Matəw 27 - Aŋwaʼanayn Uso Fey

Mbə́ num Yeso ŋu ifigi Paled

¹ Afəfəb ni imbiri, ba ukyayn ambəŋ Nwiye ni ba ukyayn mbənə umə ungɨŋ abey yimə ufere itana umugə umi zwere Yeso.

² Mbə́ tana nigə, ikod uŋwən num ŋu naʼ abú Paled nu amə gobono.

³ Amaʼazənə Judas ŋunə yə fənə Yeso zəw kwi mbə sob kwi uzwere Yeso, yə́ beŋe fiŋ ma gha ŋu wiy ukab u sɨriva wu ighum uta abú ba ukyayn ambəŋ Nwiye ni ba ukyayn ungɨŋ abey.

⁴ Yə naʼ nigə ghayn kwi, “Mə aghəy unó iboŋ umugə a fənə wa nu cha u gow ma anó moʼ.” Mbə ywiri kwi, “Cha zigə mə ma anó moʼ ina, ayə ney mə ayə.”

⁵ Judas zəw nigə ŋu maʼ ukab wu ungɨŋ imbəŋ Nwiye du sayn. Yə ŋu swene.

⁶ Ba ukyayn ambəŋ Nwiye bɨŋi ukab wu ghayn kwi, “Uŋu amə ukab anəm, anigə cha umba unoʼo mə tey ma kwi mba zi ukab uŋu aboʼo ukab ŋunə umə ambəŋ Nwiye.”

⁷ Mbə ghayn nigə, yimə ufere num ukab wu ŋu zon asin abú wa moʼ yə mə tana akyɨŋ nu umi mə itwayn ba isoʼ akuŋ.

⁸ Amə aton zənə izaʼa pey akə̂choŋ umbə tiya asin wu kwi Asin Anəm.

⁹ Anigə, anó zənə wa ukən Nwiye Jeremiya ŋwaʼanayn duw akə asiʼ kwi, “Mbə num ukab sɨriva ighumi ta nu amə unun ukab ŋunə ba Izre beni kwi umbi naʼ igun atəw ma,

¹⁰ ŋu zon asin abú atana ikyɨŋ awu anji zənə Nwiye ghayn iniŋ.”

Paled nwine Yeso

¹¹ Yeso təm ifigi gobono, anigə gobono wu biri abú uŋwən kwi, “Ngwə mə ufon ba Jû?” Yeso ywiri kwi, “Ngwə si ghayn nigə.”

¹² Asɨmə cha yə ghayn ma anó moʼ Amaʼazənə ba ukyayn ambəŋ Nwiye, ni ba ukyayn mbənə umə ungɨŋ abey mə zi unó igun ma.

¹³ Anigə Paled biri abú uŋwən kwi, “Cha ngwə mə zəw ayə unó mbəŋ ujum umə zi igun inigə?”

¹⁴ Asɨmə cha Yeso di ywiri ma kaba ŋwə anó moʼ. Anigə anó wu chigə gobono.

Paled sob kwi u zwere Yeso

¹⁵ Akə umaʼ ujum mbənə umə jəgə Ufere Izaʼara Chigə Igun, gobono mə chiyə wa ndəŋ feyn sayn, nu amə uŋunə unoŋ ba kaba.

¹⁶ Akə amaʼa wu, anóm moʼ mə ndəŋ nu unoŋ ba wu kyay uŋwən da unó iboŋ mbənə yə mə aghəy. Ukum ma mə Barabas.

¹⁷ Amaʼazənə unoŋ ba wu fere, Paled biri abú úŋwən kwi, “Wa ŋunə mbən mə kaba kwi a chiyə sayn inen amə ngwa? Amə Barabas kə Yeso ŋunə mbən mə tiya akə wa ŋunə Nwiye zoʼo?”

¹⁸ Yə biri ney damugə yə́ kyay kwi ba Jû yimə Yeso zaʼa naʼ abú uŋwən da imbəw.

¹⁹ Amaʼazənə Paled chomo igun atən zənə umə chomo igun isobo usaʼa, uyey ma cha ukən abú uŋwən ghayn kwi, “Imə ayə nə anó moʼ ighəy abú anóm uŋu. Cha udi gow ma anó moʼ damugə mə kaŋa zəw ingəʼ akə afəb anjəm da uŋwən.”

²⁰ Ba ukyayn ambəŋ Nwiye ni ba ukyayn ungɨŋ abey ghəy ba wu ughəy kwi paled chiyə Barabas sayn, anigə izwere Yeso.

²¹ Paled biri abú úŋwən kwi, “Akaʼa anóm mbənə ubigə wa ŋunə mbən kaba kwi a chiyə sayn inen amə ngwə?” Mbə́ ywiri kwi, “Chiyə Barabas.”

²² Paled biri abú úŋwən kwi, “Asi aghəy anó ngiya abú Yeso ŋunə mbən mə tiya akə wa ŋunə Nwiye zoʼo?” Mbə ywiri kwi, “Komo uŋwən azad abaʼaray.”

²³ Paled biri kwi, “Da ngiya? Yə gow anó ngiya?” Mbə mara ikyayn akə ikay ghayn kwi, “Komo uŋwən azad abaʼaray!”

²⁴ Amaʼazənə Paled zən kwi cha anó moʼ amə aghəy ugha ighəy, aba kwi ibə ŋuw imbey nji indum yi dú, yə́ num une isəw ubugə ma ifigi unoŋ ba wu ujum ghayn kwi, “Cha inyi abugə akə iwu anóm ŋunə, ayə iney ngwən!”

²⁵ Ba wu ujum ywiri kwi, “Indon da mugə mba zwere uŋwən nyi igun na nibi nyi igun umba buŋ!”

²⁶ Anigə Paled chi Barabas sayn abú úŋwən. Amaʼazənə yə si ghayn u swayn Yeso akə igwayn, yə naʼa uŋwən kwi ú ŋuw kom azad abaʼaray.

Usogwi baʼara Yeso

²⁷ Usogwi Paled ŋunə amə gobono num Yeso u ŋu ungɨŋ itoʼ gobono. Mbə́ pey ifere usogwi ujum u kad uŋwən.

²⁸ Mbə́ chi ndwi ma anigə inum ndwi fon zi abú uŋwən.

²⁹ Mbə́ aghəy nigə num iniʼ injəŋ ifow adam ufon awu izi atəw ma. Mbə́ nibi zi atin aghəy ungɨŋ abugə jəgi ma. Anigə izum atəw nwi ifigi ma ibaʼara uŋwən ighayn kwi, “Mbee, mba chaʼara ayə, ufon ba Jû.”

³⁰ Mbə́ chad amira inyo ma, num atin ghəy wu isom atəw ma awu.

³¹ Amaʼazənə mbə́ si baʼara uŋwən imara, mbə́ chi ndwi ufon wu gha zi ndwi ma inyo ma. Mbə́ ghəy nigə num uŋwən iŋu kom azad abaʼara.

Mbə́ kom Yeso azad abaʼara

³² Amaʼazənə Yeso nə usogwi wu du a Yerusanem mə yeŋ ŋuw, mbə́ bomo anóm moʼ nu amə wa Sirin. Ukum ma mə́ Sayimon. Usogwi wu yimə uŋwən kwi u num azad baʼara wu abú Yeso ibeʼe.

³³ Mbən yeŋ ŋu pey asin moʼ umə tiya akə Golgota. (Aton akə Golgota amə kwi, asin uwu utəw).

³⁴ Amaʼazənə mbə́ pey awu, mbə́ naʼ unoʼ abú Yeso nu u bɨgiri nə aghəy nwi nwi kwi u nugə. Asɨmə Amaʼazənə yə zweʼe, yə ton inugə.

³⁵ Amaʼazənə mbə́ si kom uŋwən azad abaʼara, mbə́ maʼa ibit ighaba ndwi ma akaʼa uma.

³⁶ Amaʼazənə mbə́ ghəy nigə, mbə́ chomo asin wu da imə ney uŋwən.

³⁷ Mbə ŋwaʼanayn usaʼa ŋunə mbə́ zi igun ma ikom akə azad baʼara wu igun atəw ma. Mbə́ ŋwaʼanayn kwi, “Amə Yeso uŋu, ufon abú ba Jû.”

³⁸ Mbə́ nibi komo iji bigə aboʼo uŋwən, ufeyn aba bugə jəgi ufeyn aba bugə ikyabay.

³⁹ Ba mbənə mbə́ mə́ chigə iyad asin wu, mbə́ mə́ baʼara uŋwən nibə məʼe utəw ma,

⁴⁰ Ba wu mə ighayn kwi, “Ungwə ŋunə ngwə mi saʼa imbəŋ Nwiye gha chim akə unəy uta, kaŋa du angəʼ. Ngwə bə kyayn kwi imə Ŋwə̂ Nwiye swiʼi akaʼa azad abaʼaray.”

⁴¹ Amə nibə ichin ichin nu ba ukyayn ambəŋ Nwiye, mbə taʼa ba akə unoʼo, foro ba ukyayn ungɨŋ abey mə baʼara uŋwən ghayn kwi,

⁴² “Yə mə chiyə ba chini angəʼ asɨmə cha nji abú uŋwən idu angəʼ. Uŋwən amə ufon ba Jû. Umbə swiʼi azad abaʼaray zi mba yi beni kwi uŋwən amə wa ŋunə Nwiye zoʼo.”

⁴³ Yə zi fiŋ inyo Nwiye anigə ghayn kwi imə Ŋwə̂ Nwiye. Nwiye bə wuʼ, u were uŋwən akinine.

⁴⁴ Kaba iji tənə mbə́ komo aboʼo uŋwən, mbə́ nibi jim uŋwən aba ichin ichin.

Inji zənə Yeso kuw

⁴⁵ Asə akə unyama ighum cho bigə angom, usin fid ungɨŋ abey ujum. Mbə́ fid nigə iŋu pey akə unyama ta.

⁴⁶ Amə akə ka unyama ta, Yeso kyayn akə ikay ghayn kwi, “Eli, Eli, lama sabatani?” Nu amə kwi, “Uŋu Nwiye, uŋu Nwiye ngwə waʼa aŋu ney da ngiya?”

⁴⁷ Ba moʼ akaʼa ba mbənə mbə́ təm iyad iyad zəw ney ghayn kwi, “Anom uŋu yə tiya Elayija kwi u zaʼa were uŋwən.”

⁴⁸ Aba ighari wu, wa moʼ akaʼa úŋwən noro ŋu num juʼ izi ungɨŋ anya unoʼ ikod atəw atin aghəy ŋu cha abú uŋwən kwi u soro.

⁴⁹ Asɨmə uchini ghayn kwi, “Təm mba zən kwi Elayija mi zaʼa chi uŋwən angəʼ.”

⁵⁰ Yeso gha ikyayn akə ikay mene.

⁵¹ Aba ighara wu, aba ndwi kyayn zənə mbə́ tiŋe ungɨŋ imbəŋ Nwiye sɨŋe akə uba bigə iti atəw iŋu pey aton. Usin mə nyiʼere ikob numə.

⁵² Utəw isəy fiʼe anigə Nwiye zəmə ba zayn zayn mbənə mbə́ si ku.

⁵³ Amaʼazənə Yeso zəmə, mbə́ du ungɨŋ utəw isəy wu ŋu nyi ungɨŋ asin zayn zayn (amə Yerusanem). Ba nanaʼ zən úŋwən awu.

⁵⁴ Amaʼazənə atəw abú usogwi, nə usogwi mbənə mbə́ mə́ nəmə Yeso zən umugə usin mə nyiʼere, nibi zən unó ujum mbənə mbə́ duw, mbə́ gəd kwaʼa ingəʼ anigə ghayn kwi, “Amə asiʼ kwi anóm ŋunə amə kwaʼa Ŋwə̂ Nwiye!”

⁵⁵ Ayey unanaʼ mə awu nu mbə́ təm agha sá ni ney. Amə ayey mbənə mbə́ noʼo aboʼo Yeso iti a Galeli ni yeŋ yə ywere uŋwən.

⁵⁶ Umoʼ akaʼa úŋwən amə Meri Magdalen, Meri ingo Jems nə Josef, foro ingo buŋ Zebedi.

Inji zənə mbə́ twayn Yeso

⁵⁷ Amaʼazənə injəʼ si chig, wa mbon moʼ noʼo Arimateya izaʼa nu ukum ma mə Josef, yə mə nibə wa moʼ akaʼa mbə məŋə-anó Yeso.

⁵⁸ Yə́ zaʼa nigə iŋu abú paled pey yi ghayn kwi, u naʼa awu Yeso abú uŋwən. Paled ghayn kwi ú naʼa awu wu abú uŋwən.

⁵⁹ Anigə Josef num awu wu ifed ungɨŋ aba ndwi fuw.

⁶⁰ Yə́ ŋu zi ungɨŋ isəy ma nu yə mə bugə ifey. Mbə toŋo isəy wu ungɨŋ ukob. Yə zi nigə ibin itəy kyayn kəbərə uchəw isəy wu awu noʼ ŋu ma.

⁶¹ Meri Magdalen ni Meri chini mə awu. Mbə́ chomo asəy ni ney isəy wu.

Mbə siy usogwi kwi uni nəmə isəy wu

⁶² Aney kuŋ nu amə anəy kuw ba Jû, ba kyayn ambəŋ Nwiye nə ba Farasay foro ŋu abú Paled,

⁶³ pey yi ghayn abú uŋwən kwi, “Masa, mba kono anó zənə Amaʼazənə atama ba wu mə ikay yə ghayn. Yə́ ghayn kwi, ‘Unəy mbə chigə uta u yi zəmə.’

⁶⁴ Anigə sob kwi uni tana nəmə isəg wu iŋu pey akə unəy wu uta. Nji mbə́ məŋə-anó ma umbi ŋu iji awu ma anigə si ghayn abú ba kwi yə si zəmə. Unó figi mbəŋ umbi chigə umbi imbey.”

⁶⁵ Paled ghayn abú úŋwən kwi, “Mbən num usogwi ú ŋuw ni nəmə isəy wu anji zənə mbən kaba.”

⁶⁶ Anigə, mbə́ noʼ ŋu zi anwini igun itey zənə mbə́ kəbərə uchəw isəy wu awu. Nibi siy usogwi kwi uni nəmə isəy wu.