Ukən chuŋ da Yeso Kristo anji zənə Mak ŋwaʼanayn 11 - Aŋwaʼanayn Uso Fey

Yeso nyi á Yerusanem nu ufon

¹ Amaʼazənə Yeso nə mbə məŋə-anó ma si tinə iyad Yerusanem mbə pey Betefage foro Betani Ugum Olif. Yeso tom mbə məŋə-anó ubigə.

² Wə ghayn abú úŋwən kwi, “Mbən ŋú inyi asin zənə amə imbəy inen aba Amaʼazənə mbən mə inyi awu, mbən yi zən ŋwə̂ jakas utiŋi nu cha wa moʼ di si noʼ koʼ ma awu igun. Mbən za num izaʼa.

³ Wa moʼ bə biri inen kwi, ‘Mbən mə za ŋwə̂ jakas yugə da ngiya?’ Mbən ghayn abú uŋwən kwi, ‘Amə Asɨyisəg mə kaba anigə u yi gha cha aba akinine.’”

⁴ Mbə ŋu pey yi zən ŋwə̂ jakas nu mbə tiŋe imbey ina iyad inji. Umugə mbə́ mə́ izá,

⁵ ba moʼ mbə təmə iyad kuŋ biri abú úŋwən kwi, “Amə ngiya mbən mə ighəy? Mbən mə za ŋwə̂ jakas yugə da ngiya?”

⁶ Mbə ghay anó zənə Yeso ghayn abú úŋwən kwi u ghay. Ba wu zəw nigə isayn kwi úŋwən ŋuw ni iŋwen.

⁷ Mbə ŋu nə ŋwə̂ jakas wu pey yi naʼ abú Yeso. Mbə naʼ nigə i zere ndwi ma igun ŋwə̂ jakas wu. Anigə Yeso koʼ ichomo igun.

⁸ Ba nanaʼ zere ndwi uma igun inji uchini u zere utəw uzad nu mbə buʼi ungɨŋ mbayn.

⁹ Ba mbənə mbə mə iŋuw imbey nə u mbənə mbə́ mə́ zaʼa anjim mbə mə ikyay ighayn kwi mba yere Nwiye, Nwiye zi aborobod igun wa ŋunə u zaʼa akə ukum Asɨyisəg

¹⁰ “Nwiye zi aborobod igun anó ufon zənə amə zaʼa nu amə iyi ungwa mbaʼ Dafid, mba yere Nwiye ŋunə umə azobo!”

¹¹ Yeso nyi á Yerusanem chigə iŋu ungɨŋ ambəŋ Nwiye. Wə pey yi iney u aghəy ujum ghaba asɨmə numugə amaʼ si chigə, yə du iŋuw á Betani ni mbə məŋə-anó ma ighum cho bigə.

Yeso naʼa idon abú azad fig

¹² Aney kuŋ, Amaʼazənə Yeso ni mbə məŋə-anó ma noʼo Betani, injəy ti ni zaŋa Yeso.

¹³ Wə təm izən azad fig ukwey sa ni ifuʼ kəbərə yə zən nigə itinə ŋu awu iyad izən kwi itɨŋ moʼ mə awu. Amaʼazənə yə pey awu itin azad, yə zən aba ifuʼ damugə akə ma amaʼazənə fig mə kuw.

¹⁴ Anigə Yeso ghayn abú azad fig awu kwi “Cha wa moʼ mi noʼo gha jəg utɨŋ ni ngwə kuw ighari chini.” Amaʼazənə yə mə ghayn nigə, mbə məŋə-anó ma zəw.

Yeso ŋu nyi ungɨŋ imbəŋ Nwiye

¹⁵ Amaʼazənə Yeso ni mbə məŋə-anó ma ŋu pey á Yerusanem, yə ŋu inyi ungɨŋ imbəŋ Nwiye pey ni fuw ba mbənə mbə́ mə́ fənə u aghəy nibi fuw u mbənə mbə́ mə́ zono. Wə ghayi ugəyi ba mbənə mbə́ mə́ koboro ukab nibi ghayi utən ba mbənə mbə mə́ fənə buŋ

¹⁶ Cha yə di beni ma kwi wa beʼe ghəy moʼ chigə asama ambəŋ Nwiye.

¹⁷ Umugə yə mə taʼa úŋwən yə ghayn kwi, “ka uŋwaʼanayn kwi, ‘U mbi sə tiya inyi na kwi amə na ichaʼara Nwiye abú ba ubey ujum e? Asɨmə mbən si bəŋ akə asin nu iji mə paʼa akuŋ.’”

¹⁸ Ba kyayn ambəŋ Nwiye ni ba mbənə mbə mə́ ataʼa ba akə unoʼo zəw anó zənə yə ghayn anigə mbə mə kaba inji izwere uŋwən. Mbə gəd uŋwən damugə ikwiy ba wu ujum mə yere unó mbənə yə mə taʼa.

¹⁹ Amaʼazənə injaʼ chigə Yeso ni mbə məŋə-anó ma du á Yerusanem ŋu ma.

Ano ni kweme akə azad fig wu

²⁰ Afəfəb aney kuŋ, Amaʼazənə Yeso nə mbə məŋə-anó ma mə yeŋ chigə, mbə zən azad fig wu así zom ŋu pey akə ighaŋ

²¹ Pita zən nigə ikono anó zənə Yeso ghayn anigə ighayn abú uŋwən kwi “Ataʼa ba ney azad fig zənə ngwa naʼa idon abə aŋwayn yə si ku.”

²² Yeso ywiri abú úŋwən kwi, “Mbən zi fiŋ inyo Nwiye”

²³ Ayə ghayn asiʼ inen kwi wa moʼ bi ghayn abú igun ŋunə kwi “u duw iŋuw fayin ungɨŋ iba nu cha umə kono ma ikono anigə ibeni ungɨŋ fiŋ ma kwi anó zənə u ghayn ayi aghəy, ayi ghə aba anji zənə uŋwən ghayn.”

²⁴ Anigə ayə ghayn inen kwi unó ujum mbənə mbən chaʼara Nwiye i biy abú uŋwən ibeni kwi mbən yi mə nə aghəy wu, mbən yi mə nə aghəy wu.

²⁵ Amaʼazənə mbən təm imə chara Nwiye, mbən waʼ unó iboŋ mbənə umbən unya si ghayn inen da ungwa mbaʼ ŋunə umə azobo umi nyaba umbən unó iboŋ

²⁶ [Mbən bə ton i waʼ unó iboŋ ba chini, cha mbaʼ uŋunə umə azobo mi waʼa ma umbən mə unó iboŋ].

Ibiri da asin zənə ikay Yeso mə noʼo akuŋ

²⁷ Yeso nə mbə məŋə-anó ma gha iŋu á Yerusanem, Amaʼazənə yə mə iyeŋ ungɨŋ imbəŋ Nwiye, ba kyayn ambəŋ Nwiye, ba mbənə mbə́ mə́ ataʼa ba akə unoʼo foro ba kyayn ungɨŋ abey wu ŋu abú uŋwən

²⁸ mbə pey yi biri abú uŋwən kwi, “Ngwə mə num ə ikay aŋwayn imə ighəy ino mbəŋ? Amə ingwə naʼa ikay wu inigə.”

²⁹ Yeso ghayn abú úŋwən kwi, “A yi nibi biri ibiri feyn inen mbən bə ywere aŋu anigə a yi ghayn asin zənə amə numə ikay awu imə ighəy unó mbəŋ.

³⁰ Amə Nwiye yə naʼa ikay abú Jon kwi uni naʼa une kə amə ba? Mbən ghay iniŋ.”

³¹ Mbə ti ni taŋa uma uma ghayn kwi, “Mba bi ghayn kwi amə Nwiye u yi biri ina kwi, ‘Abə mə nigə mbən si ki beni ngwən uŋwən da ngiya?’”

³² Mba bə ghayn kwi amə ba, Mbə́ god ba damugə mbə beni kwi Jon mə wa ukən Nwiye asiʼ.

³³ Anigə mbə ywiri abú Yeso kwi, “Cha mba di kyayn.” Yeso ghayn abú úŋwən kwi, “Cha ami nibi ghayn aŋu wa ŋunə u naʼa ikay iniŋ kwi ani aghəy unó mbəŋ ujum.”