Matəw 28 - Aŋwaʼanayn Uso Fey

Yeso si zəmə

¹ Amaʼazənə anəy aku ba Jû si chigə, asə afəfəb ni imbiri anəy sonde, Meri Magdelen, ni Meri chini ŋu iney isəy wu.

² Umugə mbə́ ŋu nigə, u sə ŋu zən imbayn ti ki nyiʼere kwaʼa akə ikay anigə angəd Asɨyisəg swiʼi zaʼa azobo pey yi ibin itəy wu ichi uchəw isəg wu chomo igun.

³ Inyo ma mə məŋərə ni imbəŋ ŋwaʼa. Ndwi ma mə nibə fuw nə asəg.

⁴ Usogwi mbənə mbə́ mə́ nəmə isəy wu gəd kwaʼa akə ingəʼ. Anigə mbə ibó chomo nə uwu ba.

⁵ Asɨmə angəd wu ghayn abú mbə ayey wu kwi, “Mbən mə goro ngwən mə kyayn kwi mbən yə kaba Yeso ŋunə mbə́ komo azad abaʼaray.

⁶ Cha uŋwən akəŋ, yə si zəmə aba anji zənə yə́ ghayn inen. Mbən zaʼa izən asin zənə mbə́ niŋi uŋwən akuŋ.

⁷ Anigə mbən yabi ŋu ghayn abú mbə məŋə-anó ma kwi, ‘Yə si zəmə anigə u yə ŋuw imbey inen a Galeli. Mbən yi zən uŋwən awu.’ Mbəni nyaba ngwən anó zənə aghayn inen.”

⁸ Ayey wu yabi noʼ atəw isəg wu, mbə́ mə́ yeŋ yə goro, asɨmə iwuʼi sugi ungɨŋ fiŋ uma. Mbə́ nod da iŋu ghayn anó zəŋ abú mbə məŋə-anó ma.

⁹ Amaʼazənə mbə́ mə́ noro ŋuw nigə, u sə ŋu zən, Yeso saʼa kuw úŋwən ghayn kwi, “A yə chaʼara ngwən.” Amaʼazənə yə ghayn nigə, mbə ŋu abú uŋwən pey yi yimə ughəw ma iwumini uŋwən.

¹⁰ Yeso ghayn abú úŋwən kwi, “Mbən mə goro ngwən. Mbən ŋu ghayn abú umbəŋ unya anom kwi uŋuw a Galeli umbi zən aŋu awu.”

Usogwi ghayn anó zənə yə duw

¹¹ Amaʼazənə mbə ayey wu mə́ ŋuw, usogwi moʼ akaʼa mbənə mbə́ mə́ nəmə isəy wu ŋu ungɨŋ asin wu. Mbə́ pey yi ghayn unó ujum mbənə mbə duw abú ba ukyayn ambəŋ Nwiye.

¹² Amaʼazənə ba ukyayn ambəŋ Nwiye nə ba ukyayn ungɨŋ abey mbə fere, mbə́ tana unó mbənə umi ghayn. Mbə tana nigə inaʼ ukab nanaʼ abú usogwi wu.

¹³ Mbə na nigə ighayn abú úŋwən kwi, “Mbən ghayn abú ba kwi, ‘Mbə məŋə-anó ma zaʼa iji awu ma afəb Amaʼazənə mbən mə bune.’

¹⁴ Kanə gobono di zəw, mba yi kyayn anó ni ghayn abú uŋwən da ichi ngwən angəʼ.”

¹⁵ Usogwi wu num ukab awu anigə iŋu aghəy aba anji zənə mbə ghayn abú úŋwən. Zəŋ amə anó zənə amə saŋa akaʼa ba Jû izaʼa pey akə̂choŋ.

Yeso naʼa afaʼa kyayn abú mbə məŋə-anó uma

¹⁶ Mbə məŋə-anó Yeso ighum cho feyn ŋu igun ugum a Galeli asin zənə Yeso ghayn abú úŋwən kwi uŋuw.

¹⁷ Amaʼazənə mbə́ zən uŋwən, mbə́ wumini uŋwən. Asɨmə mbi moʼ məŋərə uma kwi amə kaŋa Yeso.

¹⁸ Yeso ŋu abú úŋwən pey yi ghayn kwi, “Nwiye si naʼ ikay ujum iniŋ itumə azobo foro isəy.

¹⁹ Anigə mbən ŋuw abú ba ujum ungɨŋ ubey ujum ighəy kwi úŋwən amə umbəŋ məŋə-anó. Mbən naʼa une abú úŋwən akə ukum Mbaʼ, akə uyi Ŋwə̂ foro akə uyi Azugə zayn zayn.

²⁰ Mbən taʼa úŋwən kwi u siy unoʼo ujum mbənə asi naʼ inen. Mbən kyáy kwi ayi mə nə umbən ighari ujum iŋu pey akə Amaʼazənə isəg mi nwi.”