Matəw 10 - Aŋwaʼanayn Uso Fey

Yeso tom ba utom ighum cho bigə

¹ Yeso tiya mbə məŋə-anó ma ighum cho bigə asin feyn inaʼa ikay abú úŋwən kwi ú chiyə uzugə iboŋ, izwey ikudi isɨgə ujum ighəy kwi ba boro.

² Amə ikum ba utom wu ighum cho bigə itəŋ. U yi imbəy amə Sayimon ŋunə mbə́ mə́ tiya akə Pita, nə unya anóm ma Andrew: Jems nə unya anóm ma Jon úŋwən mə buŋ Zebedi:

³ Filip nə Batoloməw: Tomas nə Matiyo ŋunə yə mə́ num ukab tag: Jems ajoŋ Alfayus nə Tadiyus:

⁴ Sayimon ŋunə yə́ zi fiŋ abey nə Judas Iskariyot ŋunə yə́ fənə Yeso.

Unó mbənə ba utom wu ighum cho bigə ŋu ifaʼ

⁵ Yeso tom ba utom wu ighum cho bigə ighayn abú úŋwən kwi, “Ka mbən ŋu ngwən akaʼa ba mbənə akaʼa ma ba Jû kə iŋu nyi ungɨŋ asin moʼ Samariya.

⁶ Mbən ŋuw amə abú ba Izre nu umə nə injəg tənə inimi.

⁷ Amaʼazənə mbən ŋu awu, mbən yeŋ yə ighayn inayn Nwiye abú úŋwən kwi, ‘Anó ufon azobo si tinə.’

⁸ Mbən zwey ba isɨgə, izəmə uwu ba, izwey ba mbənə akyuŋ mə inyo ma nibi chi uzugə iboŋ inyo ba. Mə naʼ ikay zəŋ inen ibuw anigə mbən ni aghəy unó mbəŋ ibuw.

⁹ Ka mbən yimə ngwən ukab gol, kə ukab sɨriva kə ukab kapa umbən ubam.

¹⁰ Ka mbən num ngwən abam kə ndwi chini kə utabay kə imbaŋ, yə kəʼ kwi ba jəy wa faʼa.

¹¹ Mbən bə́ nyi ungɨŋ asin kyayn kə ungɨŋ asin kukuŋe, mbəŋ kaba wa ŋunə u wuʼi inum ngwən anji chuŋ ichomo nə uŋwən pey amaʼazənə mbən mi noʼ asin wu.

¹² Mbən bə nyi ungɨŋ na moʼ, mbən chaʼara ba mbənə umə awu ungɨŋ na kwi, ‘Nwiye zi aborobod igun inen.’

¹³ Ba mbənə umə awu ungɨŋ na bə num ngwən anji chuŋ, aborobod yi tənə ungɨŋ na wu. Abə mə kwi cha u di num ma ngwən anji chuŋ, aborobod wu yi gha tənə inen.

¹⁴ Abə mə kwi cha ba ungɨŋ na moʼ kə ungɨŋ asin moʼ num ma ngwən anji chuŋ kə zəw anó zənə mbən mə ighayn, mbən koro imboyi umbən ughəw idu ungɨŋ na wu kə ungɨŋ asin awu.

¹⁵ Ayə ghayn asiʼ inen kwi, aney zənə Nwiye mi saʼa isəg, u yi diri ba Sodom nibi diri ba Gomora chigə umugə u mi diri ba mbənə umə ungɨŋ asin wu.”

U mbi nwini inya ughəw ba utom

¹⁶ Yeso ŋu imbəy ighayn kwi, “Mbən zəw! Ayə cha ngwən isəg mbən chomo ni injəg akaʼa ifuŋ. Mbən iwe ngwən ni ijugə, ni nara ni buŋ.

¹⁷ Mbən iwe ngwən nə ba, damugə umbi ibiya ngwən ŋu na abú mbə́ saʼa abey, umbi swayn ngwən ungɨŋ na ibumi ba Jû.

¹⁸ U mbi ghəw ngwən iŋu ifigi gobono foro ifigi ifon da aŋu. Ubə aghəy nigə, amə apan inen ighayn ukən uchuŋ abú úŋwən foro abú ba mbənə akaʼa ma ba Jû.

¹⁹ Amaʼazənə u bə yimə ngwən, ka mbən tumə ngwən inyo da anó zənə mbən mi ghayn kə da nji zənə mbən mi ghayn. Amaʼ wu bə koʼo, Nwiye yi aghəy kwi mbən kyay anó ni ghayn,

²⁰ damugə akə ma u mbən mə inayn. Amə Azugə Mbaʼ ami chigə itən injim inayn.”

²¹ Yeso ŋu imbey ni ghayn abú úŋwən kwi, “Unya umbi fənə unya ma kwi uzwere, mbaʼ mbi fənə buŋ uma kwi uzwere, buŋ mbi beŋe utəw abú mbaʼ uma anigə ghayn kwi u zwere.

²² Ba ujum mbi bana ngwən da aŋu. Asɨmə wa ŋunə umi yimə fiŋ iŋu pey akə inwi, Nwiye yi chiyə uŋwən angəʼ.

²³ Amaʼazənə umbə nwini itən inya ughəw ungɨŋ asin moʼ, mbən noro iŋu ungɨŋ asin chini. Ayə ghayn asiʼ inen kwi ki mbən sə ŋu yeŋ usin ujum ungɨŋ Izre, Ŋwə̂ Wa yi wene zaʼa.

²⁴ Cha wa ŋunə umə kweme anó mə chigə ma wa ŋunə umə itey anó abú uŋwən, cha wa faʼa mə chigə ma mbaʼ afaʼa.

²⁵ Anigə wa aməŋə-anó ni wuʼe ma kwi i məŋi nə wa ŋunə umə itey unó abú uŋwən. Ŋwə̂ afaʼa nibi məŋi ni mbaʼ afaʼa. U bə mə tiya atəw akə na kwi Belzebul, nji umbi mə tiya ba ungɨŋ na ma akə ikum nu ibɨy chiyə.”

Wa ŋunə amə aghəy uni goro uŋwən

²⁶ Yeso ŋu imbey ni ghayn kwi, “Mbən mə goro ngwən ba, cha aghəy moʼ awu u kəbərə nu cha umi fiʼi, kə anó moʼ u mə inoy nu cha ba mi kyay.

²⁷ Unó mbənə amə ghayn inen ambiri, mbən ghayn Amaʼazənə usin mə zayn. Unó mbənə amə ijumə inen, mbən təm indəm na isaʼ.

²⁸ Ka mbən mə goro ngwən ba mbənə amə ghəy u zwere nyə̂ inyo asɨmə cha amə ghəy u zwere azugə. Asɨmə mbən goro amə Nwiye ŋunə amə ghəy u zwere nyə̂ inyo nibi zwere azugə ungɨŋ asin ingəʼ.

²⁹ Ká umbə fənə íchiy bigə aba akə ŋwə̂ ukab, asɨmə cha u moʼ mi fwayn ma asey nu cha ungwən mbaʼ di beni.

³⁰ Kaba inyoŋ tənə imə umbən utəw, Nwiye si taŋ ujum.

³¹ Anigə, mbən mə goro ngwən. Mbən chigə ngwən akə inen nanaʼ.”

Anó da ibeni kə iton Kristo

³² Yeso ŋu imbey ni ghayn kwi, “Wa ŋunə u beni ifigi ba kwi yə kyay aŋu, ayi beni ifigi uŋu Mbaʼ ŋunə umə azobo kwi mə kyay uŋwən.

³³ Asɨmə wa moʼ ŋunə u ton aŋu ifigi ba, ayi nibi ton ifigi uŋu Mbaʼ ŋunə umə azobo kwi cha adi kyay aŋu uŋwən.”

Yeso zaʼa kwi ba zoŋ ka uchomo uma akə aborobod

³⁴ Yeso ŋu imbey ghayn kwi, “Ka mbən kono ngwən kwi mə zaʼa da inaʼ aborobod igun isəg. Cha adi zaʼa ina aŋu aborobod, mə zaʼa amə kwi uni zoŋ.

³⁵ Mə zaʼa ighəy kwi, Ajoŋ ni komo atəw nə mbaʼ ma, Akwere ni komo atəw nə ingo ma, Foro kwi ayey ni komo atəw nə ingo mbə unom ma.

³⁶ Ungwə wa abana yi mə wa ungɨŋ ungwə unebey.

³⁷ Wa moʼ ŋunə u wuʼi mbaʼ ma kə ingo ma chigə aŋu cha u di koʼ iməŋi uŋu aməŋə-anó, wa moʼ ŋunə u wuʼi ajoŋ ma kə ukwere ma chigə aŋu cha u di koʼ iməŋi uŋu aməŋə-anó.

³⁸ Wa moʼ ŋunə cha u di beʼe ma azad baʼara niŋi inyi injim, cha u di ikoʼ iməŋi uŋu aməŋə-anó.

³⁹ Wa moʼ ŋunə umə kaba ijəg itəni yi isam itəni wu, asɨmə wa ŋunə u sam itəni ma da aŋu u yi jəg itəni wu.”

Anó da uchoʼo afaʼa

⁴⁰ Yeso ŋu imbey ghayn kwi, “Wa moʼ ŋunə u num ngwən anji chuŋ yə nibi num aŋu anji chuŋ. Wa moʼ ŋunə u num aŋu anji chuŋ yə nibi num wa ŋunə u tom aŋu.

⁴¹ Wa moʼ ŋunə u num wa ukən Nwiye damugə uŋwən mə wa ukən Nwiye, u yi num u choʼo afaʼa wa ukən Nwiye. Wa moʼ ŋunə u num wa ŋunə umə aghəy unó mbənə u koʼo damugə u yə aghəy unó mbənə ukoʼo, u yi num u choʼo afaʼa wa ŋunə umə aghəy unó mbənə u koʼo.

⁴² Wa moʼ ŋunə u naʼa kaba itoʼ une zuw abú Ŋwə̂ Wa moʼ akaʼa umbəŋ damugə uŋwən amə uŋu aməŋə-anó, u yi mə nə u choʼo afaʼa.”