Roman 11 - Aŋwaʼanayn Uso Fey

Nwiye idiri ba Izre

¹ A yə ibiri kwi Nwiye waʼa tono ba uma? Akə ma nigə! Kaba umugə amə wa Izre. Amə ŋwə̂ akə aghaŋ Abraham. Amə wa akə unebey Benjamen.

² Cha Nwiye di ton ma ba ma mbənə yə nibi choʼ. Cha mbən kyay ngwən anó zənə Aŋwaʼanayn Nwiye ghayn da Elayija, anji zənə yə́ ghayn abú Nwiye da anó zənə ba Izre aghəy?

³ Yə́ ghayn kwi, “Asɨyisəg, mbə si zwere umbə ba ukən nibi isaʼ inja adiŋi ifá, aba umugə asi buʼe. U mbə nibə kaba izwere aŋu.”

⁴ Nwiye ywiri abú uŋwən kwi ingiya? Yə ghayn abú uŋwən kwi, “Mə si isəy akama ba isambigə akə umbəŋ nu cha udi si wumine uma unwiye ibuw ibuw ŋunə umə itiya akə Bal.”

⁵ Amə nibə nigə akinine nu abúʼə ba yə awu nu Nwiye choʼo anjim ichuŋ ma.

⁶ Yə choʼo ba mbəŋ anjim ichuŋ ma, akə ma da unó mbənə umə aghəy. Abə mə kwi u yə choʼo úŋwən da unó mbənə umə aghəy, nji cha ichuŋ Nwiye di ni bere ma ichuŋ Nwiye.

⁷ Asə mə ingiya? Cha ba Izre di mə uma nə aghəy zənə mbə́ mə́ kaba. Ba kere kere mbənə Nwiye choʼo mə́ nə aghəy wu. Asɨmə abúʼə ba aghəy fiŋ uma tu.

⁸ Ayə ungɨŋ Aŋwaʼanayn Nwiye kwi, “Nwiye naʼa azugə zənə amə aghəy kwi ba tuʼere abú úŋwən, Nibi naʼa aghɨ zənə cha amə zənə usin, Nibi naʼa utoŋ mbənə cha umə zəw unó. Mbə chomo nigə izaʼa pey akə achuŋ.”

⁹ Ufon Dafid nibi ghayn kwi, “Asin zənə umə jəgə akuŋ mə atam nu umi ibiya úŋwən ungɨŋ. A mə nibə ubəg nu umi fwayn ungɨŋ, Nibə asin nu umi cha úŋwən angəʼ.

¹⁰ Aghɨ uma figə da ka umə nə zən uma usin, Injim ma nibi gunə ighari feyn.”

Nwiye yi chi ba mbənə akə ma ba Jû angəʼ

¹¹ Ayə biri kwi, ba Jû waʼa tamana da gow akə inji zənə cha umi noʼo? Indəʼ! Amə da umugə mbə́ gow anó boʼo ba mbənə akəma ba Jû duw angəʼ. Mbə du da ba Jû kuw imbəw.

¹² Amə unó iboŋ ba Jû ighəy kwi ba ungɨŋ isəg uzən ichuŋ, nibi aghəy kwi numugə u ton Nwiye, amə kwi ba mbənə akə ma ba Jû u zən ichuŋ, nji amə anó nu a boŋo kwi ba Izre jum si bumə aboʼo úŋwən.

¹³ Akinine, ayə inayn inen umbən mbənə akə ma ba Jû. Numugə amə wa tom abú ba mbənə akə uma ba Jû, ayə zi atəw akə afaʼa zənə Nwiye choʼo aŋu kwi afaʼa,

¹⁴ da umbəŋ unya ba Jû aghəy imbəw anigə u chiyə umoʼ angəʼ.

¹⁵ Amaʼazənə Nwiye ton úŋwən, yə ti ni duw ichuŋ ni ba ungɨŋ isəg. Nji akə nji zənə umi gha beni úŋwən awaʼa itey kwi mbə́ sí ku gha zəmə?

¹⁶ Ubə dey naʼa ingəŋ imbey akə aghəy ifaʼ abú Nwiye, nji ingəŋ wu jum yi mə ima. Ubə dey naʼa aghaŋ azad nə aghəy ifaʼ abú Nwiye nji kaba itab azad yi mə ima.

¹⁷ Mbə səg itab moʼ akə azad olif chuŋ anigə ŋu num utab akə azad olif iboŋ ŋu bana akə azad olif chuŋ wu. Umbən mbənə akə ma ba Jû chomo ni utab akə azad olif iboŋ wu nu unum ŋu bumi akə azad olif chuŋ. Anigə mbən yə nə uneʼe ŋunə Nwiye naʼa abú ba Jû

¹⁸ Anigə ka mbən mə komo ngwən iguwə damugə mbən chomo ni itab tənə usobo. Mbən bə mə komo iguwə, nji mbən kyay kwi akə ma umbən mə jiyə ighaŋ wu, amə ighaŋ wu mə jiyə ngwən.

¹⁹ Ba moʼ akaʼa injən umbi ghayn kwi, “Mbə sobo itab wu da inaʼa apan inigə boʼo ngwə num asin uma.”

²⁰ Zigə amə anó asiʼ. Mbə́ sobo itab wu nu amə ba Jû damugə amə cha ibeni abú úŋwən. Asɨmə mbən təm ikay aba damugə mbən mə nə ibeni. Asɨmə mbən mə́ beʼere ngwən inyo, mbən ni goro amə anó zənə amə aghəy adu.

²¹ Adi mə kwi cha Nwiye sayn ma itab chuŋ tənə tə́ chomo nji cha yə nibi sayn ma ngwən.

²² Mba zən inji zənə Nwiye mə aghəy ichuŋ nibə nya. Uyə nya abú ba mbənə u gow anó. Asɨmə u yə aghəy ichuŋ inen. Anigə mbən chomo aba ungɨŋ ichuŋ ma. Mbən bə ton ighəy nigə, uyi nibi sobo ngwən iwaʼ.

²³ Ka aba ba Jû, ubə waʼ inji zənə cha u zi fiŋ inyo Nwiye, Nwiye yi gha bana úŋwən damugə uŋwən yə ni ikay amə aghəy ugha bana úŋwən akə azad chuŋ wu ighari chini.

²⁴ Abə mə kwi mbə sobo ngwən akə azad olif iboŋ, anigə ibana akə azad olif chuŋ nu akə ma nigə umə ghəy, nji ayi zab kwi u gha bana utab akə azad ma.

Nwiye yi idiri ba jum

²⁵ Umbuŋ unya, ayə kaba kwi mbən kyay anó zənə u noy da ka mbən kono ngwən kwi mbə yə nə iwe azəd. Anó wu amə kwi, Nwiye si aghəy fiŋ ba Izre tu. Iyi tu nigə ŋu pey Amaʼazənə unun ba ŋunə aka ma ba Jû mi zaʼa abú Nwiye si koʼ.

²⁶ Amaʼa wu bə koʼo, ba Izre jum umbi du angəʼ. Ayə ungɨŋ Aŋwaʼanayn Nwiye kwi, “Wa ŋunə umi chi ba angəʼ yə zaʼa Ziyon, Uyi iniy anó zənə cha ba mə wumine Nwiye akaʼa buŋ Yakob.

²⁷ Ayi sɨy uso nə úŋwən, Amaʼazənə mə waʼ unó iboŋ uma.”

²⁸ Amə da ukən chuŋ, ba Jû mə ba bana Nwiye da ba mbənə akə ma ba Jû. Asɨmə da mugə Nwiye choʼo úŋwən yə wuʼi úŋwən kwaʼa azəd da umbaʼ imbey uma.

²⁹ Ayə ney damugə Nwiye si naʼa uneʼe abú ba nibi tiya úŋwən akə umbi. Cha umi gha kyaba fiŋ ma.

³⁰ Umugə umbən mbənə akə ma ba Jû mə kaŋa aghəy izəw abú Nwiye amaʼ imbey, Akinine yə si idiri ngwən damugə ba Jû mbə aghəy izəw.

³¹ Anigə umbə aghəy izəw akinine da Nwiye idiri úŋwən numugə u si diri ngwən.

³² Nwiye si aghəy ba ujum amə ba adəŋ damugə umə aghəy izəw. Yə aghəy nigə boʼo idiri úŋwən uma jum.

Pol yere Nwiye

³³ Wey! Mbən zən umugə Nwiye aghəy ichuŋ abú ba ujum! Mbən zən numugə umə nə iwe nibi kyay unó jum! Cha amə aghəy wa kyay ikono ma! Cha amə aghəy wa kyay inji ma.

³⁴ A yə ungɨŋ Aŋwaʼanayn Nwiye kwi, “Amə ngwa u kyay ikono Asɨyisəg? Amə ngwa amə ghəy ukɨy uŋwən?

³⁵ Amə ngwa usi naʼa aghəy abú uŋwən? Da umi gha iwiy?”

³⁶ Amə ney damugə amə Nwiye tana u aghəy ujum, u aghəy ujum umbə awu anjim ma, u aghəy ujum mbə abú uŋwən. Mba naʼa iwumini abú uŋwən koŋ! Amə nigə.