Roman 15 - Aŋwaʼanayn Uso Fey

Mbən aghəy anó zənə fiŋ ba chini mi mə boŋo akə ma aba itən

¹ Umba mbənə ita ibeni fiŋ si ka, mba yimə fiŋ nə u mbənə cha ibeni fiŋ ma di si ka. Ka mba mə aghəy ngwa aba unó mbənə umi aghəy kwi ita fiŋ boŋo.

² Wa feyn feyn akaʼa inja aghəy kwi fiŋ unya ma boŋo da ú chomo anji chuŋ. U bə aghəy nigə, ibeni ma yi kara.

³ Cha Kristo di ghəy ma kwi aba fiŋ ma boŋo. Ayə ungɨŋ Aŋwaʼanayn Nwiye kwi, “Ijimi tənə ba mə jimə ngwən tə fwayn igun iniŋ.”

⁴ Unó ujum mbənə mbə́ ŋwaʼanayn ungɨŋ Aŋwaʼanayn Nwiye, amə da itaʼa ngwa, da anjim yimə fiŋ, foro anjim ikay zənə Aŋwaʼanayn Nwiye naʼa ina, mba yi siy ikono ni nəmə u aghəy mbənə Nwiye kaʼa ina.

⁵ Nwiye ŋunə umə aghəy kwi mba mə nə iyimi fiŋ, foro nə ikay fiŋ aghəy kwi mba chomo akə anó feyn nə umba unya numugə mba beni aboʼo Yeso Kristo,

⁶ da umbən ujum, mbən mi foro igeg iyere Nwiye foro Mbaʼ ungwa Asɨyisəg Yeso Kristo.

Ukən chuŋ yə nibə abú mbənə akə ma ba Jû

⁷ Mbən num wa feyn feyn anji zənə Kristo si num ngwən. Mbən aghəy nigə da inaʼa iwumini abú Nwiye.

⁸ Ayə ghayn inen kwi Kristo beŋe akə wa faʼa abú ba Jû da itey kwi Nwiye yə ighəy unó mbənə u ghayn, foro kwi uyi aghəy unó mbənə yə kaʼa abú umbaʼ imbey uma.

⁹ Yə́ aghəy nigə da ba mbənə akə ma ba Jû u nibi wumini Nwiye da inji zənə yə diri úŋwən. Ayə ungɨŋ aŋwaʼanayn kwi, “Ayi yere ayə akaʼa ba mbənə akə ma ba Jû Nibi kyugway ikiy iyere ayə.”

¹⁰ Ayə nibə ungɨŋ Aŋwaʼanayn Nwiye kwi, “Umbən mbənə akə ma ba Jû mbə ki wuʼe ngwən nə ba Nwiye.”

¹¹ Mbə́ nibi ŋwaʼanayn kwi, “U mbən ba ujum mbənə akə ma ba Jû yere Asɨyisəg Nibi aghəy kwi ba ujum yere uŋwən.”

¹² Wa ukən Nwiye Azaya nibi ghayn kwi, “Ŋwə̂ yi du akə aghaŋ unebey Jese, Nu umi tumə ba mbənə akə ma ba Jû Anigə umbi zi ikono uma igun ma.”

¹³ Nwiye ŋənə umə aghəy kwi mbən mə nə u aghəy ujum mbənə umə kono, u aghəy kwi iwuʼi sugi ungɨŋ itən fiŋ, nibi aghəy kwi mbən chomo akə aborobod numugə mbən beni uŋwən, da ikay zənə Azugə zayn zayn mə aghəy kwi itən ikono ŋuw imbey ni kwey akə unó mbənə Nwiye kaʼa.

Aton zənə Pol ŋwaʼanayn aŋwaʼanayn zəŋ akə fiŋ kaka

¹⁴ Umbəŋ unya, mə kaŋa kyay da ngwən kwi ichuŋ sugi ungɨŋ itən fiŋ, kwi mbən kyay unoʼ ujum foro kwi mbən kyay umugə imə taʼa umbən unya.

¹⁵ Ungɨŋ aŋwaʼanayn zəŋ, mə ŋwaʼanayn unó moʼ inen ni fiŋ kaka da ibeʼere umbən utəw da ichuŋ zənə Nwiye naʼa iniŋ

¹⁶ kwi amə wa faʼa Yeso Kristo da ba mbənə akə ma ba Jû. Ayə faʼa ni wa faʼa ambəŋ Nwiye imə ghayn ukən chuŋ da Nwiye boʼo ba mbənə akə ma ba Jû mə aghəy ifá zənə Nwiye beni, nu Azugə zayn zayn si aghəy kwi u zayn.

¹⁷ Umugə amə akə anó feyn nə Yeso Kristo, ayə nə aton imə komo iguwə da afaʼa zənə amə faʼa abú Nwiye.

¹⁸ Cha amə kaba ighayn aŋu anó chini, ayi ghayn aba zənə Kristo chigə anjim iniŋ ighəy. Yə aghəy kwi ba mbənə akə ma ba Jû wumini Nwiye anjim unó mbənə amə ghayn foro anjim unó mbənə amə ighəy.

¹⁹ Anjim unwini unó, anjim uyere unó foro anjim unó ikay zənə Azugə Nwiye naʼa. Anigə mə si ghayn ukən chuŋ da Kristo ungɨŋ usin jum inoʼ a Yerusanem iŋu pey aba abey Ilirikum.

²⁰ Anó zənə amə kaba amə kwi aghayn ukən chuŋ ungɨŋ usin mbənə cha ba u di si zəw uma anó da Kristo awu, da ka amə chimə aŋu igun atiy aghəy wa chini.

²¹ Ayə ungɨŋ Aŋwaʼanayn Nwiye kwi, “Ba mbənə cha udi si noʼo ghayn da uŋwən abú úŋwən umbi zən uŋwən. U mbənə cha u di si noʼo zəw da uŋwən umbi zəw utəw uma zayn.”

Pol tana kwi iyi ŋuw a Rom

²² Mə si kaŋa kaba ighari nanaʼ izaʼa izən ngwən, asɨmə unó moʼ kən aŋu.

²³ Asɨmə, numugə asi mara afaʼa ungɨŋ aba abey zəŋ, cha afaʼa chini adi ni bere, numugə asi kaŋa kab ighari nanaʼ izaʼa zən ngwən,

²⁴ mə kaŋa kono ungɨŋ inyi fiŋ kwi, ayi zaʼa izən ngwən amaʼazənə amə chigə ŋuw a Spen. Abə zaʼa, ayi chomo nə umbən akə ŋwə̂ amaʼ moʼ da mbən wyere cha aŋu amaʼazənə amə ŋuw.

²⁵ Akinine, ayə anji amə ŋuw Yerusanem. Ayə ŋu naʼa awere abú ba Nwiye mbənə umə awu.

²⁶ Ufere ba Kristo ŋunə umə Masedoniya foro uŋunə umə Akaya zən kwi yə boŋ kwi u chobo ukab inaʼ abú ba ukwaŋ mbənə umə akaʼa ba Nwiye mbənə umə Yerusanem.

²⁷ Ikono zəŋ amə iyi uma. Amə asiʼ kwi yə koʼoro kwi úŋwən aghəy nigə abú úŋwən damugə numugə ba mbənə akə ma ba Jû si foro ni ba Jû ijəg aborobod zənə Nwiye mə naʼa, amə asin uma iwyere ba mbənə akə ma ba Jû nə u aghəy mbənə Nwiye neʼe úŋwən wu.

²⁸ Amaʼazənə asi mara afaʼa zəŋ i naʼa ukab ŋunə mbə chobo abú úŋwən, ayi noʼ iŋu a Spen. Amaʼazənə ami mə ŋuw, ayi chigə yi zən ngwən.

²⁹ Mə kyay kwi amaʼazənə ami zaʼa izən ngwən, aborobod zənə Kristo naʼa ayi sugi igun inen.

³⁰ Umbəŋ unya, ayə boʼo ubugə inen anjim Asɨyisəg Yeso Kristo foro anjim iwuʼi zənə azugə naʼa ina kwi mbən foro aboʼo inyi ni tana chaʼara Nwiye iniŋ.

³¹ Mbən chaʼara Nwiye kwi u chiyə aŋu inya ubugə ba mbənə cha udi beni Kristo a Judeya. Nibi chaʼara kwi ba Nwiye mbənə umə Yerusanem num ukab ŋunə amə ŋu naʼ abú úŋwən.

³² Mbən ghəy nigə da Nwiye bə beni, ayi zaʼa izən ngwən ni iwuʼi zənə imi ghəy kwi fiŋ zutə.

³³ Nwiye ŋunə umə naʼa aborobod chomo nə umbən ujum. Amə nigə.