Ukən chuŋ da Yeso Kristo anji zənə Mak ŋwaʼanayn 8 - Aŋwaʼanayn Uso Fey

Yeso jəy ba ichuʼ ikyugə

¹ Cha gha di si sa nu yə́ zwey ukəw, ikwiy ba fere. Umugə amə́ cha aghəy moʼ amə aghəy ujəg, Yeso tiya mbə́ məŋə-anó ma ighayn abú úŋwən kwi,

² “Mə kwaʼa kənə akə ikwiy ba zəŋ damugə mbə́ si chomo nu mugə akə uney ta anigə cha aghəy moʼ buʼe amə ghəy u jəg.

³ Abə cha úŋwən unuʼ nu chá u jəgə aghəy moʼ nji u moʼ mbi bó igəw anji damugə u moʼ akaʼa úŋwən i noʼ gha sá.”

⁴ Mbə məŋə-anó wu biri abú uŋwən kwi, “Wa mi ŋu num ingəŋ aŋwayn akə ungɨŋ imbayn zomo zəŋ nu imi kəʼ ijiy ba mbəŋ u ujum awu?”

⁵ Yeso biri abú úŋwən kwi, “Mbən mə nə ubimi ingəŋ səʼe?” Mbə ywiri kwi “Mba yə nə ubimi ingəŋ sambigə.”

⁶ Yeso zəw nigə ighayn abú ikwiy ba wu kwi u chomo asey. Amaʼazənə mbə́ chomo, u num ubimi ingəŋ sambigə wu ichaʼara Nwiye ibɨʼiri naʼ abú mbə məŋə-anó ma kwi u ghaba. Mbə́ num ighaba abú ikwiy ba wu.

⁷ Mbə mə nibə nə buŋ su kukuŋe moʼ. Amaʼazənə Yeso zi aborobod igun su wu, yə nibi ghayn kwi ughaba

⁸ mbə́ nibi ghaba anigə ba ujum jəg kod. Mbə́ məŋə-anó wu fere ikəg tənə tə́ buʼe isugi usəŋ isambigə.

⁹ Amə́ ba ichuʼ ikyugə mbə́ mə́ awu. Amaʼazənə mbə́ sí jəg imara, Yeso ghayn abú úŋwən kwi mbə si ŋuw aŋwayn.

¹⁰ Aba ighari wu, yə noʼ iŋu nyi ungɨŋ abaŋ ugwi nə mbə məŋə-anó ma. Mbə́ ŋu aba abey Damanuta.

Mbə́ Farasay ghayn kwi Yeso aghəy ayere anó

¹¹ Mbə Farasay moʼ ŋu ni taŋa nə Yeso. Mbə́ mə́ kaba inji izi atam abú uŋwən anigə u ghayn abú uŋwən kwi u aghəy a yere anó moʼ itey kwi Nwiye naʼa ikay abú uŋwən.

¹² Ano zəŋ bira fiŋ ma u koʼ izugə ghayn kwi, “ba kinine mə́ kaba uyere unó da ngiya? Ayə́ ghayn asiʼ inen kwi cha u mi tey anwini anó moʼ abú úŋwən.”

¹³ Amaʼazənə yə ghayn nigə, yə́ noʼ isayn úŋwən ŋu nyi ungɨŋ abaŋ ugwi ni kwenə iŋuw anjin zi.

U chede da Aforo ba Farasay nə Aforo Herod

¹⁴ Umugə mbə mə kwenə iŋuw nigə, mbə məŋə-anó nyaba inum ingəŋ anigə mbə́ mə́ abá nə abimi ingəŋ feyn ungɨŋ abaŋ ugwi wu.

¹⁵ Anigə Yeso chede úŋwən ighayn kwi, “Mbən chomo sə iwe ngwen da Aforo ba Farasay nə Aforo Herod.”

¹⁶ Mbə́ məŋə-anó wu ti ni ghayn uma uma kwi, “U yə ghayn ney damugə cha ingəŋ ina.”

¹⁷ Yeso kyayn anó zənə mbə́ mə́ ghayn anigə u ghayn abú úŋwən kwi, “Mbən mə ghayn anó damugə cha ingəŋ inen da ngiya? Cha iwe di si nyi ma ungɨŋ umbən utəw? Cha umbə utəw di si zayn uma? Itən fiŋ waʼa si tu?”

¹⁸ Mbən yə nə aghɨ anigə cha mbən mə́ zən ə́ imbayn? Mbən yə nə utoŋ anigə cha mbən mə́ zəw anó? Cha mbən mə kono anó?

¹⁹ Amaʼazənə mə́ bɨʼiri ubimi ingəŋ itɨŋ abú ichuʼ ba itɨŋ mbən fere ikəg tənə tə́ buʼe tə sugi ungɨŋ usəŋ səʼe? Mbə́ ghayn abú uŋwən kwi, “Mba fere usəŋ ighum cho bigə.”

²⁰ Wə gha biri kwi, “Amaʼazənə mə́ bɨʼiri ubimi ingəŋ sambigə abú achuʼ ba ikyugə mbən fere ikəg tənə tə́ buʼe tə́ sugi ungɨŋ usəŋ səʼe?” Mbə́ ghayn abú uŋwən kwi, “Mba fere usəŋ sambigə.”

²¹ Yə́ biri abú úŋwən kwi, “Anigə cha umbən utəw di si zayn uma?”

Yeso zwey anóm ni yə́ figə á Betsayida

²² Yeso nə mbə məŋə-anó ma ŋuw pey Betsayida. Amaʼazənə mbə́ mə́ awu, ba moʼ ŋu abú uŋwən nə anóm moʼ nu yə́ figə. Mbə́ pey yi boʼo ubugə abú uŋwən kwi u bira anóm wu

²³ Yeso yimə abugə ufəg wu inum du ungɨŋ abey wu. Amaʼazənə yə́ chad amira ungɨŋ aghɨ ma nibi niŋi ubugə ma igun wa wu, yə biri abú wa wu kwi, “Ngwə mə zənə aghəy moʼ?”

²⁴ Anom wu beʼere atəw ghayn kwi, “Ayə zənə ba umə yeŋ asɨmə mbə chomo ni uzad.”

²⁵ Yeso gha bira aghɨ anóm wu. Amaʼazənə yə bira nigə, anóm wu fəʼi aghɨ ma iney usin anigə aghɨ ma zayn. Yə́ zən u aghəy ujum anji chuŋ.

²⁶ Yeso ghayn abú uŋwən kwi u ŋuw aku ma. Igha ghayn abú uŋwən kwi ka u gha nyi ma Batsayida.

Pita ghayn wa ŋunə Yeso mə ŋwen

²⁷ Yeso nə mbə məŋə-anó ma noʼ ni ŋuw ungɨŋ usin mbənə umə kayisariya Filipi. Umugə mbə́ mə́ yeŋ ŋuw, yə biri abú úŋwən kwi, “Ba mə́ ghayn kwi amə́ ngwa?”

²⁸ Mbə́ ywiri abú uŋwən kwi, “Ba moʼ mbə ghayn kwi ngwə mə Jon ŋunə yə́ mə́ naʼa une, uchini umbə ghayn kwi ngwə mə Elayija, uchini ghayn kwi ngwə mə wa moʼ akaʼa ba ukən Nwiye.”

²⁹ Wə biri abú úŋwən kwi, “Asɨmə umbən mbən ghayn kwi amə ngwa?” Pita ywiri abú uŋwən kwi “Ngwə mə wa ŋunə Nwiye zoʼo.”

³⁰ Amaʼazənə Pita ghayn nigə, Yeso chede úŋwən kwi ka u ghayn ma wa ŋunə amə uŋwən abú wa moʼ.

Yeso ghayn kwi i yi zəw ingəʼ i ku

³¹ Yeso ti ni taʼa mbə məŋə-anó ma kwi Ŋwə̂ Wa yi zəw ingəʼ. Ba kyayn mbənə umə ungɨŋ abey, nə ba kyayn mbənə umə ambəŋ Nwiye, nə mbə ataʼa ba akə unoʼo umbi ton uŋwən izwere uŋwən. Uney bə chigə uta uyi zəmə.

³² Wə ghayn anó zəŋ kwi a duw zayn abú úŋwən. Anigə Pita num uŋwən u səne ŋu iyad yə pey u ti ni nya abú uŋwən

³³ Yeso gha ma izən mbə məŋə-anó ma anigə i nya Pita kwi “Noʼo yə inyi iyad satan. Ano zənə ngwə mə kono, cha adi noʼo ma abú Nwiye, ayə noʼo amə akə ikono wa!”

³⁴ Amaʼazənə yə ghayn nigə, yə tiya ikwiy ba wu nibi tiya mbə məŋə-anó ma asin feyn ighayn abú úŋwən kwi, “Wa moʼ bə mə́ kaba izaʼa aboʼo inyi, u num inyo ma nə aghəy ibuw ibeʼe azad abaʼaray ma iniŋe inyi jim.

³⁵ Damugənə wa moʼ ŋunə u mə kaba i mə itəni u yi sam itəni wu. Wa ŋunə u sam itənə ma da aŋu foro da ukən uchuŋ u yi mə nə itəni wu.

³⁶ Amə injim ngiya wa ni jəg ighari ubə mə nə u ghəy mbənə umə́ aki igun isəg ujum anigə isam itəni ma?

³⁷ Aghəy zənə amə ghəy wa naʼ boʼo imə gha mə nə itəni amə ngiya?

³⁸ Wa moʼ bə mə́ nə indiri atəw da aŋu foro da inyi inayn, akə Amaʼazənə cha ba mə́ wumine Nwiye nibə aghəy unó iboŋ, Ŋwə̂ Wa yi mə nə indere atəw abú uŋwən Amaʼazənə u mi zaʼa nə mbə angəd ni iwumini zənə mbaʼ ma naʼa abú uŋwən.”