Roman 10 - Aŋwaʼanayn Uso Fey

¹ Umbəŋ unya, aghəy zənə inyi fiŋ mə kaba nu amə nibə chaʼara Nwiye da ngwən umbəŋ ba Izre kwi u chiyə umbəŋ ba angəʼ.

² Ayi ghayn da úŋwən kwi mbə zi atəw ifaʼa abú Nwiye, asɨmə cha u di zi atəw amə igun anó zənə ukyay da Nwiye.

³ Cha u di kyay inji zənə Nwiye mə ghəy kwi ba təm ikoʼoro. Umbə kaba amə iti mə inji uma ighəy kwi mbi təm ikoʼoro cha udi num ma inyo ma asəy da Nwiye ghəy kwi u təm ikoʼoro.

⁴ Unoʼo Mose si inwi akə Kristo, da ba ujum mbənə u zi fiŋ uma inyo Kristo təm ikoʼoro.

Anó da idu angəʼ ayə abú ba ujum

⁵ Mose ŋwaʼanayn da anó ni təm ikoʼoro anji zənə amə ungɨŋ unoʼo kwi, “Wa ŋunə umə aghəy unó mbənə umə ungɨŋ unoʼo yi chomo da unoʼo.”

⁶ Asɨmə anó ni təm ikoʼoro anji zənə wa zi fiŋ inyo Kristo amə kwi, ighayn ayə ungɨŋ fiŋ kwi, “Amə ngwa umi ŋu nyi azobo?” (Anigə amə da iswiʼire Kristo asey).

⁷ “Kə amə ngwa umi swiʼi iŋu ungɨŋ abey uwu ba?” (Anigə igha num Kristo akə iwu zənə yə kuw).

⁸ Aŋwaʼanayn Nwiye mə ghayn kwi ingiya? Inayn wu yə iyad inigə, iyə ungɨŋ uchəw nibə foro ungɨŋ fiŋ. (Amə inayn zənə mba mə ghayn inen izi fiŋ inyo Nwiye).

⁹ Ngwə bə ghayn akə ungwə uchəw kwi Yeso amə Asɨyisəg nibi beni ungɨŋ fiŋ kwi Nwiye zəmə uŋwən, ngwə yi du angəʼ.

¹⁰ Amə da mugə wa beni nu ghəy kwi u təm ikoʼoro. Amə da mugə wa ghayn akə uchəw ma nu ghəy kwi u duw angəʼ.

¹¹ Ayə ungɨŋ Aŋwaʼanayn Nwiye kwi, “Cha Nwiye mi naʼa ma indere atəw abú wa ŋunə u zi fiŋ inyo ma.”

¹² Ano zəŋ amə abú ba ujum damugə cha ikyaba akə ba Jû nə ba mbənə akə ma ba Jû. Abə ma Asɨyisəg feyn nu amə Asɨyisəg igun ba ujum. Abə ma uŋwən umə zi aborobod nu cha unere igun ba ujum mbənə u mə chaʼara uŋwən.

¹³ Ayə ungɨŋ Aŋwaʼanayn Nwiye kwi, “Ba jum mbənə u chaʼara Nwiye akə ukum Asɨyisəg umbi du angəʼ.”

¹⁴ Asɨmə ba mi si chaʼara uŋwən ingiya nu cha udi zi fiŋ inyo ma? Umi zi fiŋ ingiya nu cha udi si zəw anó da uŋwən? Umi zəw anó da uŋwən ingiya nu cha wa ghayn inayn Nwiye abú úŋwən?

¹⁵ Umə ŋu ghayn inayn Nwiye abú úŋwən ingiya nu cha u tom úŋwən? Ayə ungɨŋ Aŋwaʼanayn Nwiye kwi, “Amə kwaʼa anó chuŋ kwi ba mbənə umə ghayn ukən uchuŋ umbi zaʼa!”

¹⁶ Asɨmə akə ma ba Jû ujum u beni ukən uchuŋ wu. Wa ukən Nwiye Azaya ghayn kwi, “Asɨyisəg amə ngwa si beni ukən ŋunə mba mə ghayn?”

¹⁷ Anigə, ibeni yə zaʼa akə unó mbənə ba zəw, unó mbənə ba zəw mbə zaʼa anjim unó mbənə mbə ghayn da Kristo.

¹⁸ Asɨmə ayə biri kwi, cha mbə di zəw? Amə asiʼ kwi mbə si zəw. Ayə ungɨŋ Aŋwaʼanayn Nwiye kwi, “Ukən ŋunə mbə́ ghayn si saŋa isəg ujum, Inayn ma si ŋu pey inwi isəg.”

¹⁹ Mə́ gha biri kwi, cha ba Izre di zəw utəw ma zayn? Mose dey iywiri kwi, “A yə ghayn kwi, u aghəy adiri igun ba mbənə cha udi koʼ kwi u tiya úŋwən akə abey. A yi num abey zənə ba ma mə uneŋ ighey mbən ba usɨy təm.”

²⁰ Azaya mə nə fiŋ kaka Amaʼazənə yə́ ghayn kwi, “Ba mbənə cha mbə mə kaba aŋu mbə zən aŋu, Mə tey inyi inyo abú ba mbənə cha mbə mə biri aŋu.”

²¹ Amə́ da ba Izre, yə ghayn kwi, “Uney ujum ayə fiʼe umbəŋ ubugə Da inum ba nu umə ghəy izəw nibə ka atəw.”