Ukən chuŋ da Yeso Kristo anji zənə Mak ŋwaʼanayn 7 - Aŋwaʼanayn Uso Fey

Unoʼo umbaʼ imbey

¹ Mbə́ Farasay nə mbə ataʼa ba akə unoʼo moʼ noʼo Yerusanem ŋu fere iyad Yeso,

² mbə́ zən kwi mbə məŋə-anó Yeso moʼ mə jəgə nu cha u səw ubugə. Isəw numugə amə ungɨŋ unoʼo ba Jû.

³ Cha mbə Farasay kə ba Jû uma ujum mə jəgə uma nu cha udi səw ubugə numugə unoʼo ma mə tey. Amə inji zənə umbaʼ imbey uma siy abú úŋwən.

⁴ Amaʼazənə umə wene zaʼa iyuŋ, cha umə jəgə uma ni cha udi si aghəy kwi inyo ma zayn numugə amə ungɨŋ unoʼo uma. Unó nanaʼ chini mə awu ni mbə mə ighəy. Mbə mə isəw itoʼ, səw ikɨŋ foro aghəy zənə mbə mə zi u aghəy ungɨŋ nu utana akə bronz.

⁵ Ba Farasay wu ni mbə ataʼa ba akə unoʼo wu biri abú Yeso kwi, “Aton zənə umbə məŋə-anó kə num uma unoʼo mbənə umba mbaʼ imbey mə aghəy amə da ngiya? Umbə jəgə nu ubugə ni cha umə zayn numugə amə ungɨŋ mba unoʼo amə da ngiya?”

⁶ Yeso ywiri abú úŋwən kwi, “Wa ukən Nwiye Azaya ghayn anó asiʼ da ngwen umbən ba figə unó.” Wə ŋwaʼanayn kwi, “Ba mbəŋ mbə wumini aŋu aba akə uchəw, Asɨmə fiŋ uma tə agha sá.”

⁷ “Umbə wumini aŋu atəw ukow, Umbə ataʼa ba akə unoʼo ba ni kwi amə umbəŋ unoʼo!”

⁸ “Mbən sayn unoʼo Nwiye sə yimə amə unoʼo ba.”

⁹ Yə́ gha ighayn abú úŋwən kwi, “Mbən yə nə inji chuŋ iton unoʼo Nwiye i num amə umbən unoʼo.”

¹⁰ Mose ghayn kwi, “Wumini ungwə mbaʼ nə ungwə ingo foro kwi, ‘Uzwere wa ŋunə u jimə mbaʼ ma kə ingo.’

¹¹ Asɨmə mbən yə ghayn kwi wa mbə ghayn abú mbaʼ ma kə abú ingwo ma kwi aghəy zənə ami naʼ inen Amə Koban. (Anigə amə kwi mə si naʼ abú Nwiye).

¹² Anigə cha umi beni kwi u aghəy anó moʼ abú mbaʼ ma kə abú ingwo ma.

¹³ Akə inji zəŋ, mbən iniy inayn Nwiye akə unó mbənə mbən mə́ tey abú ba. Mbən yə́ nibi aghəy unó chini nanaʼ ni mbəŋ.”

Ghəy zənə amə aghəy kwi ka wa zayn ma

¹⁴ Yeso ghayn nigə igha tiya ikwiy ba asin feyn ighayn abú úŋwən kwi, “Umbən ujum mbən zəw anó zənə amə ŋu ghayn anji chuŋ.

¹⁵ Cha aghəy moʼ awu nu wa bə jəg kə wa mbə nugə ayi ghəy kwi ka wa zayn ma. Amə aghəy zənə amə duw ungɨŋ wa amə ghəy kwi ka wa zayn ma.”

¹⁶ [Wa ŋunə umə nə atoŋ u zəw].

¹⁷ Amaʼazənə yə si sayn ikwiy ba wu inyi ungɨŋ na, mbə məŋə-anó ma biri aton akə inayn maʼa zəŋ.

¹⁸ Yeso ghayn abú úŋwən kwi, “Mbən ki kyayn ngwen jən mi ghara? Mbə ki zən ngwen kwi cha aghəy moʼ zənə wa mə jəgə kə nugə nu ami aghəy kwi ka wa zayn ma.”

¹⁹ Ayə nigə damugə cha aghəy wu mə nyi ama ungɨŋ fiŋ ma. Ayə nyi amə ungɨŋ ibom. Anigə chigə du ŋu ibóŋ. (Umugə yə ghayn anó zəŋ yə si sob kwi u aghəy jəgi ujum kəʼ kwi ba jəg).

²⁰ Wə ŋu imbey imə ghay kwi, amə ghəy zənə amə duw ungɨŋ wa amə ighəy kwi ka wa zayn ma.

²¹ Ayə nigə damugə ikoni boŋ itə́ duw ungɨŋ wa itə́ kaŋa duw amə ungɨŋ fiŋ wa. Ikono wu itə́ aghəy kwi wa ni aghəy unó iboŋ, jəgə isəg, ni ji, kwi wa zwere wa chini,

²² kwi wa neŋe uyey kə anóm wa chini, kwi wa kuw wuboro ughəy, ni aghəy unyimi unó, ni kuw imbəw, ni chiŋe ukum wa, ni aghəy adoʼ, ni figə unó, ni bana ba, ni wey unó, ni beʼere inyo, ni aghəy unó ni cha ukəʼərə.

²³ Uno iboŋ mbəŋ ujum umbə duw ungɨŋ wa anigə ighəy cha uŋwən mə zayn.

Ibeni fiŋ ayey moʼ

²⁴ Yeso noʼ á Genesared iŋu aba abey Tayi yə́ pey yi inyi ungɨŋ na moʼ. Cha yə di kaba kwi wa moʼ kyay kwi uŋwən yə awu ungɨŋ na anigə amə cha inji abú uŋwən ipaʼa.

²⁵ Aba ighari wu, ayey moʼ ni Azugə iboŋ mə ungɨŋ ukwere ma zəw anó da Yeso. Anigə yə ŋu izum utəw inwi imbəy abú Yeso

²⁶ Ayey wu mə ayey Greek anigə mbə bə́ uŋwən á Foenisia. Wə zum utəw nigə iboʼo ubugə abú uŋwən kwi u chiyə Azugə iboŋ wu ungɨŋ ukwere ma.

²⁷ Yeso ghayn abú uŋwən kwi, mba isayn buŋ di jəg damugə cha adi boŋ kwi mba num aghəy jəgi buŋ imaʼ abú bəw.

²⁸ Ayey wu ywiri abú uŋwən kwi, “Mə kyay nigə masa, asɨmə mə nibi kyay kwi, ka ba bəw tənə imə aton agayi itə́ jəgə ikəg u aghəy mbənə imə fwayn Amaʼazənə buŋ mə jəgə.”

²⁹ Yeso ghayn abú uŋwən kwi, “Numugə ngwə ghayn nigə noʼ iŋu Azugə iboŋ wu si sayn ungwə ukwere.”

³⁰ Ayey wu noʼ iŋu unuʼ pey yi zən ukwere wu ni uneŋe igun ukon. Azugə iboŋ wu si du ungɨŋ akwere wu.

Yeso zwey ukəw u gha inayn

³¹ Yeso noʼ aba abey Tayi, yə chigə á Sidon ichigə aba abey zənə yə mə nə ubey ghum iŋu animini Galeli.

³² Ba moʼ num ukəw iŋu naʼ abú uŋwən. Mbə naʼ nigə iboʼo ubugə abú uŋwən kwi u niŋe ubugə ma igun wa wu.

³³ Yeso num wa wu idu akaʼa ba iŋu asin zeʼe. Wə pey awu izi itugi abugə ma atoŋ wa wu ichad amira ibira ineme wa wu awu.

³⁴ Amaʼazənə yə bira nigə, yə ney azobo ichwed ma ghayn abú wa wu kwi, “Efata.” Aton amə kwi “fəʼə!”

³⁵ Aba ighari wu, utoŋ ma toʼo ineme ma za u ti ni inayn anji chuŋ.

³⁶ Yeso aghəy nigə ichede ba wu kwi ka ughayn ma anó zəŋ abú wa moʼ. Asɨmə numugə yə chede úŋwən nigə, amə nigə mbə́ mə́ mara isaŋa anó wu.

³⁷ Ba ujum mbənə mbə́ zəw, mbə yere anigə ighayn kwi, “U yə aghəy unó ujum anji chuŋ, yə aghəy kwi ukəw zəw anó nibi aghəy kwi u ni inayn!”