Matəw 25 - Aŋwaʼanayn Uso Fey

Inayn maʼa da buŋ ayey ighum

¹ Yeso ŋu imbey ni ghayn abú mbə məŋə-anó kwi, “Akə amaʼazənə Kristo mi wene zaʼa, anó ufon azobo yi chomo ni buŋ ayey ighum nu mbə num unam uma du iŋu bomo unom ugən.

² Itɨŋ mə uneŋ itɨŋ mə ni iwe.

³ Umbənə amə uneŋ num unam asɨmə cha mbə di num uma uney anam chini.

⁴ Umbənə mbə́ mə́ nə iwe, num unam nibi yimə uney anam chini.

⁵ Umugə unom ugən wu tiŋe izaʼa, úŋwən uma ujum mə chiŋinə imbuni anigə ifwayn ambuni.

⁶ Asə uzimi, wa moʼ kyayn akə ikay ghayn kwi, ‘Unom ugən si zaʼa mbən duw ŋu bomo uŋwən.’

⁷ Amaʼazənə mbə ayey wu zəw anó zəŋ, mbə́ noʼ ikoʼoro unam uma.

⁸ Umbənə amə́ uneŋ ghayn abú u mbənə mbə́ mə́ nə iwe kwi, ‘Mba boʼo ubugə, mbən naʼa uney anam moʼ ina umba unam mbə sə nimə.’

⁹ Asɨmə u mbənə mbə́ mə́ nə iwe ywiri abú úŋwən kwi, ‘Cha uney anam mbəŋ mi koʼ ma ina nə inen. Mbən ŋuw zon umbən abú ba mbənə umə fənə.’

¹⁰ Amaʼazənə mbə aneŋ ayey wu du iŋu zon, unom ugən wu zaʼa. Umbənə mbə́ si tana inyo ma ŋu nyi ungɨŋ na aboʼo uŋwən ijəg ufere inama wu mbə́ nyi nigə ighəbə ubunu.

¹¹ Amaʼazənə mbə ghəbə nigə, asin naʼa buŋ ayey wu zaʼa pey yi gweʼe ghayn kwi, ‘Masa, Masa, fəʼe na ina.’

¹² Unom ugən wu ywiri kwi, ‘Ayə ghayn asiʼ inen kwi cha adi kyay aŋu ngwən.’

¹³ Anigə, mbən chomo ikyiʼi damugə cha mbən kyay ngwən anəy kə amaʼazənə Ŋwə̂ Wa mi wene zaʼa.”

Inayn maʼa da ba afaʼa uta

¹⁴ Yeso ŋu imbey ni ghayn abú mbə məŋə-anó kwi, “Akə amaʼazənə Kristo mi wene zaʼa, anó ufon azobo yi chomo numugə anom moʼ mə kaba iŋu iyeŋ u tiya ba faʼa ma ina u ghəy ma kwi uni ney.

¹⁵ Yə naʼ ubam ukab gol itɨŋ abú wa feyn, inaʼ ubigə abú wa chini nibi naʼ afeyn abú wa chini. Yə naʼ ubam gol wu abú wa feyn feyn akə nji zənə amə ghəy uney. Amaʼazənə yə naʼ nigə, yə noʼ ŋu iyeŋ.

¹⁶ Wa faʼa ŋunə yə num ubam gol itɨŋ ŋu gha iyuŋ ijəg injim ubam gol chini itɨŋ.

¹⁷ Wa faʼa ŋunə yə num ubam gol ubigə, jəg injim ubam chini ubigə.

¹⁸ Asɨmə wa faʼa ŋunə yə num abam gol feyn, ŋu toŋ ubəg inoy ukab mbaʼ faʼa ma ungɨŋ.

¹⁹ Amaʼazənə agha nyaʼa sa, mbaʼ afaʼa uma wene zaʼa pey ki nwini úŋwən”.

²⁰ Wa faʼa ŋunə yə́ num ubam gol itɨŋ, ŋu nyi nə ubam gol chini itɨŋ, pey yi ghayn abú uŋwən kwi, “Masa ngwə naʼ ubam gol iniŋ itɨŋ, zən, mə si jəg injim akə ubam chini itɨŋ.”

²¹ Mbaʼ afaʼa wu ghayn abú uŋwən kwi, “Ngwə ghəy anó chuŋ, ngwə mə wa chuŋ, ngwə faʼ akə fiŋ ujum. Numugə ngwə faʼa akə fiŋ ujum akə u ghəy kerekere. Ayi naʼa u ghəy nanaʼ inigə ngwə ki ney. Nyi ana mba wuʼe ngwa.”

²² “Wa faʼa ŋunə yə num ubam ukab gol ubigə ŋu nyi ghayn abú uŋwən kwi, ‘Masa ngwə naʼ ubam ukab gol iniŋ ubigə. Zən, mə jəg injim ubam ukab gol chini ubigə.’”

²³ Mbaʼ afaʼa wu ghayn abú uŋwən kwi, “Ngwə ghəy anó chuŋ, ngwə mə wa faʼa chuŋ, ngwə faʼ akə fiŋ ujum, numugə ngwə faʼa akə fiŋ ujum akə u ghəy kerekere, ayi naʼa u ghəy nanaʼ inigə ngwə ki ney. Nyi ana mba wuʼe ngwa.”

²⁴ Wa faʼa ŋunə yə́ num abam ukab gol feyn ŋu nyi ghayn abú uŋwən kwi, “Masa, mə kyay kwi injə fiŋ yə ka, nibi kyay kwi ngwə yə jaŋa u ghəy asin zənə cha ngwə kono, nibə fere u ghəy asin zənə cha ngwa saʼa ayə u ghəy akuŋ.

²⁵ Mə́ mə goro kwi ayi niy ungwə ukab. Anigə, mə́ ŋu noy ungɨŋ isəy. Aney injə abam ukab gol azəŋ.”

²⁶ Mbaʼ faʼa ma ywiri abú uŋwən kwi, “Ngwə mə ŋwə̂ afaʼa iboŋ, ngwə mə nibə azigə. Ngwə kaŋa kyay kwi ayə jaŋa u ghəy asin zənə cha a kono, nibə fere u ghəy asin zənə cha a saʼara aŋu u ghəy akuŋ?

²⁷ Nji aka ngwə mi num uŋu ukab ŋu zi ana zənə umə numə ukab da abə wene zaʼa a num atəw ukab nibi num injim.”

²⁸ Mbən num abam ukab gol zəŋ abú uŋwən inaʼ abú wa faʼa ŋunə yə mə nə ubam ukab gol ighum.

²⁹ Damugə ba jum mbənə umə nə ghəy moʼ umbi naʼ achini abú úŋwən, anigə uyi mə nə u ghəy nanaʼ. Asɨmə wa ŋunə cha ghəy moʼ abú uŋwən kaba ŋwə̂ ghəy ŋunə yə mə abú uŋwən umbi num.

³⁰ Amə da wa afaʼa indon ŋunə, mbən maʼa uŋwən ungɨŋ asin firi, nu amə asin zənə ba mə idey ikoro asoŋ.

Yeso yi saʼa isəg anəy nwi

³¹ Yeso ŋu imbey ni ghayn abú mbə məŋə-anó kwi, “Amaʼazənə Ŋwə̂ Wa mi zaʼa ni ufon nə mbə angəd ujum aboʼo uŋwən, u yi chomo igun atən ufon ma.

³² Ubey ujum mbi ŋu fere ifigi ma. Anigə uyi ghaba ba akə uba ubigə numugə anəmə injəg mə ghaba injəy aboʼo ibɨgi.

³³ U yi siy ba mbənə umə ghəy unó mbənə ukoʼoro aba bugə jəgi, icha ba mbənə umə ghəy unó iboŋ aba abugə ikyabay.

³⁴ Anigə ufon wu yi ghayn abú ba mbənə umə aba bugə jəgi kwi, ‘Mbən zaʼa umbən mbənə uŋu Mbaʼ si naʼa aborobod inen ijəg anó ufon zənə yə́ si tana isiy inen inoʼo amaʼazənə yə tana isəg,

³⁵ damugə injəy mə zaŋa iniŋ, mbən naʼ ghəy jəgi iniŋ, adoʼ zom iniŋ, mbən naʼ une iniŋ, mə́ mə wa isoʼ mbən num aŋu ungɨŋ itən na.

³⁶ Mə́ mə isoʼo itin, mbən zi ndwi inyo iniŋ, mə́ mə sɨgə mbən ney aŋu, mə́ mə ana ndəŋ mbən zaʼa ichaʼara aŋu.’”

³⁷ Ba mbənə umə ghəy unó mbənə u koʼoro, umbi ywiri abú uŋwən kwi, “Asɨyisəg, mba zən ayə aŋwayn nu injəy mə zaŋa inigə mba naʼ ghəy jəgi inigə, kə nu adoʼ zom inigə mba naʼ une inigə?

³⁸ Amə aŋwayn mba zən ayə ni wa isoʼ mba num ayə ungɨŋ ita na, kə ngwə mə isoʼ itin mba zi ndwi inyo nigə?

³⁹ Amə aŋwayn mba zən ayə ngwə mə sɨgə kə ana ndəŋ mba zaʼa iney ayə?”

⁴⁰ “Ufon wu yi ywiri abú úŋwən kwi, ‘Ayə ghayn asiʼ inen kwi, mbən bə ghəy unó mbəŋ kaba abú Ŋwə̂ Wa moʼ akaʼa umbəŋ ba, mbən ghəy iniŋ.’”

⁴¹ “Anigə u yi ghayn abú ba mbənə umə aba ikyabay ma kwi, ‘Umbən ba ndon, mbən noʼo ngwən inyi iyad iŋu nyi ungɨŋ uwəd nu cha umi noʼo nimə nu Nwiye si tana abú debere nə angəd ma.

⁴² Amaʼazənə injəy mə zaŋa iniŋ, cha mbən naʼa ngwən ghəy jəgi iniŋ. Amaʼazənə adoʼ zomo iniŋ, cha mbən naʼa ngwən une iniŋ.

⁴³ Amaʼazənə mə́ mə wa isoʼ, cha mbən di num ngwən aŋu ungɨŋ itən na. Amaʼazənə mə́ mə isoʼ itin, cha mbən di naʼa ngwən ndwi iniŋ. Amaʼazənə mə́ mə sɨgə foro amaʼazənə mə́ mə ana ndəŋ cha mbən di zaʼa iney aŋu.’”

⁴⁴ “Anigə umbi ywiri kwi, ‘Asɨyisəg, amə aŋwayn mba zən ayə nu injəy mə zaŋa kə adoʼ zom inigə kə nu ngwə mə wa isoʼ kə isoʼ itin kə sɨgə kə ana ndəŋ nu cha mba di iyere ayə?’”

⁴⁵ “U yi ywiri kwi, ‘Ayə ghayn asiʼ inen kwi, numugə cha mbən ghəy unó mbəŋ kaba abú ŋwə̂ Wa moʼ akaʼa ba mbəŋ, anigə cha mbən di ghəy ngwən iniŋ.’”

⁴⁶ “Anigə umbi ŋu nyi ungɨŋ ingəʼ zənə cha imi noʼo mey. Asɨmə ba mbənə umə ghəy unó mbənə ukoʼoro umbi jəg itəni nu cha imi noʼo mey.”