Roman 1 - Aŋwaʼanayn Uso Fey

¹ Amə umugə Pol nu amə wa faʼa Yeso Kristo a ŋwaʼanayn aŋwaʼanayn zəŋ. Nwiye tiya aŋu kwi amə wa tom Kristo. Yə nibi choʼo aŋu kwi ani ghayn ukən uchuŋ.

² Nwiye sí kaʼa ukən uchuŋ awu anjim ba ukən ma anigə mbə́ ŋwaʼanayn ungɨŋ Aŋwaʼanayn Nwiye.

³ Ukən chuŋ wu amə da Ŋwə̂ ma nu mbə ibə́ ungɨŋ aghaŋ ufon Dafid.

⁴ Nwiye tey akə ikay anjim Azugə zayn zayn kwi Yeso Kristo ungwa Asɨyisəg amə Ŋwə̂ Nwiye. Yə tey nigə anji zənə yə́ zəmə uŋwən.

⁵ Nwiye ghəy ichuŋ iniŋ anjim ŋwə̂ ma wu. Mba mə nibə ba tom da isaŋa ukum ma akaʼa ba jum ungɨŋ usin jum da u zəw i zi fiŋ igun ma iwumini uŋwən.

⁶ Mbən mə ba aboʼo ba mbənə Nwiye tiya kwi mbən mə ba Yeso Kristo.

⁷ Ayə ŋwaʼanayn abú ba ujum mbənə umə á Rom. Nwiye wuʼi ngwən kwaʼa azəd anigə itiya ngwən kwi mbən mə ba ma. Nwiye ungwa Mbaʼ nə Asɨyisəg Yeso Kristo aghəy ichuŋ inen nibi naʼ aborobod inen.

Pol chaʼara Nwiye nibi naʼ yə beni ayə abú uŋwən

⁸ Anó imbey amə kwi ayə naʼa mə beni ayə abú Nwiye anjim Yeso Kristo da umbən ujum. A yə naʼa nigə damugə ba ujum ungɨŋ isəg umbə zəw umugə mbən zi fiŋ inyo Nwiye.

⁹ Nwiye ŋunə amə faʼa abú uŋwən nə inyi fiŋ ujum akə inji zənə amə ghayn ukən uchuŋ da Ŋwə̂ ma, amə uzənə iniŋ kwi akə umaʼ ujum mbənə amə chaʼara uŋwən ayə kono ngwən.

¹⁰ Ayə chaʼara ghayn kwi, u ghəy apan duw a zaʼa izənə ngwən.

¹¹ Ayə kaŋa kaba izənə ngwən da ighəy kwi Azugə Nwiye naʼa uneʼe inen. Uneʼe wu yi ghəy kwi mbən kara.

¹² Anó zənə amə ghayn amə kwi, ibeni zənə mba zi igun Kristo iyi ywere ngwa umba umba. Iyi ywere ŋu nibi ywere ngwən.

¹³ Umbuŋ unya, ayə kaba kwi mbən kyayn kwi, ighari nanaʼ mə si kab izaʼa chaʼara ngwən, asɨmə unó nanaʼ kən aŋu. A yə kaba i zaʼa da ighəy kwi ba nanaʼ injən akaʼa u beni Nwiye aba numugə mə́ aghəy akaʼa mbənə akə ma ba Jû.

¹⁴ Amə wa injugə abú ba mbənə u kyayn anó foro abú ba mbənə cha udi kyayn uma anó. Amə nibə wa injugə abú ba iwe foro abú uneŋ.

¹⁵ Amə aton zənə amə kaŋa kaba kwi a ghayn ukən uchuŋ abú umbən mbənə mbən mə Rom.

Ikay zənə imə ungɨŋ ukən uchuŋ

¹⁶ Cha amə aŋu nə indere atəw da ukən uchuŋ, damugə ukən uchuŋ amə ikay Nwiye ichi ba ujum mbənə u beni angəʼ. U yi dey chiyə ba Jû, noʼo akuŋ ichiyə ba mbənə akə ma ba Jû.

¹⁷ Ukən chuŋ wu yə tey umugə Nwiye aghəy kwi ba təm akə inji zənə ikoʼoro abú uŋwən. Amə akə inji zənə ba zi fiŋ inyo Kristo iŋu nwi aba akə inji zənə u zi fiŋ inyo Kristo. Ayə ungɨŋ Aŋwaʼanayn Nwiye kwi, “Wa ŋunə unó ma koʼoro uyi təm anjim ibeni ma.”

Igow unó ba inyoŋ atəw

¹⁸ Nwiye ŋunə umə azobo u yə tey kwi, iyə isɨy item abú ba mbənə cha umə wumine ma uŋwən. U yə nibə isey abú u mbənə umə kyugə damugə ikyugə uma iyə kənə kwi ka ba kyay uma asiʼ da uŋwən.

¹⁹ Nwiye yi isɨy itəm nə úŋwən damugə, anó zənə ba kyay da Nwiye yə zayn abú úŋwən, amə Nwiye yə aghəy kwi a zayn abú úŋwən.

²⁰ Iti Amaʼazənə Nwiye tana isəg, inji ma tənə cha ba mə zənə nə ikay ma zənə itənə akə ighari feyn nu itey kwi uŋwən mə Nwiye, si du zayn abú ba akə inji zənə uzənə u aghəy mbənə u tana. Anigə cha nji amə aghəy wa moʼ ghayn kwi cha idi kyay Nwiye.

²¹ Ka nə di ma kwi Úŋwən kyay Nwiye asɨmə cha umə naʼa uma iwumini abú uŋwən kwi uŋwən amə Nwiye, kə inaʼ yə beni ayə abú uŋwən. Umbə kono amə unó ukow anigə fiŋ uma si beŋe sə fire amə firi.

²² Úŋwən mbə ghayn kwi umbə ni iwe, asɨmə úŋwən beŋe akə uneŋ.

²³ Abú úŋwən imə wumine Nwiye nu cha umi noʼo iku, mbə beŋe sə wumini amə unwiye ibuw ibuw nu u tana u chomo ni wa inyoŋ atəw nu umə ikuw. U mbə nibə wumini inen, nyə̂ foro nə nyə̂ tənə imə chomo ungɨŋ ugwi nə isəg.

²⁴ Numugə umə aghəy nigə, Nwiye sayn úŋwən umbə aghəy ufibiri unó mbənə fiŋ uma mə kaba imə ighəy. Úŋwən mbə num inyo ma imə aghəy unyimi unó awu.

²⁵ Umbə kyaba asiʼ da Nwiye sə beni amə unó figi. Cha umə wumini uma Nwiye ŋunə u tana u aghəy, asɨmə umbə wumine amə u aghəy mbənə Nwiye tana. Uŋwən amə Nwiye ŋunə umə yere koŋ. Amə nigə.

²⁶ Numugə umə aghəy ukudu unó uŋu, amə aton zənə Nwiye sayn úŋwən abú anó imə zaŋa injəy ijəgə isəg. Mbə ayey sayn anóm sə niŋe amə nə ayey chini.

²⁷ Amə nibə ichin ichin nu anóm mə sayn ayey sə niŋe amə anóm chini.

²⁸ Umugə cha udi beni uma kwi yə koʼ ikyay Nwiye, Nwiye aghəy kwi úŋwən mə ni ikono iboŋ, da umi mə aghəy unó mbənə cha mbə́ mə́ aghəy.

²⁹ Fiŋ uma sugi nə ikudi unó iboŋ ujum. Ano izəg, Anó ni aghəy imbəw, anó ni zwere wa, anó ni zoŋ, anó ni ikən u aghəy, anó ni tebe ba foro anó ni itə únáŋ si nibi sugi ungɨŋ fiŋ uma, umbə iweŋ ukwiy.

³⁰ Umbə chiŋi ikum ba, umbə bana Nwiye, umbə aghəy unó nu cha ukoʼoro, ibeʼere inyo, komo iguwə, umbə kono inji ujum imə ighəy unó iboŋ, umbə nibə ighəy izəw abú umbaʼ uma.

³¹ Úŋwən amə uneŋ, cha umə aghəy uno mbənə u kaʼa, cha umə kənə akə wa, cha umə diri wa.

³² Mbə́ kyayn kwi unoʼo Nwiye mbə ghayn kwi ba mbənə umə aghəy ikudi unó uŋu u mbi ku. Asɨmə umbə ŋuw imbey imə aghəy unó mbəŋ. Ú mbə nibə wuʼi uma nə ba mbənə umə aghəy ukudu unó uŋu.