Roman 14 - Aŋwaʼanayn Uso Fey

Ka mbən saʼa ngwən ba chini

¹ Mbən num ba mbənə ibeni fiŋ ma mə ibó, asɨmə ka mbən mə taŋara ngwən nə úŋwən da ikono moʼ zənə imə abú úŋwən.

² Wa moʼ beni kwi iyi jəgə ughəy jum. Asɨmə wa ŋunə ibeni fiŋ ma mə ibó uyə jəgə aba imbab.

³ Ka wa ŋunə umə jəgə ughəy ujum tebe ma wa ŋunə cha umə jəgə ughəy ujum. Ka wa ŋunə cha umə jəgə ma ughəy ujum sob ma usaʼa igun wa ŋunə umə jəgə ughey ujum damugə Nwiye si num uŋwən akə uma.

⁴ Ngwə mə ngiya isob usaʼa igun wa faʼa wa chini? Amə mbaʼ afaʼa ma umi ghayn kwi yə faʼa anji chuŋ kə cha udi faʼ anji chuŋ. Anigə umbi faʼa anji chuŋ damugə Asɨyisəg yə nə ikay ighəy kwi u faʼa anji chuŋ.

⁵ Ba moʼ mbə kono kwi aney moʼ boŋ chigə aney chini. Uchini mbə kono kwi uney ujum mbə ichin ichin. Wa feyn feyn beni kwi anó zənə ukono amə ngwən a koʼoro.

⁶ Wa ŋunə u zən kwi aney moʼ boŋ chigə uney umbi, yə ghəy nigə da iwumini Asɨyisəg. Wa ŋunə umə jəgə ughəy ujum, u yə jəgə da iwumini Asɨyisəg damugə úŋwən uma ujum umbə naʼa yə beni ayə abú Nwiye da ughəy wu. Uŋunə cha umə jəgə ughəy ujum, u yə ghəy nigə da iwumini Asɨyisəg. Uŋwən yə naʼa yə beni ayə abú Nwiye da u ghəy wu.

⁷ Cha wa moʼ akaʼa inja mə ikay da ighari ma, cha wa moʼ akaʼa inja mi ku ma da ighari ma.

⁸ Mba bə mə ikay, mba yə ikay da iwumini Asɨyisəg. Mba bə ku, mba ku da iwumini Asɨyisəg. Anigə kanə mba mə ikay kə mba ku, mba mə ba Asɨyisəg.

⁹ Kristo ku igha izəmə da u mi mə Asɨyisəg igun uwu ba foro igun ba mbənə umə ikay.

¹⁰ Mbən mə sobo usaʼa igun umbən unya da ingiya? Kə mbən mə tebe umbən unya da ingiya? Mbən kyay kwi umba jum mba yi təm ifəg Nwiye kwi usaʼa ngwa.

¹¹ Ayə ungɨŋ Aŋwaʼanayn Nwiye kwi, “Asɨyisəg ghayn kwi numugə amə ikay, Ba jum umbi zum utəw nwi inyi figi, Ba jum mbi ghayn akə uchəw ma kwi amə Nwiye.”

¹² Anigə wa feyn feyn akaʼa inja yi ghayn unó mbənə u ghəy abú Nwiye.

Ka mbən ghəy ngwən kwi wa moʼ akaʼa injən u gow

¹³ Mba waʼ anó imə saʼa umba unya. Asɨmə mba num ungɨŋ ita fiŋ kwi cha mba mi ghəy anó nu ami ghəy kwi ungwa unya gow kə u ghəy anó iboŋ.

¹⁴ Numugə amə akə ibumi nə Asɨyisəg Yeso, mə kyay kwi cha aghəy jəgi moʼ awu nu aki zayn ma ifigi Nwiye. Asɨmə, wa moʼ bə kono kwi cha aghəy jəgi moʼ di zayn, cha adi zayn abú uŋwən.

¹⁵ Aghəy zənə ngwə mə jəgə bə sə itoy fiŋ ungwə unya, anigə cha ngwə mə ghəy ayə ni wa ŋunə u wuʼi uŋwən. I ghəy yə kwi aghəy jəgi zənə ngwə mə jəgə a chiŋe ibeni fiŋ wa moʼ ŋunə Kristo kuw da uŋwən.

¹⁶ I beni ayə kwi aghəy zənə aboŋo inigə mə́ aghəy zənə ba ghayn kwi cha adi iboŋ.

¹⁷ Mbən kyay kwi cha anó ufon Nwiye mə ma anó imə jəgə nibə nugə. Amə anó imə ghəy unó mbənə ukoʼoro, anó ni mə chomo akə aborobod nə anó ichomo akə iwuʼi numugə mba mə akə ibumi nə Azugə zayn zayn.

¹⁸ Amaʼazənə wa mbə sə faʼa abú Kristo akə ukudu inji ŋunə, Nwiye yi wuʼ, anigə ba mbi nibi beni kwi uyə ghəy unó mbənə ukoʼoro.

¹⁹ Anigə mba zi atəw ni ghəy amə unó mbənə u mi ghəy kwi mba chomo akə aborobod nibi ni ghəy u mbənə umi ghəy kwi ita fiŋ kara

²⁰ Ka mba chiŋe ngwa faʼa Nwiye da ughəy jəgi. Ughəy jəgi ujum a zayn asɨmə cha adi kaŋa boŋ kwi mba jəg aghəy zənə ami ghəy kwi ibeni fiŋ wa chini ibó.

²¹ Anó zənə aboŋo amə kwi, ka wa koro ma nyə̂, kə nugə unoʼ kə ighəy ghəy moʼ zənə amə ighəy kwi ibeni fiŋ unya ma ibó.

²² Anó zənə mbən beni da anó zəŋ a tənə inen nə Nwiye. Nwiye zi aborobod igun ba mbənə cha u zi ma usaʼa igun inyo ma. Damugə umə ghəy unó mbənə ukyay kwi amə unó nu koʼoro.

²³ Nwiye yi zi usaʼa igun ba mbənə umə ibiyə uma akə aghəy zənə umə ijəgə damugə cha umə jəgə ma anjim ibeni fiŋ. Anó moʼ zənə wa mə ighəy nu cha adi zaʼa ma anjim ibeni fiŋ amə anó iboŋ.