Matəw 22 - Aŋwaʼanayn Uso Fey

Inayn maʼa da inama

¹ Yeso nibi ighayn inay maʼa abú ba ukyay ungɨŋ imbəŋ Nwiye foro abú ba ukyay ungɨŋ abey kwi,

² “Anó ufon azobo yə chomo numugə ufon moʼ kaʼ inama abú ajoŋ ma.

³ Yə tom ba faʼa ma kwi u ŋu tiya ba mbənə yə́ kaʼa akə inama wu. Ba faʼa wu ŋu tiya anigə cha mbə́ di zaʼa.”

⁴ Yə tom ba faʼa chini ghayn kwi, “Mbən ŋu ghayn abú ba mbənə wə́ kaʼa úŋwən kwi amaʼ si koʼ, mə si tana u aghəy ujum. Mə si wa unom ipoŋ ŋunə uzaʼa nibi wa nyə̂ nu ujəyi ikwey koŋo anji chuŋ. U aghəy ujum si siyə awu. Mbən zaʼa ijəg inama.”

⁵ Ba wu zəw anó zəŋ, anigə cha mbə num uma akə anó moʼ. Mbə du uma, umoʼ ŋu ma ambayn, uchini ŋu ma usin iyuŋ uma.

⁶ Uchini ibiya ba faʼa wu isom úŋwən akə inji iboŋ zwere.

⁷ Ufon wu sɨy itəm anigə icha usogwi ma kwi mbən ŋuw zwere ba mbənə mbə zwere umbəŋ ba faʼa ituŋ abey ma.

⁸ “Anigə yə́ ghayn abú ba faʼa ma kwi, ‘Amaʼ ijəg inama zəŋ si koʼ, asɨmə cha ba mbənə mə kaʼa koʼo uma ijəg inama zəŋ.’

⁹ Mbən ŋuw ijugi inji itiya ba jum mbənə mbən zən ə boʼo u zaʼa ijəg inama zəŋ.”

¹⁰ Anigə ba faʼa wu du ŋu ijugi inji pey yi fere ba ujum mbənə mbə́ zən ə, u mbənə umə aghəy unó mbənə ukoʼoro foro u mbənə umə aghəy unó iboŋ. Ba wu ujum nyi ungɨŋ na inanaʼ wu isugi.

¹¹ “Amaʼazənə ufon wu ŋu nyi ungɨŋ na inama wu, yə ney ba mbənə u zaʼa akə inama wu. Yə zən anóm moʼ nu cha yə zi ma ndwi inama,

¹² anigə yə́ biri abú uŋwən kwi, ‘Inyi azi, ngwə chigə ngiya nyi akəŋ nu cha ngwə zi ayə ndwi inama?’ Amə́ chama anó moʼ abú anóm wu ighayn.”

¹³ Anigə, ufon wu ghayn abú ba faʼa ma kwi, “Mbən kod ubugə ma nibi kod ughəw ma ŋu maʼ uŋwən isəg asin imbiri nu amə asin zənə ba mi mə idey ikoro asoŋ.”

¹⁴ Nwiye yə tiya ba nanaʼ asɨmə u yə choʼo aba ba kerekere.

Ibiri da anó ni mə naʼa ukab tag

¹⁵ Ba Farasay du ŋu tana umugə umi zi atam abú Yeso akə inayn ma.

¹⁶ Anigə mbə tom mbə məŋə-anó uma ni ba mbənə mbə́ mə́ aba ufon Herod abú uŋwən kwi u ŋuw ghayn abú uŋwən kwi, “Ataʼa ba mba kyay kwi ngwə yə ghayn asiʼ foro kwi ngwə yə itey asiʼ da inji zənə Nwiye mə kaba kwi ba chomo. Cha ngwə mə goro ayə wa kə amə wa ukyayn cha ngwə mə aghəy ayə aghɨ.

¹⁷ Ghayn inen akinine, ngwə kono kwi ngiya? Noʼo mə tey kwi mba naʼa tag abú Kayisa kə ka mba naʼa ngwa?”

¹⁸ Yeso kyay uniy ŋunə mbə́ mə́ itə́ anigə yə́ ghayn kwi, “Umbən ba figə unó! Mbən mə kaba ikwaʼara aŋu da ngiya?

¹⁹ Mbən tey ukab ŋunə mbən mə tu tag awu iniŋ”

²⁰ Amaʼazənə mbə́ tey abú uŋwən, yə́ biri abú úŋwən kwi, “Ifigi zəŋ nə ukum ŋunə amə uyi ngwa?”

²¹ Mbə́ ywiri kwi, “A mə iyi Kayisa.” Anigə yə́ ghayn abú úŋwən kwi, “Mbən naʼa u aghəy Kayisa abú Kayisa nibi naʼa u aghəy Nwiye abú Nwiye.”

²² Amaʼazənə mbə́ zəw anó zəŋ, mbə́ yere anigə isayn uŋwən iŋu uma.

Ibiri da anó ni zəmə

²³ Aba anəy zənə Yeso ghayn anó da inaʼ u aghəy Kayisa abú Kayisa, ba Sadusi moʼ nu umə ghayn kwi cha ba mi zəmə ŋu abú Yeso pey yi biri kwi,

²⁴ “Ataʼa ba, Mose ghayn kwi, ‘Anom bə ku ni cha u bə́ ma buŋ, unya anóm ma yi nam ayey ŋunə ukuw iwa da ibə́ buŋ nə uŋwən nu ayi mə buŋ unya anóm ma ŋunə yə kuw.’

²⁵ Akinine unya anóm isambigə moʼ mə akaʼa inja, uyi imbey nam iku nu cha ubə́ ma buŋ, anigə unya anóm ma nam ayey uti wu.

²⁶ Unya anóm wu nibi ku nu cha ubə ma buŋ, unya anóm iŋu pey akə uta nibi nam ayey wu cha u bə́ ma buŋ. Yə́ aghəy aba nigə iŋu pey akə unya anóm wu isambigə.

²⁷ Ayey wu nibi nwi ku.

²⁸ Amaʼazənə ba mi zənə, ayey wu mi mə uyey ngwa akaʼa unya anóm wu isambigə numugə úŋwən uma ujum nam uŋwən?”

²⁹ Yeso ywiri abú úŋwən kwi, “Mbən si faba damugə cha mbən kyay anó zənə amə ungɨŋ Aŋwaʼanayn Nwiye kə ikyay ikay Nwiye.

³⁰ Amaʼazənə ba mi zəmə, cha umi nam kə cha buŋ ana inama, umbi chomo nə angəd mbənə umə azobo.

³¹ Amə da anó izəmə, cha mbən di si kaŋa foŋ anó zənə Nwiye ghayn inen? Yə ghayn kwi,

³² ‘Amə Nwiye Abraham, Nwiye Azik foro Nwiye Yakob.’ Cha uŋwən mə ma Nwiye uwu ba, amə Nwiye ba mbənə umə ikay.”

³³ Amaʼazənə akama ba wu zəw unó mbəŋ, mbə́ yere unó mbənə yə́ mə́ itey.

Noʼo ŋunə uchigi unoʼo mbi ujum

³⁴ Amaʼazənə ba Farasay zəw kwi Yeso si kəbərə uchəw ba Sadusi, Mbə́ ŋu fere iŋu abú uŋwən.

³⁵ Wa moʼ akaʼa úŋwən nu amə ataʼa ba akə unoʼo biri inayn abú uŋwən da izi atam abú uŋwən. Yə biri kwi,

³⁶ “Ataʼa ba, noʼo ŋunə uchigə unoʼo mbi ujum amə ŋwayn?”

³⁷ Yeso ywiri abú uŋwən kwi, “Ngwə wuʼ Asɨyisəg Nwiye akə fiŋ ujum, akə azugə ujum foro akə iti kono ujum.

³⁸ Noʼo ŋunə amə uŋwən u chigi unoʼo mbi ujum.

³⁹ Uŋunə uniŋe akuŋ nu umə chini chin amə kwi, ‘Ngwə wuʼ wa ŋunə umə tinə ma inji iyad numugə ngwə wuʼe inji inyo.’

⁴⁰ Unoʼo ujum nə unó ujum mbənə ba ukən Nwiye ŋwaʼanayn umbə chi ungɨŋ unoʼo mbəŋ ubigə.”

Ibiri da wa ŋunə Nwiye zoʼo

⁴¹ Amaʼazənə ba Farasay fere asin feyn, Yeso biri abú úŋwən kwi,

⁴² “Mbən mə kono kwi ngiya da wa ŋunə Nwiye zoʼo?” Amə ajoŋ ngwa? Mbə́ ywiri kwi, “Amə ŋwə̂ akə aghaŋ ufon Dafid.”

⁴³ Yeso biri abú úŋwən kwi, “Yə sí chigə ngiya Azugə Nwiye aghəy Dafid tiya uŋwən akə Asɨyisəg?” Ufon Dafid ghayn kwi,

⁴⁴ “Asɨyisəg ghayn abú uŋu Asɨyisəg kwi, ‘Chomo akəŋ inyi aba bugə jəgi Pey Amaʼazənə ami zi umbə ba bana Injə aton aghəw.’

⁴⁵ Ufon Dafid mbə tiya uŋwən akə Asɨyisəg uŋwən si mə ŋwə̂ akə aghaŋ ufon Dafid ngiya?”

⁴⁶ Cha wa moʼ di kyay iywiri anó zənə yə́ biri. Iti aney wu, cha wa moʼ awu nu yə́ kyay iyimə fiŋ ibiri anó moʼ abú uŋwən.