Matəw 19 - Aŋwaʼanayn Uso Fey

Anó ni ghaba inama

¹ Amaʼazənə Yeso si mara ighayn unó da inyaba unó ibón ba, yə noʼo Galeli iŋu aba abey Judeya anjin ugwi Jodan izi.

² Akama ba niŋe anjim ma uŋu awu. Awu, yə zwey u mbənə mbə́ mə́ sɨgə.

³ Ba Farasay moʼ ŋu abú uŋwən da ikwaʼara uŋwən. Mbə biri abú uŋwən kwi, “Umba unoʼo umə tey kwi wa ghaba inama nə uyey ma da anó moʼ zənə u aghəy?”

⁴ Yeso ywiri kwi, “Cha mbən di si foŋ ngwən kwi Nwiye ŋunə yə tana ba Amaʼazənə isəg ti yə tana anóm nə ayey?

⁵ Anigə Nwiye ghayn kwi, ‘Akə aton zəŋ, anóm yi sayn mbaʼ ma nə ingo ma ŋu bumə nə uyey ma anigə úŋwən uma ubigə umbi si məŋi amə nyə̂ inyo feyn.’

⁶ Anigə cha udi mə bere uma ba ubigə, mbə si məŋi nyə̂ inyo feyn. Anigə aghəy zənə Nwiye bumə ka wa moʼ saʼara ma.”

⁷ Mbə biri abú uŋwən kwi, “Abə mə nigə, aton zənə Mose ghayn kwi anóm yi naʼa aŋwaʼanayn iti kwi yə si saʼara inama nə uyey ma ki icha uŋwən uŋu amə da ngiya?”

⁸ Yeso ywiri kwi, “Mose beni kwi mbən saʼara inama nə umbən ayey damugə itən fiŋ si ka. Asɨmə akama nigə yə məŋi amaʼazənə Nwiye tana isəg.

⁹ Anigə ayə ghayn inen kwi, anóm moʼ ŋunə usaʼara inama nə uyey ma, inam ayey chini nu akama kwi uyey ma niŋe nə anóm chini, anóm wu niŋe uyey wa chini.”

¹⁰ Mbə məŋə-anó ma ghayn abú uŋwən kwi, “Abə mə nigə aməŋi da anóm nə uyey ma, nji yə boŋ kwi ka wa nama.”

¹¹ Yə ywiri abú úŋwən kwi, “Cha anó zəŋ mə ma abú ba ujum. Ayə aba abú ba mbənə Nwiye aghəy kwi u beni nigə.

¹² Uton nanaʼ mbə awu nu cha anóm moʼ mə nama, aton moʼ mə kwi, amə nigə bə ibə́ umoʼ, u moʼ amə ba uzaʼa, umoʼ ton inam da anó ufon azobo. Wa ŋunə u beni anó zəŋ u beni.”

Yeso zi aborobod igun buŋ kuŋe

¹³ Ba moʼ mə num buŋ ŋuw abú Yeso da u niŋe ubugə ma igun uma ichaʼara Nwiye abú uŋwən. Mbə məŋə-anó ma mə kyay abú ba wu.

¹⁴ Anigə Yeso ghayn kwi, “Mbən sayn buŋ kuŋe mbigə zaʼa iniŋ. Mbən kən ngwən úŋwən damugə a mə ba mbənə u chomo ni buŋ kuŋe mbəŋ umi jəg anó ufon azobo.”

¹⁵ Amaʼazənə yə ghayn nigə, yə niŋi ubugə igun buŋ awu, noʼ ŋuw ma.

Anó da ajoŋ moʼ nu yə mə ni imbon

¹⁶ Anom moʼ ŋu abú Yeso pey yi biri kwi, “Ataʼa ba, amə anó chuŋ ngiya amə ghey aghəy da ijəg itəni nu cha imi noʼo imey?”

¹⁷ Yeso ywiri abú uŋwən kwi, “Ngwə biri iniŋ da anó chuŋ boʼo ngiya? Abə ma wa feyn mə awu nu u boŋo. Ngwə bə mə kaba ijəg itəni, ngwə num ikɨy Nwiye.”

¹⁸ Anom wu biri kwi ikɨy tayn? Yeso ywiri kwi, “I zwere yə wa, iniŋe ayə nə ayey wa chini, iji ayə, ibeni ayə uzənə figə unó.

¹⁹ Wumini ungwə mbaʼ nə ungwə ingo, anigə iwuʼ wa ŋunə umə tinə ma inji iyad numugə ngwə wuʼ injə nyə̂ inyo.”

²⁰ Ajoŋ wu ghayn abú uŋwən kwi, “Mə si num ikɨy itəŋ ujum. Amə anó ngiya chini abúʼə inum ə?”

²¹ Yeso ghayn abú uŋwən kwi, “Ngwə bə mə kaba iboŋ mara, ŋu fənə aghəy mbənə umə inigə ŋu naʼ ukab wu abú ba ukaŋ, anigə ngwə yi mə nə ukab azobo. Ngwə bə aghəy nigə ngwə zaʼa iniŋe inyi injim.”

²² Amaʼazənə ajoŋ wu zəw anó zəŋ, yə kənə anigə noʼ ŋuw ma damugə yə mə ni imbon nu inaʼa chigə.

²³ Anigə Yeso ghayn abú mbə́ məŋə-anó ma kwi, “Ayə ghayn asiʼ inen kwi, ayə siy abú wa umbon inyi ungɨŋ anó ufon azobo.

²⁴ Ayə gha ghayn inen kwi, ayə zaba abú kamel ichigə ubəg isaʼ chigə umugə wa u mbon mi inyi ungɨŋ anó ufon Nwiye.”

²⁵ Amaʼazənə mbə məŋə-anó ma zəw anó zəŋ, mbə kaŋa iməŋərə uma anigə ighayn kwi, “Abə mə ney, ingwa misi du angəʼ?”

²⁶ Yeso ney úŋwən ghayn kwi, “Anó zəŋ yə chigə amə wa, cha anó moʼ mə chigə ma Nwiye.”

²⁷ Pita ghayn abú uŋwən kwi, “Zən! Mba sayn ughəy ujum iniŋe injə injim. Amə ngiya mba mi mə nə aŋwən?”

²⁸ Yeso ghayn abú úŋwən kwi, “Ayə ghayn asiʼ inen kwi, Amaʼazənə Ŋwə̂ Wa mi chomo igun atən ufon ungɨŋ isəg fiy, umbən mbənə mbən niŋe inyi injim mbən nibi chomo igun utən ufon ighum cho bigə isaʼ inebey Izre ighum cho bigə.

²⁹ Ba ujum mbənə u sayn ina uma, kə unya anóm, kə unya ayey, kə mbaʼ, kə ingo, kə buŋ, kə imbayn da aŋu, yi mə nə u aghəy wu ukɨ ghara nibi jəg itəni nu cha imi noʼo imey.

³⁰ Asɨmə ba nanaʼ mbənə umə imbey, umbi si mə anjim. Unanaʼ mbənə umə anjim umbi si mə imbey.”