Ukən chuŋ da Yeso Kristo anji zənə Mak ŋwaʼanayn 4 - Aŋwaʼanayn Uso Fey

Inayn maʼa da wa uŋunə yə məʼe itɨŋ u ghəy

¹ Yeso ti ni ataʼa ba iyad animini Galeli, ikwiy ba zənə yə kad uŋwən zi ugha mə kwaʼa inaʼa akə inji zənə yə ghəy u nyi ichomo ungɨŋ uku ugwi nu yə mə ungɨŋ animini, anigə ikwiy ba ŋu chomo iyad animini wu.

² Yeso tey unó nanaʼ abú úŋwən akə inayn maʼa.

³ Yeso ghayn abú úŋwən kwi, “Mben zwaray, wa moʼ mə awu nu yə ŋu ambayn iŋu imiy itɨŋ.

⁴ Umugə yə mə imiyə itɨŋ awu, imoʼ fwayn igun inji anigə inen zaʼa miya.

⁵ Imoʼ fwayn igun akwaʼ nu amə chama isey nanaʼ awu. Itɨŋ wu yabi du damugə amə chama isey nanaʼ awu.

⁶ Anigə amaʼazənə achugi bigi yə ghəy ughəy kono wu bo inəgə, damugə cha ighaŋ ma di si inyi iŋu asey anji chuŋ.

⁷ Itɨŋi moʼ fwayn akaʼa injəŋ, anigə injəŋ wu kwey fid u ghəy gwira wu anigə cha tə di kuw ma itɨŋ.

⁸ Itɨŋ moʼ fwayn akə isey chuŋ ibwed ikwey anigə ikuw itɨŋ nu imoʼ mə ighum ita imoʼ ighum ifəw imoʼ ukɨ.”

⁹ Anigə Yeso si inwi ghayn kwi “Mbən zwaray wa ŋunə umə nə atoŋ u zəw.”

Aton zənə Yeso mə ataʼa ba akə inayn maʼa

¹⁰ Amaʼazənə Yeso mə́ ma zeʼe, ba moʼ mbənə mbə́ zəw anó zənə Yeso mə ghayn, mbə́ zaʼa foro nə mbə məŋə-anó ma ighum cho bigə ibiri abú uŋwən kwi aton akə inayn itəŋ amə kwi ngiya?

¹¹ Yeso ghayn abú úŋwən kwi, “mbə ghəy kwi mbən kyay unó mbənə unóyi da anó ufon Nwiye.” Asɨmə abú ba mbənə cha umə beni uma anó zənə amə ghayn, umbə ghayn unó ujum abú úŋwən akə inayn maʼa

¹² boʼo “Umbi mə kwaʼa iney Cha umi zən, Umbi zəw Cha umi kyay uma. Umbə ghəy nigə, umbi gha ŋu abú Nwiye Anigə u yi nyaba unó iboŋ ma.”

Yeso toʼo aton akə inayn maʼa da wa ŋunə yə mə miyə itɨŋ ughəy

¹³ Yeso biri abú úŋwən kwi, “Mbən ki kyay ngwən aton da inayn maʼa zənə? Abə mə ney mbən mi si kyayn inayn maʼa chini ngiya?

¹⁴ Aghəy zənə wa imbayn a miy amə inayn Nwiye.

¹⁵ Ba moʼ mbə́ nə́ itɨŋ tənə tə fayin igun inji. Amaʼazənə ubə zəw inayn Nwiye satan zaʼa chi inayn wu aba ighari awu.

¹⁶ Ba ichin umbə nə itɨŋ tənə tə fayin igun akwaʼ, amaʼazənə ba wu ubə zəw inayn Nwiye umbə beni ni iwuʼe aba ighari awu.

¹⁷ Asɨmə cha inayn Nwiye wu imə inyi chomo ma ungɨŋ fiŋ ma akə amaʼ sa. Anigə amaʼazənə ingəʼ bə zaʼa kə umə nwini inya ughəw ma bə si zaʼa da anó Nwiye umbə ton ma inayn Nwiye aba ighari wu.

¹⁸ Ba chini umbə ni itɨŋ tənə tə fwayn ungɨŋ injəŋ. U mbə zəw inayn Nwiye,

¹⁹ asɨmə anó imə tumə inyo akə u ghəy isəg, nə anó imə zi fiŋ akə ukab, anigə foro nə ukudu ughəy chini umə kaba imə nə uŋwən. Anigə ayə ghəy unó nanaʼ sugi a fiŋ uma ikod inayn Nwiye wu, anigə cha umə kuw ma itɨŋ

²⁰ Asɨmə ba mbi umbə ni itɨŋ tənə tə fwayn akə isey chuŋ. Umbə zəw inayn Nwiye izi fiŋ ma awu anigə ikuw itɨŋ, imoʼ ighumi ta, imoʼ ighumi fəw anigə imoʼ ukɨ.”

Umbə isey anam akə asin zənə ami mə zayn abú ba jum

²¹ Yeso biri abú úŋwən ighari chini kwi, “Wa moʼ mə num anam ŋuw ungɨŋ na pey yi kwaʼa aton uku akə aton ukon? Akaʼa ma nigə umbə kwaʼa asin zənə ba jum umə zənə.

²² Ano zənə umə ghəy anjim anjim ayi zaʼa idu isəg anigə anó zənə ukəbərə kwi ka ba zən ma umbi fiʼi.

²³ Wa ŋunə umə nə atoŋ u zəw!”

²⁴ Yeso nibi ghayn abú úŋwən kwi, “Mbən zi atəw akə anó zənə mbən mə zəw! Inji zənə mbən mə num isaʼa ba chini aba inji wu Nwiye mi num isaʼa ngwən chigə.

²⁵ Ba mbənə umə nə ughəy moʼ, umbi izwey ughəy chini awu anigə ba mbənə chama ghəy moʼ abú úŋwən, umbi num ka ba ŋwə̂ mben ŋunə umə abú úŋwən.”

Inayn maʼa da ŋwə̂ itɨŋ ghəy yə ikwey

²⁶ Yeso ŋu imbey imə ghayn kwi, “Anó ufon Nwiye ayə akə inji zənə wa miy itɨŋ ughəy ambayn ma.

²⁷ Anigə kə umə ubuni afəb kə umə ikiʼi angom itɨŋ wu tə bura anigə ni ikwey nu uki kyayn ma inji zənə imə ikwey awu.

²⁸ Amə isey imə ghəy kwi u ghəy ni kwey anigə ighəy itɨŋ. Aghəy imbey zənə amə iduw amə atəw nə ubəm boro boro. Iniŋi akəŋ amə ubugə usugə ni itɨŋ imə ikwey.

²⁹ Amaʼazənə isi ikwey itən wa mbayn yi zaʼa ni məʼe damugə amaʼ iməʼi si koʼ.”

Inayn maʼa da ŋwə̂ utɨŋ ghəy

³⁰ “Amə́ ngiya mba mi num iməg akə anó fon Nwiye. Mba mi num inayn maʼa ngiya iməg akə anó ufon wu.”

³¹ Anó ufon Nwiye ayə nə ŋwə̂ itɨŋ azad nu umə tiya akə mustard seed nu wa num ikon asey, ka yə di mə kweʼe ma, yə noʼ ikwey akə azad kyayn.

³² Amaʼa chig itɨŋ azad wu akwey akə azad kyayn nu yə kwey chigə ma uzad ujum. Azad wu mə nə itab kyayn anigə inen tənə imə iwu ikyɨŋ ma awu.

³³ Yeso ŋu imbey imə ghayn inayn maʼa chini nu imə ni izəŋ abú úŋwən akə inji zənə umi kyayn

³⁴ Yeso mə inayn abú úŋwən aba akə inayn maʼa. Asɨmə amaʼazənə umə nə mbə məŋə-anó ma uyə toʼo aton akə inayn maʼa wu abú úŋwən.

Yeso nayn abú afim a chwenə

³⁵ Amaʼazənə injaʼ achigə aney wu, Yeso ghayn abú mbə məŋə-anó ma kwi, “Mba kwenə iŋu anjin animini izi.”

³⁶ Anigə úŋwən sayn ikwiy ba zənə yə mə aboʼo úŋwən anigə mbə məŋə-anó Yeso koʼo inyi ungɨŋ uku ugwi ŋunə Yeso si dey ma awu anigə u num uŋwən iŋu. Iku ugwi chini mə nibə awu.

³⁷ Aba amaʼa wu, afim kaka ti ni chigə anigə une ti ni fure inyi ungɨŋ uku ugwi wu ni así tənə aba pipi une mi sugə ungɨŋ uku ugwi wu

³⁸ Yeso mə anjim uku ugwi mə bunə inaga atəw ma igun pilo, mbə məŋə-anó ŋu noʼo uŋwən ibiri abú uŋwən kwi “Ataʼa ba mba yə iku ŋu ney ngwə kə zənə ayə?”

³⁹ Yeso noʼ itəm anigə ighayn abú afim wu akə igəg kaka kwi, “Chwinə.” Nibi ghayn abú ugwi wu kwi, “Zuw.” Afim wu chwinə anigə imbayn zuw.

⁴⁰ Yeso biri abú mbə məŋə-anó ma kwi, “Mbən mə goro ngiya cha ibeni fiŋ inen e?”

⁴¹ Asɨmə úŋwən sugi nə igoro anigə ighayn akaʼa uma kwi, “Amə ngwa ŋunə nu kaba afim nə ugwi mə zəw uŋwən?”