʼanayn aŋwaʼanayn zəŋ nibi chaʼara ngwən akə ukum Asɨyisəg.

²³ Gayus ŋunə amə chomo ana ma nu ufere ba Kristo mə inyi ana ma nibi chaʼara ngwən. Erastus nu amə uŋwən mə siyə ukab ungɨŋ asin zən foro Kwatus ungwa unya anóm nibi chaʼara ngwən. [

²⁴ Asɨyisəg Yeso ghəy ichuŋ inen umbən ujum! A mə nigə].

Achaʼara Nwiye nu asi nwi

²⁵ Mba yere Nwiye ŋunə u aghəy mba təm ikay anjim ukən chuŋ, anjim inayn zənə mə ghayn da Yeso Kristo foro anjim unó mbənə mbə noy akə agha sá, mbə si du asaŋ.

²⁶ Akinine mbə si toʼo unó wu asaŋ anjim uŋwaʼanayn mbənə ba ukən Nwiye ŋwaʼanayn ighəy kwi ubey ujum kyay. Nwiye ŋunə u təm koŋ si sob nigə da ubey ujum beni uŋwən nibi wumine uŋwən.

²⁷ Mba naʼa iwumini nu itənə akə ighari feyn anjim Yeso Kristo abú Nwiye yugə feyn nu umə nə iwe! A mə nigə.