Ukən chuŋ da Yeso Kristo anji zənə Mak ŋwaʼanayn 9 - Aŋwaʼanayn Uso Fey

¹ Yeso ghayn abú ikwiy ba wu foro abú mbə məŋə-anó ma kwi, “Ayə ghayn asiʼ inen kwi cha ba moʼ injən akaʼa umbən mbənə mbən təm akəŋ mi ku ni cha u di zən umugə anó ufon Nwiye ami zaʼa ni ikay.”

Yeso beŋe sə məŋərə

² Amaʼazənə unəy chigə ifəw, Yeso num Pita nə Jems foro nə Jon u koʼ ŋu igun ugum sá moʼ asin nu aba úŋwən mbə́ mə́ awu. Amaʼazənə mbə́ pey awu, inyo ma beŋe imbey uma.

³ Ndwi ma beŋe sə fuw məŋərə nu cha wa moʼ akə igun isəg amə ghəy u səw ndwi ini məŋərə nigə.

⁴ Anigə mbə məŋə-anó wu uta zən Elayija nə mose u zaʼa du imbey ni inayn abú Yeso.

⁵ Amaʼazənə Pita zən nigə, yə ghayn abú Yeso kwi, “Ataʼa ba yi boŋ kwi mba yə akəŋ. Mba yi chim usɨgə uta, a feyn inigə, a feyn abú mose a feyn abú Elayija.”

⁶ Cha yə di kyayn ma anó ighayn. Anigə yə ghayn nigə damugə igoro ibiya uŋwən nə mbə məŋə-anó mbi ubigə azəd.

⁷ Ipaʼ moʼ kəbərə úŋwən anigə igəg moʼ gham awu ungɨŋ ipaʼ ghayn kwi, “Amə uŋu ŋwə̂ ŋunə a wuʼi azəd mbən zəw anó zənə umə ghayn.”

⁸ Amaʼazənə mbə́ zəw igəg wu, mbə́ gha iney anigə cha mbə zən uma wa moʼ chini aba Yeso ma zeʼe.

⁹ Amaʼazənə mbə́ mə́ swiʼi awu igun ugum, Yeso chede úŋwən kwi ka ughayn ma anó zənə u zən ə abú wa moʼ pey Amaʼazənə Ŋwə̂ Wa mi zəmə.

¹⁰ Anó zəŋ tənə aba abú úŋwən. Anigə, mbə́ mə́ biri uma uma da aton ni zəmə

¹¹ Mbə biri abú Yeso kwi, “Mbə ataʼa ba akə unoʼo umbə ghayn kwi Elayija yi dey zaʼa da ngiya?”

¹² Wə ywiri abú úŋwən kwi, “Elayija yi dey izaʼa boʼo itana unó ujum u chomo anji zənə mbə mi məŋi. Aton zənə u ŋwaʼanayn da Ŋwə̂ Wa kwi u yi zəw ingəʼ azəd u ton uŋwən amə da ngiya?

¹³ Ayə ghayn inen kwi Elayija sí zaʼa anigə ba moʼ aghəy abú uŋwən anji zənə yə boŋo abú úŋwən kwi u aghəy. Mbə́ aghəy aba anji zənə mbə ŋwaʼanayn da uŋwən ungɨŋ Aŋwaʼanayn Nwiye.”

Yeso zwey ŋwə̂ anóm moʼ ni Azugə iboŋ mə́ ungɨŋ ma

¹⁴ Amaʼazənə Yeso nə mbə məŋə-anó mbənə mbə́ mə́ nə uŋwən swiʼi awu igun ugum iŋu kuw mbə məŋə-anó mbi, mbə́ pey yi zən ikwiy ba nu yə kad mbə məŋə-anó wu. Mbə nibi zən mbə ataʼa ba akə unoʼo nu umə taŋa nə úŋwən.

¹⁵ Amaʼazənə ikwiy ba wu zən Yeso, mbə yere anigə inod ŋu aboʼo uŋwən pey yi chaʼara uŋwən.

¹⁶ Yeso biri abú mbə məŋə-anó wu kwi, “Amə anó ngiya mbən mə taŋa ni ba mbəŋ awu?”

¹⁷ Anom moʼ mə akaʼa ikwiy ba wu u ywiri kwi, “Ataʼa ba mə num inyi ajoŋ zaʼa inigə damugə Azugə iboŋ ayə ungɨŋ ma ighəy cha umə inayn.

¹⁸ Umaʼ ujum mbənə Azugə iboŋ wu mə yimə uŋwən, ayə maʼa uŋwən asey ajow ni duw uchəw ma. Uni koro asoŋ, inyo ma ujum ikay. Anigə mə ghayn abú umbə məŋə-anó kwi u chiyə Azugə iboŋ wu anigə cha u kyay uma umugə ichi.”

¹⁹ Yeso ghayn abú úŋwən kwi umbən ba kinine cha ibeni fiŋ inen. Amə unun amaʼ ngiya ami chomo ni umbən? Amə unun amaʼ ngiya ami yimə fiŋ nə umbən? Mbən num ajoŋ wu zaʼa naʼ iniŋ.

²⁰ Mbə num ajoŋ wu ŋu naʼ abú uŋwən. Amaʼazənə Azugə iboŋ wu zən Yeso, yə yimi ŋwə̂ wu u gow asey ni biŋine ma ajow ni duw uchəw ma.

²¹ Yeso biri abú mbaʼ ŋwə̂ awu kwi, “Azugə iboŋ zəŋ si chomo ungɨŋ inyo ma akə unun amaʼ ngiya?” Wə ywiri abú uŋwən kwi “yə nyi ti Amaʼazənə yə́ mə́ ŋwə̂ bo,

²² yə mə bə maʼa uŋwən ungɨŋ uwəd foro ungɨŋ une kaba aba nji izwere uŋwən. Abə mə kwi ngwə yi aghəy anó moʼ, kənə akə ngwa iyere ngwa.”

²³ Yeso ghayn abú uŋwən kwi, “Ngwə ghayn kwi abə mə kwi ngwə yə kyayn ighəy anó moʼ. Kyayn kwi cha anó moʼ mə chigə ma wa ŋunə umə ni beni fiŋ.”

²⁴ Aba ighari wu, mbaʼ ŋwə̂ wu kyayn akə ikay ghayn kwi, “Ayə ni beni fiŋ asɨmə inyi beni fiŋ iyə bo ywere aŋu ighəy kwi ikay.”

²⁵ Amaʼazənə Yeso zən kwi ikwiy ba yə noro zaʼa fere, u ghayn abú Azugə iboŋ wu kwi, “u ngwə Azugə iboŋ zənə amə ighəy kwi ka wa inayn ma nibi aghəy kwi ka wa zəw ma anó a yə ghayn inigə kwi ngwə duw inyo ŋwə̂ anóm ŋu. I noʼo gha nyi ayə inyo ma ghari chini.”

²⁶ Amaʼazənə yə ghayn nigə, Azugə wu kyayn iŋiʼiri ŋwə̂ wu akə ikay idu inyo ma. Ŋwə̂ wu chomo nə awu wa. Yə́ ghəy ba nanaʼ ni ghayn kwi yə si ku.

²⁷ Anigə Yeso yimi abugə ma inoʼo uŋwən. Yə́ noʼ itəm atey.

²⁸ Amaʼazənə Yeso nyi iŋu ungɨŋ na, mbə məŋə-anó ma biri abú uŋwən anjim anjim kwi, “Aton zənə cha mba di kyayn ichi Azugə wu amə da ngiya?”

²⁹ Wə ywiri abú úŋwən kwi, “Cha aghəy chini amə aghəy a chi ukudu uŋu chigə akə achaʼara Nwiye.”

Yeso ghayn anó da iwu ma ighari chini

³⁰ Yeso ni mbə məŋə-anó ma noʼ asin wu iŋu yi chigə á Galeli. Cha yə di kaba kwi wa moʼ kyayn asin zənə umə wu,

³¹ damugə yə mə taʼa mbə məŋə-anó ma kwi, “u mbi fənə Ŋwə̂ Wa abú ba u zwere uŋwən anigə unəy bə chigə uta u yi zəmə iwu.”

³² Cha utəw ma di zayn da anó zənə yə mə ghayn. Anigə mbə mə goro uma ibiri abú uŋwən.

Wa ŋunə amə wa kyayn ungɨŋ anó ufon Nwiye

³³ Yeso ni mbə məŋə-anó ma ŋu á Kapenawum, Amaʼazənə mbə sí nyi ungɨŋ na, yə biri abú úŋwən kwi, “Amə anó ngiya mbən mə yə taŋa anji?”

³⁴ Mbə chuʼ izey damugə mbə́ mə́ yə taŋa da wa ŋunə amə wa kyayn.

³⁵ Yeso chomo asey itiya mbə məŋə-anó wu ighum cho bigə ighayn abú úŋwən kwi, “Wa ŋunə u kaba imə wa imbəy, ighəy inyo ma ni wa ŋunə u nwi nibi məŋi wa faʼa abú ba mbi ujum.”

³⁶ Wə ghayn nigə i num ŋwə̂ kuŋe moʼ isey u təm ungɨŋ ugha ma. Wə yimi ŋwə̂ wu ighayn abú úŋwən kwi

³⁷ “Wa moʼ bi num ŋwə̂ kuŋe ni ŋwə̂ kúŋe ŋu akə uŋu ukum, yə nibi num aŋu. Cha udi num aba ŋu, yə nibi num wa ŋunə utom aŋu.”

Wa ŋunə cha udi ton ngwa u yə ni mba

³⁸ Jon ghayn abú Yeso kwi, “Ataʼa ba, mba zən wa moʼ umə fuw uzugə iboŋ akə ngwə ukum. Anigə mba kab ikən uŋwən damugə cha uŋwən ma wa moʼ akaʼa inja.”

³⁹ Yeso ghayn kwi, ka mbən kən ngwen uŋwən damugə cha wa moʼ nu umə aghəy uyere unó akə uŋu ukum gha beŋe ni ghayn anó iboŋ da aŋu.

⁴⁰ Wa ŋunə cha udi ton ngwa yə nə umba

⁴¹ Ayə ghayn asiʼ inen kwi wa moʼ bi naʼ itoʼ une inen, mbən nugə damugə mbən beni ukum Kristo, cha umi ibəw ma u choʼo afaʼa.

Anó ni aghəy kwi wa aghəy anó iboŋ

⁴² Yeso ghayn abú mbə məŋə-anó ma kwi, wa moʼ injən akaʼa mbə aghəy kwi ŋwə̂ kuŋe moʼ ni uŋu nu uzi fiŋ ma inyi inyo kwi u aghəy anó iboŋ, nji yə mi boŋ kwi u tiŋe itey ingəŋ kyayn adoʼ ma ŋu maʼ uŋwən ungɨŋ iba.

⁴³ Injə abugə bə́ mə́ aghəy kwi ngwə aghəy anó iboŋ, səg i waʼ. Wə boŋ kwi ngwə jəg itəni nə abugə feyn chigə umugə ngwə mi mə nə ubugə ubigə anigə Nwiye maʼa yə ungɨŋ uwəd. Uwəd ni cha umi noʼo nimə asin ingəʼ

⁴⁴ [Awu, cha igwəd tənə umə koro nyə̂ inyo wa mi noʼo iku, cha uwəd ŋunə umə tuŋ úŋwən mi noʼo nimə].

⁴⁵ Injə aghəw bə́ mə́ aghəy kwi ngwə aghəy anó iboŋ, səg waʼ. Wə boŋ kwi ngwə jəg itəni nə aghəy feyn chigə umugə ngwə mi mə nə ughəw ubigə anigə Nwiye maʼa yə ungɨŋ uwəd.

⁴⁶ [Awu, cha igwəd tənə imə koro nyə̂ inyo wa mi noʼo iku, cha uwəd ŋunə umə tuŋ ba mi noʼo nimə]

⁴⁷ Injə aghɨ bə́ mə́ aghəy kwi ngwə aghəy anó iboŋ, chi wa. Wə boŋ kwi ngwə nyi ungɨŋ anó fon Nwiye nə ighɨ feyn chigə umugə ngwə mi mə nə aghɨ bigə anigə Nwiye maʼa ayə ungɨŋ uwəd.

⁴⁸ Awu, cha igwəd tənə imə koro nyə̂ inyo wa ni noʼo iku, cha uwəd ŋunə u mə tuŋ úŋwən mi noʼo nimə.

⁴⁹ “Umbi ghəy kwi ba jum zayn akə uwəd numugə umə́ ghəy kwi nyə̂ zənə umə naʼa akə ghəy ifa i zayn akə ugwaŋ.

⁵⁰ Ugwaŋ yə boŋo anigə ubə si tu kə nəmə ma, u mi tana ngiya kwi u gha ni nəmə? Mbən yə nə ugwaŋ anigə mbən chomo akə aborobod ni ba mbi.”