Matəw 5 - Aŋwaʼanayn Uso Fey

Yeso ghayn inayn Nwiye igun ugum

¹ Amaʼazənə Yeso zən akama ba mə ŋuw aboʼo uŋwen, yə́ koʼ iŋu igun ugum pey yi chomo asey. Mbə́ məŋə-anó ma chomo ikad uŋwen.

² Yə́ ti ni taʼa úŋwen.

Anó da aborobod

³ Yə ghayn kwi, “Nwiye ziyə aborobod igun ba mbənə u sayn unó uma ujum inya ubugə ma, Damugə umbi jəg anó ufon azobo.

⁴ Nwiye ziyə aborobod igun ba mbənə umə dey, Damugə uyi boŋo úŋwen.

⁵ Nwiye ziyə aborobod igun ba mbənə umə num inyo ma asey, Damugə umbi mə nə ghəy zənə Nwiye si kaʼ

⁶ Nwiye ziyə aborobod igun ba mbənə injəy mə zaŋa abú úŋwen ighəy anó zənə akəʼə Damugə Nwiye yi naʼ aghəy zənə umə kaba.

⁷ Nwiye ziyə aborobod igun ba mbənə umə nə adiri abú ba mbi Damugə Nwiye yi mə nə adiri abú úŋwen.

⁸ Nwiye ziyə aborobod igun ba mbənə fiŋ ma mə zayn Damugə umbi zən Nwiye.

⁹ Nwiye ziyə aborobod igun ba mbənə umə aghəy kwi ba chomo akə aborobod Damugə Nwiye yi tiya úŋwen kwi amə umbəŋ ma.

¹⁰ Nwiye ziyə aborobod igun ba mbənə u nwini inya ughəw uma damugə umə aghəy unó mbənə u kəʼə Damugə umbi jəg anó ufon azobo.

¹¹ Nwiye ziyə aborobod igun inen umbən mbənə ba mə jimə ngwen, inwine itən inya ughəw, ighayn ukudu unó figi iboŋ ujum damugə mbən beni aŋu.

¹² Mbən ki wuʼe ngwen damugə Nwiye yi naʼa uneʼe kyayn inen azobo. Amə nibə anji zənə ba nwine inya ughəw ba ukən Nwiye mbənə mbə́ mə́ awu ki u mbən.”

Anó da ugwaŋ nə uzayn zayn

¹³ Yeso ŋu imbey ni ghayn kwi, “Mbən yə nə ugwaŋ abú ba mbənə umə aki igun isəg. Asɨmə ugwaŋ bə si tu, cha nji amə aghəy u aghəy kwi uni gha nəmə. Cha aghəy amə aghəy ughəy nə ugwaŋ wu chigə kwi umbi waʼ ba ki yeŋ igun.”

¹⁴ “Mbən yə nə uzayn zayn abú isəg. Cha asin zənə u chimi igun ugum mə paʼa ma.

¹⁵ Cha wa moʼ awu nu umbə chəw anam u num ŋu zi aton ukuʼ. U bə chəw anam, u yə isiyə igun asin zənə umə isiyə anam akuŋ, da ami mə zayn abú ba ujum mbənə umə zaʼa ungɨŋ na.

¹⁶ Amə nibə nigə nu úŋwen zayn zayn yi tey ifigi ba da u zən unó chuŋ mbənə mbə mə aghəy anigə iyere úŋwen Mbaʼ ŋunə umə azobo.”

Anó da unoʼo Mose

¹⁷ Yeso ŋu imbey bə ghayn kwi, “Mbən kono ngwən kwi, mə zaʼa iniy unoʼo Mose nə unoʼo mbənə ba ukən Nwiye ŋwaʼanayn. Cha a di zaʼa aŋu iniy. Mə zaʼa ighəy kwi unoʼo wu duw akə asiʼ.

¹⁸ Ayə ghayn asiʼ inen kwi, pey amaʼazənə azobo nə isey mi chigə, cha kaba ŋwə̂ asin akə unoʼo wu mi nim pey amaʼazənə umi aghəy unó wu ujum.

¹⁹ Wa moʼ mbə gow kaba ŋwə̂ noʼo moʼ akaʼa unoʼo wu, kə itaʼa wa chini kwi u gow, Nwiye yi num uŋwen ni wa ŋunə ukweʼe chigə ba ujum ungɨŋ anó ufon azobo. Anigə wa moʼ bə sə aghəy anó zənə unoʼo mə ghayn anigə ni taʼa ba chini kwi uni aghəy, Nwiye yi num uŋwen akə wa kyayn ungɨŋ anó ufon azobo.

²⁰ Ayə ghayn asiʼ inen kwi mbən bə kə aghəy ngwen unó chuŋ chigə umugə mbə́ taʼa ba akə unoʼo foro ba Farasay mə aghəy, nji cha mbən mi noʼo nyi ungɨŋ anó ufon azobo.”

Anó da imə sey itəm

²¹ Yeso mə́ bə́ ghayn kwi, “Mbən si zəw kwi mbə́ ghayn abú umbən ba imbəy kwi, ‘Ka uzwere uma wa, foro kwi wa bə zwere wa chini umbi saʼ uŋwen.’”

²² Asɨmə ayə ghayn inen kwi, “Wa moʼ bə isiy itəm nə unya ma, umbi saʼa uŋwen. Wa moʼ mbə jimə unya ma, umbi num uŋwen ŋu kwi mbə saʼa abey saʼ uŋwen. Wa moʼ mbə ghayn abú unya ma kwi, ‘Ngwə mə aneŋ!’” Umbi maʼa uŋwen ungɨŋ uwəd nu cha umi noʼ inimə.

²³ Anigə ngwə bə mə ŋuw nə aghəy ifá adiŋi ungɨŋ imbəŋ Nwiye, anigə ikono kwi ungwə unya yə nə anó moʼ nə ungwə,

²⁴ siy aghəy wu imbey adiŋi wu dey ŋu tana anó wu nə ungwə unya ki sə ŋu naʼa injə aghəy bú Nwiye.

²⁵ “Yabi tana ni wa ŋunə u zi usaʼa igun nigə ki mbən sə ŋu pey ana usaʼa, damugə mbən bə pey ana usaʼa, uyi naʼa ayə abú mbə́ saʼa usaʼa. Mbə saʼa usaʼa wu mbi naʼa ayə abú uporisi uŋu zi ayə ana indəŋ.

²⁶ Ayə ghayn asiʼ inen kwi, cha ngwə mi du andəŋ pey amaʼazənə ngwə mi naʼa ukab ma ujum.”

Anó ni ineŋe nə ayey chini kə anóm chini

²⁷ Yeso ŋu imbey ni ghayn abú úŋwən kwi, “Mbən si zəw kwi, ‘Ka wa moʼ neŋe ma uyey kə unom wa chini.’

²⁸ Asɨmə ayə ghayn inen kwi, wa ŋunə u ney ayey kə anóm iswene adoʼ, kyay kwi yə gow anó nə uŋwen ungɨŋ fiŋ ma.

²⁹ Anigə, injə ighɨ jəgi mbə aghəy kwi ngwə gow anó, chiyə waʼ. Yə boŋ kwi ngwə nim asin inyo moʼ chigə umugə ngwə mi mə nə usin inyo ujum Nwiye maʼa ayə asin ingəʼ.

³⁰ Injə abugə jəgi bə aghəy kwi ngwə gow anó, səg waʼ. Yə boŋ kwi ngwə nim asin inyo moʼ chigə umugə ngwə mi mə nə inyo ujum Nwiye maʼa ayə asin ingəʼ.”

Anó da ighaba inama

³¹ Yeso ŋu imbey ighayn kwi, “Mbə́ nibi ghayn kwi, ‘Anom ŋunə u ghaba inama nə uyey ma yi naʼa aŋwaʼanayn abú uŋwen itey kwi mbə́ si ghaba inama.’

³² Asɨmə ayə ghayn inen kwi, anóm ŋunə u ghaba inama nə uyey ma ichigə akə anó kwi yə neŋe nə anóm chini yə aghəy uyey ma kwi neŋe unom wa chini. Anigə wa ŋunə u nama ayey ŋunə u duw inama, anóm wu neŋe uyey wa chini.”

Anó da imeʼe ayə

³³ Yeso ŋu imbey ghayn kwi, “Mbən si nibi zəw mbə́ ghayn abú ba imbey kwi, ‘Ka wa moʼ meʼe ma ama akə anó moʼ igha iton. Asɨmə ughəy anó zənə yə meʼe ma abú Asɨyisəg kwi iyi aghəy.’

³⁴ Asɨmə ayə ghayn inen kwi ka wa moʼ meʼe ma ama akə anó moʼ. Ka wa meʼe ma ama akə anó moʼ itiya azobo damugə azobo amə atən ufon Nwiye,

³⁵ Kə meʼe ma akə anó moʼ itiya isey damugə isey amə asin zənə Nwiye kwaʼa ughəw ma igun. Ka wa meʼe ma akə anó moʼ itiya Yerusanem damugə Yerusanem amə asin ifon kyayn.

³⁶ Ka wa meʼe ma akə anó moʼ itiya atəw ma damugə cha wa moʼ awu amə aghəy u aghəy kwi inyoŋ atəw moʼ ifuw kə kwi ifid.

³⁷ Mbən ghayn aba kwi ‘Aŋ kə indəʼ.’ Anó chini zənə wa mə ghayn ayə noʼo abú wa iboŋ.”

Anó da iwiy anó iboŋ

³⁸ Yeso ŋu imbey ighayn kwi, “Mbən si zəw kwi mbə́ ghayn kwi, ‘Wa moʼ mbə́ toʼo ighɨ wa chini u nibi toʼo ima. Mbən nibi zəw kwi wa moʼ bə choʼo isoŋ wa chini u nibi choʼo ima.’

³⁹ Asɨmə ayə ghayn inen kwi, wa moʼ bə aghəy anó iboŋ inen, ka mbən iwiy gwen. Wa moʼ bə feyn injə aba indəʼ, gha izi itey abú uŋwen fən.

⁴⁰ Wa moʼ bə puri ayə da inum injə ndwi ubəm, sayn uŋwen num foro injə ndwi maʼa fən.

⁴¹ Wa moʼ bə yimə ayə akə ikay kwi ngwə beʼe ughəy ma iyeŋ kiloməta ifew, beʼe u ghəy wu iyeŋ ukiroməta ubigə.

⁴² Wa moʼ bə kaba inum aghəy moʼ inigə, naʼa abú uŋwen. Wa moʼ bə kaba ichoʼo aghəy moʼ inigə, iton ayə.”

Anó da iwuʼ ba bana

⁴³ Yeso ŋu imbey ni ghayn kwi, “Mbən si zəw kwi mbə́ ghayn kwi, ‘Wuʼ ungwə unya ibana ungwə wa bana.’

⁴⁴ Asɨmə ayə ghayn inen kwi, mbən wuʼ umbən ba bana ni chaʼara Nwiye abú ba mbənə umə nwini itən inya ughəw,

⁴⁵ da mbən mi mə buŋ abú úŋwen Mbaʼ ŋunə umə azobo. Damugə u yə aghəy achugi bigə abú ba mbənə umə aghəy unó iboŋ foro abú ba mbənə umə aghəy unó chuŋ. Uyə aghəy imbəŋ choʼo abú ba mbənə umə aghəy unó iboŋ foro abú ba mbənə umə aghəy unó chuŋ.

⁴⁶ Mbən bə mə wuʼe aba ba mbənə umə wuʼe ngwən, nji Nwiye mi si choʼo afaʼa inen ngiya? Damugə kaba ba mbənə umə numə ukab tag u mbə ghəy nigə.

⁴⁷ Anigə ngwə bə mə chaʼara aba umbə unya, amə anó chuŋ ngiya mbən mə aghəy chigə ba umbi? Kaba ba mbənə umə aghəy unó iboŋ umbə aghəy nigə.

⁴⁸ Anigə mbən ni aghəy unó nu u boŋo mara numugə ungwen Mbaʼ ŋunə umə azobo məŋi.”