Roman 13 - Aŋwaʼanayn Uso Fey

Mbən wumine ba mbənə umə tumə ngwən

¹ Ba jum wumine ba mbənə umə tumə abey, damugə cha mbə mi mə ni ikay itumə abey ighari adi kə ma Nwiye yə naʼa ikay wu abú úŋwən. Amə Nwiye zi ba mbənə umə tumə abey.

² Anigə wa ŋunə u ton ba mbənə umə tumə abey, yə nibi ton ba mbənə Nwiye choʼo. Wa ŋunə u ghəy nigə uyi zi usaʼa igun atəw ma,

³ damugə ba mbənə umə ghəy unó iboŋ umbə bugə ba mbənə umə tumə úŋwən, asɨmə cha u mbənə umə ghəy unó chuŋ mə bugə ma úŋwən. Mbən bə mə kaba kwi ka mbən mə bugə ngwən ba mbənə umə tumə ngwən? Mbən ghəy unó chuŋ da u wuʼ ngwən.

⁴ Ba mbənə umə tumə ngwən amə ba faʼa Nwiye da iwere ngwən. Asɨmə ngwə mbə ghəy ibɨy, ngwə yi mə bugə ungwən damugə umbi faʼ akə ikay zənə Nwiye naʼa abú úŋwən. Úŋwən mə ba faʼa Nwiye da u mi tey isɨy təm Nwiye abú ba mbənə umə ghəy unó iboŋ.

⁵ Anigə, ka mbən mə wumine ngwən úŋwən aba da umugə umi zi ingəʼ igun inen, asɨmə mbən ghəy nigə da ka itən fiŋ tə saʼa ma ngwən.

⁶ Amə nibə aton zənə mbən mə naʼa ukab tag, damugə ba mbənə umə tumə ngwən umbə faʼa abú Nwiye, anigə umbi zi atəw akə afaʼa wu.

⁷ Mbən naʼa ghəy zənə mbən mi naʼ abú úŋwən. Amə́ tag da injən atəw mbən naʼa, amə tag da ughəy mbənə umə inen mbən naʼa, amə inaʼ izuŋini abú úŋwən mbən naʼa, abə mə izəw ungwən mbən zəw.

Anó zənə mba mi ghəy abú ba chini

⁸ Ka wa yimə ma injugə wa. Injugə zənə mbən mi yimi amə kwi mbən wuʼ umbən unya, damugə wa ŋunə umə wuʼe wa chini u yə numə ikɨy Nwiye.

⁹ Ayə ungɨŋ unoʼo Nwiye kwi, “Iniŋe ayə uyey akə unom wa chini, izwere ayə wa, iji ayə, izi ayə adoʼ akə ghəy wa. Unó mbəŋ ujum foro unoʼo uchini mbə foro akə noʼo ŋunə ughayn kwi wuʼ wa ŋunə umə tinə ma inji iyad numugə ngwə wuʼ injə inyi inyo.

¹⁰ Wa bə wuʼe wa chini cha umi kyay ighəy ma ibɨy abú uŋwən. Iwuʼe ba amə inum unoʼo ujum.”

¹¹ Mbən ghəy nigə damugə mbən kaŋa kyay kwi amaʼazənə akinine, amə amaʼ inen inoʼ ambuni, damugə anó ni du angəʼ si tinə iyad ina akinine chigə umugə yə dey məŋi amaʼazənə ba zi fiŋ inyo Asɨyisəg.

¹² Afəb yə sə chigə, isəg yə sə ŋu kyiʼi. Anigə mba waʼ unoʼ mbənə ba mə ghəy ambiri anigə izi ughəy berd zoŋo ni zoŋo akə uzayn zayn.

¹³ Mba ni ghəy umba unó akə inji zənə ikoʼoro aba numugə ba mə ghəy unó zayn zayn. Ka mba mə ghəy ngwa adoʼ kə nugə unoʼ ibigə, ka mba mə jəgə ngwa isəg, kə ighəy ufibiri unoʼ, ka wa mə taŋara ma kə ighəy adey.

¹⁴ Asɨmə mbən ghəy kwi Asɨyisəg Yeso Kristo kəbərə ngwən anji zənə ndwi kəbərə ba. Anigə ka mbən naʼa ngwən apan abú itən nyə̂ inyo kwi ighəy unó iboŋ mbənə nyə̂ inyo mə kaba.