Matəw 9 - Aŋwaʼanayn Uso Fey

Yeso zwey anóm nu aba inyo ma feyn ku

¹ Yeso nyi abaŋ ugwi kwene ŋu ungɨŋ asin zənə yə́ mə́ chomo awu.

² Amaʼazənə yə pey awu, ba moʼ beʼe anom igun abaʼa iŋu abú uŋwən. Amaʼazənə Yeso zən umugə ba wu zi fiŋ inyo ma, Yə ghayn abú anom ŋunə aba inyo ma feyn ku kwi, “Yimə fiŋ inyi ajoŋ, mə si waʼ umbə unó iboŋ.”

³ Amaʼazənə yə ghayn nigə, mbə́ taʼa ba akə unoʼo moʼ ghayn akaʼa uma kwi, “Anom ŋunə yə jimə Nwiye!”

⁴ Yeso kyay ikono uma anigə yə́ ighayn kwi, “Mbən mə kono unó iboŋ itən fiŋ da ngiya?

⁵ Amə anó zayn amə zaba? Amə ighayn kwi, ‘Mə si waʼ Umbə unó iboŋ’ kə ighayn kwi, ‘Noʼo atey iyeŋ?’

⁶ Anigə ayi aghəy mbən kyay kwi Ŋwə̂ Wa yə nə ikay akə igun isəg iwaʼ unó iboŋ ba.” Amaʼazənə yə ghayn nigə, yə́ ghayn abú wa ŋunə aba inyo ma feyn ku kwi, “Noʼo atey beʼe injə abaʼa ŋu unuʼ.”

⁷ Anom wu noʼ atey ŋuw ma unuʼ.

⁸ Amaʼazənə akama ba wu zən anó zəŋ, mbə́ bó anigə iyere Nwiye umugə u naʼa ukudu ikay yugə abú wa.

Yeso tiya Matiyo

⁹ Yeso noʼ asin wu, umugə yə́ mə́ yeŋ ŋuw, yə zən anom moʼ nu mbə́ mə́ tiya akə Matiyo. Yə chomo ungɨŋ na zənə umə fere ukab tag awu ungɨŋ. Yeso ghayn abú uŋwən kwi, “Niŋe inyi jim” Matiyo noʼ iniŋe anjim ma.

¹⁰ Amaʼazənə Yeso nə mbə məŋə-anó ma chomo ni jəgə ungɨŋ na Matiyo, mbə fere utag chini nanaʼ foro ba mbənə umə aghəy unó iboŋ foro ni ijəg aboʼo úŋwən.

¹¹ Amaʼazənə ba Farasay zən anó zəŋ, mbə́ biri abú mbə məŋə-anó ma kwi, “Ungwən ataʼa ba mə jəgə ni mbə fere ukab tag foro nə ba mbənə umə aghəy unó iboŋ da ngiya?”

¹² Amaʼazənə Yeso zəw anó zəŋ, yə ghayn kwi, “Cha ba mbənə umə ikay mə kaba uma wa ifuʼ. Amə ba mbənə umə sɨgə, umə kaba wa ifuʼ

¹³ Mbən ŋuw ikab aton akə inayn zənə ighayn kwi, ‘Ayə kaba amə kwi diri ba umbi. Akaʼa ma kwi ba naʼa u aghəy ifá iniŋ.’ Cha adi zaʼa aŋu i tiya ba mbənə umə aghəy unó mbənə ukoʼoro, mə zaʼa itiya amə ba unoʼ iboŋ.”

Ibiri da anó ni ijiyə injəy

¹⁴ Mbə́ məŋə-anó Jon ŋunə yə́ mə́ naʼa une ŋu abú Yeso pey yi biri abú uŋwən kwi, “Aton zənə umba nə ba Farasay mba mə ijiyə injəy cha umbə məŋə-anó mə ijiyə uma amə da ngiya?”

¹⁵ Yeso ywiri abú úŋwən kwi, “Ba mbənə u ŋuw ijəg ugən mi chomo akə akənə ngiya nu unom ugən mə aboʼo úŋwən? Aney yi zaʼa nu umi num unom ugən wu akaʼa uma. Aney wu bə koʼo, umbi ijiyə injəy.

¹⁶ Cha wa moʼ mə num ma aba ndwi fey ikən ubəg akə anun ndwi awu. U bə ghəy nigə, aba ndwi fey wu ayi gha pəŋi ubəg kyayn akə anun ndwi wu.

¹⁷ Kə cha wa moʼ mə num ma unoʼ zuw zi ungɨŋ toʼ zənə i siy ibey. Ubə ghəy nigə, amaʼazənə unoʼ wu mi ti mə tənə, toʼ wu yi toʼo anigə unoʼ tuwə. Umbə zi unoʼ zuw ungɨŋ toʼ fey da ka u nim ma toʼ inim unoʼ.”

Yeso zəmə akwere moʼ nibi zwey ayey nu yə́ mə́ sɨgə

¹⁸ Amaʼazənə Yeso mə bugə inayn, wa kyayn moʼ abú ba Jû ŋu abú uŋwən. Pey yi zum utəw nwi ifigi ma ghayn kwi, “Inyi akwere chere iku. Zaʼa iniŋi umbə ubugə igun ma anigə uyi gha zəmə.”

¹⁹ Yeso nə mbə məŋə-anó ma noʼ ni ŋuw aboʼo uŋwən.

²⁰ Ayey moʼ nu yə si sɨgə imbayn beni akə ituʼ ighum cho bigə ŋu anjim Yeso pey yi bira iyad ndwi ma.

²¹ Yə́ ghayn ungɨŋ fiŋ ma kwi, “Abə́ bira aba ndwi ma a yi boro.”

²² Amaʼazənə yə bira nigə, Yeso gha ma zən uŋwən ghayn abú uŋwən kwi, “Uŋu kwere yimə fiŋ, injə ibeni fiŋ aghəy ayə ngwə boro.” Aba ghari wu, ayey wu boro.

²³ Amaʼazənə Yeso ŋu aku wa kyayn wu abú ba Jû, yə zən ba umə toŋo adura inbi zən umoʼ nu umə idey ijoʼo.

²⁴ Amaʼazənə yə zən nigə, yə ghayn abú úŋwən kwi, “Mbən duw isəg, cha akwere zəŋ di si kuw ma uyə bune amə buni.” Amaʼazənə yə ghayn nigə, ba wu chiʼ uŋwən.

²⁵ Amaʼazənə mbə́ si cha ba wu isəg, Yeso nyi ungɨŋ na wu yimə abugə akwere wu. Akwere wu noʼ təm atəy.

²⁶ Ukən da anó zəŋ saŋa ungɨŋ aba abey wu ujum.

Yeso zwey ifəg ibigə

²⁷ Amaʼazənə Yeso noʼo asin wu, umugə yə mə yeŋ ŋuw, anom ubigə nu amə́ ifəg niŋe anjim ma. Mbə́ mə́ yeŋ yə kyayn akə ikay ghayn kwi, “ŋwə̂ Dafid kənə akə ngwa.”

²⁸ Amaʼazənə Yeso nyi ana, ifəg wu ŋu abú uŋwən. Anigə yə́ biri abú úŋwən kwi, “Mbən beni kwi ayə nə ikay ighəy mbən zən usin?” Mbə́ ywiri kwi, “Masa mba beni.”

²⁹ Yeso bira aghɨ uma ighayn kwi, “Anó zənə mbən beni aghəy inen nigə.”

³⁰ Anigə mbə́ gha ti ni zən usin. Yeso chere úŋwən akə ikay ighayn kwi, “Ka mbən aghəy ngwən kwi wa moʼ noʼo kyay anó zəŋ.”

³¹ Asɨmə mbə́ noʼ ni yeŋ yə saŋa ukən da Yeso ungɨŋ aba abey wu ujum.

Yeso zwey anóm moʼ nu cha yə́ mə́ inayn

³² Amaʼazənə ifəg wu mə ŋuw, ba moʼ num anóm moʼ nu uzugə iboŋ aghəy u beŋe akə ukəw ŋuw abú Yeso.

³³ Amaʼazənə Yeso chi uzugə iboŋ wu, anom wu ti ni inayn. Ba ujum yere, anigə ighayn kwi, “Cha mba di si noʼ zən ngwa ukudu unó uŋu ungɨŋ Izre.”

³⁴ Asɨmə ba Farasay ghayn kwi, “Amə ufon abú uzugə iboŋ u naʼa ikay abú uŋwən kwi u chiyə uzugə iboŋ.”

Yeso kənə akə ba

³⁵ Yeso mə gha yeŋ usin kyayn ujum foro ungɨŋ usin kukuŋe ujum. Yə́ mə́ yeŋ yə itey unó ungɨŋ na ibumi ba Jû tənə tə́ mə́ ungɨŋ usin wu. Yə́ mə́ nibə yeŋ yə ghayn ukən uchuŋ da anó ufon azobo, nibə yə zwey ikudi isɨgə ujum.

³⁶ Amaʼazənə yə́ zən akama ba wu, akənə sugi ungɨŋ fiŋ ma abú úŋwən. Damugə mbə́ mə́ zəw ingəʼ foro da mugə amə cha wa yə mə ywere úŋwən. Anigə, mbə́ chomo ni injəg tənə cha anəmə injəg.

³⁷ Yə ghayn abú mbə́ məŋə-anó ma kwi, “Ughəy jaŋa mbə nanaʼ, asɨmə ba faʼa kweʼ.

³⁸ Anigə, mbən chaʼara Asɨyisəg ŋunə amə imbayn ima kwi u cha ba faʼa u ŋuw jaŋa u ghəy ma.”